ದುಬೈ : ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿ ಕ್ರಿಕೆಟ್ನ ಅತ್ಯಂತ ಶ್ರೇಷ್ಠ ಫಿನಿಶರ್ ಎಂದು ಆಸ್ಟ್ರೇಲಿಯಾ ತಂಡದ ಮಾಜಿ ನಾಯಕ ಹಾಗೂ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಮುಖ್ಯ ಕೋಚ್ ರಿಕಿ ಪಾಂಟಿಂಗ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ ಒತ್ತಡದ ಸಂದರ್ಭದಲ್ಲಿ ಧೋನಿ ಅವರ ತಾಳ್ಮೆಯ ಮನೋಭಾವನೆ ಬೆರಗುಗೊಳಿಸುತ್ತದೆ ಎಂದು ತಿಳಿಸಿದ್ದಾರೆ.
ಭಾನುವಾರ ರಾತ್ರಿ ನಡೆದ ಕ್ವಾಲಿಫೈಯರ್ ಪಂದ್ಯದಲ್ಲಿ ಡೆಲ್ಲಿ ವಿರುದ್ಧ ಧೋನಿ ಕೇವಲ 6 ಎಸೆತಗಳಲ್ಲಿ 18 ರನ್ ಸಿಡಿಸಿ ಸಿಎಸ್ಕೆ ತಂಡವನ್ನು 9ನೇ ಬಾರಿಗೆ ಫೈನಲ್ ಪ್ರವೇಶಿಸುವಂತೆ ಮಾಡಿದರು. ಕೊನೆಯ ಓವರ್ನಲ್ಲಿ 5 ಎಸೆತಗಳಲ್ಲಿ ತಂಡಕ್ಕೆ 13 ರನ್ಗಳ ಅಗತ್ಯವಿತ್ತು. ಆದರೆ, ಧೋನಿ ಸತತ ಮೂರು ಎಸೆತಗಳಲ್ಲಿ 3 ಬೌಂಡರಿ ಬಾರಿಸಿ ತಂಡವನ್ನು ಗೆಲುವಿನ ಗಡಿ ದಾಟಿಸಿದರು.
ಅವರು (ಧೋನಿ) ಶ್ರೇಷ್ಠ ಫಿನಿಶರ್ಗಳಲ್ಲಿ ಅವರು ಒಬ್ಬರಾಗಿದ್ದಾರೆ. ನಾವು ಡಗೌಟ್ನಲ್ಲಿ ಕುಳಿತು ಜಡೇಜಾ ಮೊದಲು ಬರುತ್ತಾರೆಯೇ, ಧೋನಿ ಮುಂದು ಬರುತ್ತಾರೆಯೇ ಎಂದು ಯೋಚನೆ ಮಾಡುತ್ತಿದ್ದೆವು. ಧೋನಿ ಬಂದ ನಂತರ ಪಂದ್ಯವನ್ನು ತಣ್ಣಗೆ ಮುಗಿಸಬಹುದು ಎಂದು ಆ ಸಂದರ್ಭದಲ್ಲಿ ಹೇಳಿದ್ದೆ ಎಂದು ಪಾಂಟಿಂಗ್ ಪಂದ್ಯದ ನಂತರ ತಿಳಿಸಿದ್ದಾರೆ.
ನೋಡಿ, ಅವರು ಪಂದ್ಯವನ್ನು ಮುಗಿಸಿದಾಗ ಮತ್ತು ನಿವೃತ್ತರಾದಾಗ, ಕ್ರಿಕೆಟ್ ಕಂಡ ಶ್ರೇಷ್ಠ ಫಿನಿಶರ್ಗಳಲ್ಲಿ ಒಬ್ಬರಾಗಿ ಖಂಡಿತ ನೆನಪಿನಲ್ಲಿ ಉಳಿದುಕೊಳ್ಳುತ್ತಾರೆ ಎಂದು ನಾನು ಭಾವಿಸುತ್ತೇನೆ ಎಂದು ಆಸೀಸ್ ಲೆಜೆಂಡ್ ತಿಳಿಸಿದ್ದಾರೆ.
ಡೆಲ್ಲಿ ಬೌಲರ್ಗಳು ಧೋನಿ ವಿರುದ್ಧ ಯೋಜನೆಗಳನ್ನು ಕಾರ್ಯಾರೂಪಕ್ಕೆ ತರಲು ವಿಫಲರಾದರು ಎಂದು ಪಾಂಟಿಂಗ್ ಸೋಲಿಗೆ ಕಾರಣ ತಿಳಿಸಿದ್ದಾರೆ."ಬಹುಶಃ ಕೊನೆಯ ಎರಡು ಓವರ್‌ಗಳಲ್ಲಿ ನಾವು ಅವರ (ಧೋನಿ) ವಿರುದ್ಧ ನಮ್ಮ ಯೋಜನೆಗಳನ್ನು ಕಾರ್ಯಗತಗೊಳಿಸಲಿಲ್ಲ. ಒಂದು ವೇಳೆ ನೀವು ಲೈನ್ ಅಂಡ್ ಲೆಂತ್ ತಪ್ಪಿಸಿದರೆ, ಧೋನಿ ನಿಮಗೆ ದಂಡ ತೆತ್ತುವಂತೆ ಮಾಡುತ್ತಾರೆ. ನಮ್ಮ ಬೌಲರ್ಗಳು ಧೋನಿಗೆ ಬೌಲಿಂಗ್ ಮಾಡುವಾಗ ತಪ್ಪಾದ ಪ್ರದೇಶಕ್ಕೆ ಬೌಲಿಂಗ್ ಮಾಡಿದರು ಎಂದು ಅವರು ತಿಳಿಸಿದ್ದಾರೆ.
ಇದನ್ನು ಓದಿ: ಪಡಿಕ್ಕಲ್, ಕೊಹ್ಲಿ 400+ ರನ್, 500ರ ಗಡಿ ದಾಟಿದ ಮ್ಯಾಕ್ಸ್ವೆಲ್
