ನವದೆಹಲಿ: ಅಬುದಾಬಿ ಟಿ10 ಲೀಗ್ ಕ್ರಿಕೆಟ್ ಟೂರ್ನಿಯ ಸಿಂಧ್ ಪ್ರಾಂಚೈಸಿಯ ಮಾಲೀಕರಾಗಿದ್ದ ಭಾರತೀಯ ಮೂಲದ ದೀಪಕ್ ಅಗರವಾಲ್ ಅವರಿಗೆ ಐಸಿಸಿ 2 ವರ್ಷಗಳ ನಿಷೇಧ ಶಿಕ್ಷೆ ವಿಧಿಸಿದೆ.
ಯುಎಇನಲ್ಲಿ ನಡೆದಿದ್ದ ಈ ಟೂರ್ನಿಯಲ್ಲಿ ದೀಪಕ್ ಮೇಲೆ ಭ್ರಷ್ಟಾಚಾರದ ಆರೋಪ ಕೇಳಿಬಂದಿತ್ತು. ಐಸಿಸಿ ಭ್ರಷ್ಟಾಚಾರ ನಿಗ್ರಹ ಸಂಹಿತೆಯನ್ನು ಉಲ್ಲಂಘಿಸಿದ ಆರೋಪವನ್ನು ಅಗರ್ವಾಲ್ ಒಪ್ಪಿಕೊಂಡ ನಂತರ 2 ವರ್ಷಗಳ ನಿಷೇಧ ಹೇರಲಾಗಿದೆ. ಈಗಾಗಲೇ ಅವರು 6 ತಿಂಗಳು ಶಿಕ್ಷೆ ಪೂರೈಸಿದ್ದು ಇನ್ನೂ ಒಂದೂವರೆ ವರ್ಷಗಳ ಕಾಲ ಕ್ರಿಕೆಟ್ನಿಂದ ದೂರ ಉಳಿಯಬೇಕಿದೆ.
ಅಗರ್ವಾಲ್ 2018ರ ಟಿ10 ಲೀಗ್ನಲ್ಲಿ ಭ್ರಷ್ಟಾಚಾರ ಮಾಡಿದ ಆರೋಪ ವಿದ್ದಾಗ ತನಿಖೆಗೆ ವಿಳಂಬ ಮಾಡಿದ್ದರು. ಜೊತೆಗೆ ಸಾಕ್ಷ್ಯ ನಾಶ ಪಡಿಸಿ ತನಿಖೆ ದಿಕ್ಕು ತಪ್ಪಿಸುವ ಪ್ರಯತ್ನ ಮಾಡಿದ್ದರು. ಅವರು ಐಸಿಸಿ ನೀತಿ ಸಂಹಿತೆ 2.4.7 ಉಲ್ಲಂಘನೆ ಮಾಡಿದ ಆರೋಪದ ಮೇಲೆ 2 ವರ್ಷ ಐಸಿಸಿಯ ಯಾವುದೇ ಮಾದರಿಯ ಕ್ರಿಕೆಟ್ ಸಂಬಂಧಿತ ಚಟುವಟಿಕೆಗಳಲ್ಲಿ ಭಾಗವಹಿಸದಂತೆ ನಿಷೇಧಕ್ಕೆ ಒಳಗಾಗಿದ್ದಾರೆ.
