ಮುಂಬೈ: ಆಸ್ಟ್ರೇಲಿಯಾ ವಿರುದ್ಧದ ಸರಣಿಗೆ ರೋಹಿತ್ ಶರ್ಮಾ ಆಯ್ಕೆಯಾಗದ ವಿಚಾರ ದೊಡ್ಡ ವಿವಾದವಾಗಿದ್ದು, ಕಳೆದ ಒಂದು ವಾರದಿಂದ ಭಾರತ ಕ್ರಿಕೆಟ್ ವಲಯದಲ್ಲಿ ಭಾರಿ ಚರ್ಚೆಯನ್ನುಂಟು ಮಾಡಿದೆ. ಆದರೆ ಹಿಟ್ಮ್ಯಾನ್ ಕೊನೆಯ ಲೀಗ್ ಪಂದ್ಯದ ವೇಳೆ ಕಣಕ್ಕಿಳಿಯುವ ಮೂಲಕ ತಾವೂ ಫಿಟ್ ಎಂದು ತೋರಿಸಿಕೊಟ್ಟಿದ್ದಾರೆ.
ಕಳೆದ ವಾರ ಆಸೀಸ್ ಪ್ರವಾಸಕ್ಕಾಗಿ ಬಿಸಿಸಿಐ 3 ಮಾದರಿಯ ಭಾರತ ತಂಡವನ್ನು ಪ್ರಕಟಿಸಿತ್ತು. ಈ ಮೂರು ತಂಡದಲ್ಲಿ ರೋಹಿತ್ ಶರ್ಮಾ ಹೆಸರನ್ನು ಸೇರಿಸದೆ, ಕನ್ನಡಿಗ ರಾಹುಲ್ರನ್ನು ವೈಟ್ ಬಾಲ್ ಕ್ರಿಕೆಟ್ನ ಉಪನಾಯಕನನ್ನಾಗಿ ಆಯ್ಕೆ ಸಮಿತಿ ನೇಮಕ ಮಾಡಿತ್ತು.
ಈ ನಿರ್ಧಾರವನ್ನು ಮಾಜಿ ಕ್ರಿಕೆಟಿಗರು ಹಾಗೂ ಕ್ರಿಕೆಟ್ ಅಭಿಮಾನಿಗಳು ತೀವ್ರವಾಗಿ ಖಂಡಿಸಿದ್ದರು. ರೋಹಿತ್ ಗಾಯದ ವಿಚಾರವಾಗಿ ಕೆಲವು ವಿವಾದಿತ ಹೇಳಿಕೆಗಳು ಕೂಡ ಕೇಳಿಬಂದಿದ್ದವು. ಆದರೆ ಮಂಗಳವಾರ ನಡೆದ ಕೊನೆಯ ಲೀಗ್ ಪಂದ್ಯದಲ್ಲಿ ರೋಹಿತ್ ಸನ್ರೈಸರ್ಸ್ ವಿರುದ್ಧ ಕಣಕ್ಕಿಳಿದು ತಾವೂ ಫಿಟ್ ಎಂದು ನಿರೂಪಿಸಿದ್ದರು.
ರೋಹಿತ್ ಗಾಯದ ಮೇಲಿನ ವಿವಾದದ ಬಗ್ಗೆ ಮಾತನಾಡಿರುವ ಮಾಜಿ ಟೀಮ್ ಇಂಡಿಯಾ ನಾಯಕ ಗವಾಸ್ಕರ್ ರೋಹಿತ್ ಫಿಟ್ ಆಗಿರುವುದು ಭಾರತ ತಂಡಕ್ಕೆ ಗ್ರೇಟ್ ನ್ಯೂಸ್ ಎಂದು ಹೇಳಿದ್ದಾರೆ.
" ರೋಹಿತ್ ಅವರ ಗಾಯಕ್ಕೆ ಸಂಬಂಧಿಸಿದ ವಿಚಾರ, ವಿವಾದಗಳನ್ನು ಬದಿಗೊತ್ತಿ ನೋಡಿದರೆ, ಅವರು ಫಿಟ್ ಆಗಿದ್ದಾರೆ ಎಂಬುವುದೇ ಭಾರತೀಯ ಕ್ರಿಕೆಟ್ಗೆ ಒಂದು ಉತ್ತಮ ಸುದ್ದಿ ಎಂದು ನಾನು ಹೇಳುತ್ತೇನೆ" ಎಂದು ಗವಾಸ್ಕರ್ ಹೇಳಿದ್ದಾರೆ.
ನೋಡಿ, ಕ್ರಿಕೆಟ್ಗೆ ಮರಳಲು ಆತುರಪಡಿಸಿದರೆ ಮುಂದೆ ಸಮಸ್ಯೆಯಾಗಬಹುದು ಎಂದು ಎಲ್ಲರೂ ಹೇಳುತ್ತಿರುವುದು ರೋಹಿತ್ ಮೇಲಿನ ಕಾಳಜಿಯಾಗಿದೆ. ಏಕೆಂದರೆ ಕೆಲವೊಮ್ಮೆ ಸ್ನಾಯು ಸಂಬಂಧಿ ಗಾಯಗಳು ಮರುಕಳಿಸಬಹುದು. ಆದ್ದರಿಂದ ಅಂತಹ ವಿಷಯಗಳಲ್ಲಿ ಸಮಯ ತೆಗೆದುಕೊಳ್ಳುವುದು ಅರ್ಥಪೂರ್ಣವಾದದ್ದಾಗಿದೆ ಎಂದು ತಿಳಿಸಿದ್ದಾರೆ.
ಆದರೆ, ರೋಹಿತ್ ಫಿಟ್ ಆಗಿದ್ದು, ಆತ್ಮವಿಶ್ವಾಸದಿಂದ ಕಾಣಿಸುತ್ತಿರುವುದು ಇಲ್ಲಿ ಪ್ರಮುಖ ವಿಚಾರವಾಗಿದೆ. ಅವರು ಕೊನೆಯ ಲೀಗ್ ಪಂದ್ಯದಲ್ಲಿ ಬೌಂಡರಿ ಲೈನ್ ಹಾಗೂ 30 ಅಡಿ ಸರ್ಕಲ್ನಲ್ಲೂ ಫೀಲ್ಡಿಂಗ್ ಮಾಡಿದ್ದಾರೆ. ಈ ಮೂಲಕ ಬಿಸಿಸಿಐಗೆ ತಾವೂ ಫಿಟ್ ಆಗಿರುವುದನ್ನ ತೋರಿಸಿಕೊಟ್ಟಿದ್ದಾರೆ. ಆದರೆ ಬಿಸಿಸಿಐ ಏನಾದರೂ ಅವರ ಫಿಟ್ನೆಸ್ ಬಗ್ಗೆ ಮತ್ತೆ ಪರೀಕ್ಷೆ ಮಾಡಲು ಬಯಸಿದರೇ ಅದರಲ್ಲಿ ಯಾವುದೇ ತಪ್ಪಿಲ್ಲ. ಏಕೆಂದರೆ ಅವರು ಸಂಪೂರ್ಣ ಪಿಟ್ ಇದ್ದಾರಾ ಅಥವಾ ಇಲ್ಲವೇ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕಿದೆ ಎಂದು ಗವಾಸ್ಕರ್ ತಿಳಿಸಿದ್ದಾರೆ.
ಒಟ್ಟಿನಲ್ಲಿ ರೋಹಿತ್ ಫಿಟ್ ಆಗಿದ್ದು, ಐಪಿಎಲ್ನಲ್ಲಿ ಅದನ್ನು ನಿರೂಪಿಸಿರುವುದು ಭಾರತ ತಂಡಕ್ಕೆ ಒಂದು ಬಲ ತಂದುಕೊಟ್ಟಿದೆ ಎಂದು ಗವಾಸ್ಕರ್ ಅಭಿಪ್ರಾಯಪಟ್ಟಿದ್ದಾರೆ.
