ನವದೆಹಲಿ: ಭಾರತ ತಂಡದ ಸ್ಟಾರ್ ವೇಗದ ಬೌಲರ್ ಇಶಾಂತ್ ಶರ್ಮಾ ಹಿಮ್ಮಡಿ ಗಾಯಕ್ಕೆ ತುತ್ತಾಗಿದ್ದು, ನ್ಯೂಜಿಲ್ಯಾಂಡ್ ವಿರುದ್ಧದ ಟೆಸ್ಟ್ ಸರಣಿಯಿಂದ ಹೊರಬಿದ್ದಿದ್ದಾರೆ.
ದೆಹಲಿ ರಣಜಿ ತಂಡದ ಪರ ಆಡುವ ಇಶಾಂತ್ ವಿದರ್ಭ ವಿರುದ್ಧ ಬೌಲಿಂಗ್ ಮಾಡುವ ವೇಳೆ ಹಿಮ್ಮಡಿ ನೋವಿಗೆ ತುತ್ತಾಗಿದ್ದಾರೆ. ಈಗಾಗಲೇ ಚಿಕಿತ್ಸೆ ಪಡೆದಿರುವ ಅವರಿಗೆ ವೈದ್ಯರು 6 ವಾರಗಳ ಕಾಲ ವಿಶ್ರಾಂತಿ ತೆಗೆದುಕೊಳ್ಳಲು ಸಲಹೆ ನೀಡಿರುವ ಹಿನ್ನಲೆ ಫೆಬ್ರವರಿಯಿಂದ ಆರಂಭವಾಗಲಿರುವ ಕಿವೀಸ್ ವಿರುದ್ಧದ ಟೆಸ್ಟ್ ಸರಣಿಯಿಂದ ಹೊರಬಿದ್ದಿದ್ದಾರೆ.
"ಇಶಾಂತ್ ಶರ್ಮಾ ಅವರ ಎಂಆರ್ಐ ವರದಿಯಲ್ಲಿ ಹಿಮ್ಮಡಿಗೆ ಗಂಭೀರ ಗಾಯವಾಗಿರುವುದು ಖಚಿತವಾಗಿದೆ. ಆದ್ದರಿಂದ ವೈದ್ಯರು 6 ವಾರಗಳ ಕಾಲ ವಿಶ್ರಾಂತಿ ಪಡೆದು ಪುನಶ್ಚೇತನಕ್ಕೆ ತೆರಳಲು ಸೂಚಿಸಿದ್ದಾರೆ. ಇದೊಂದು ದೊಡ್ಡ ಆಘಾತ" ಎಂದು ಡಿಡಿಸಿಎ ಪ್ರಧಾನ ಕಾರ್ಯದರ್ಶಿ ವಿನೋದ್ ತಿಹಾರ್ ಮಾಧ್ಯಮಕ್ಕೆ ತಿಳಿಸಿದ್ದಾರೆ.
ಈ ಕುರಿತು ಮತ್ತೋರ್ವ ಅಧಿಕಾರಿ ಮಾತನಾಡಿದ್ದು, "ಇಶಾಂತ್ ಅದೃಷ್ಟಕ್ಕೆ ಮೂಳೆ ಮುರಿದಿಲ್ಲ. ಕೇವಲ ಹಿಮ್ಮಡಿ ತಿರುವಿದೆ, ಅವರೀಗ ನಡೆದಾಡಲು ಸಾಧ್ಯವಿದೆ, ಅವರು ಪುನಶ್ಚೇತನಕ್ಕಾಗಿ ರಾಷ್ಟ್ರೀಯ ಕ್ರಿಕೆಟ್ ಆಕಾಡೆಮಿಗೆ ತೆರಳಲಿದ್ದಾರೆ ಎಂದು ಹೇಳಿದ್ದಾರೆ.
ಇಶಾಂತ್ ಬದಲು ನ್ಯೂಜಿಲ್ಯಾಂಡ್ ಪ್ರವಾಸಕ್ಕೆ ದೆಹಲಿಯವರೇ ಆದ ನವದೀಪ್ ಸೈನಿ ಆಯ್ಕೆಯಾಗುವ ಸಾಧ್ಯತೆಯಿದೆ.
