ಕೋಲ್ಕತ್ತಾ : ಐಸಿಸಿ ಅಧ್ಯಕ್ಷ ಹುದ್ದೆಗೆ ಭಾರತೀಯ ಮೂಲದ ಶಶಾಂಕ್ ಮನೋಹರ್ ರಾಜೀನಾಮೆ ನೀಡಿದ್ದಾರೆ. ಆ ಹುದ್ದೆಗೆ ಮತ್ತೊಬ್ಬ ಭಾರತೀಯ ಸೌರವ್ ಗಂಗೂಲಿ ಹೆಸರು ಪ್ರಬಲವಾಗಿ ಕೇಳಿ ಬರುತ್ತಿದೆ. ಆದರೆ, ದಾದಾ ಮಾತ್ರ ನಾನಿನ್ನು ಚಿಕ್ಕವನು, ಐಸಿಸಿ ಹುದ್ದೆಗೇರುವ ಆತುರ ನನಗೆ ಇಲ್ಲ ಎಂದು ತಿಳಿಸಿದ್ದಾರೆ.
ಐಸಿಸಿ ಮುಖ್ಯಸ್ಥ ಹುದ್ದೆ ಕುರಿತು ನನಗೆ ಏನೂ ತಿಳಿದಿಲ್ಲ. ನಾನಿನ್ನು ಚಿಕ್ಕವನು, ಇಷ್ಟು ಬೇಗ ಕ್ರಿಕೆಟ್ನ ದೊಡ್ಡ ಮಟ್ಟದ ಹುದ್ದೆಗೇರುವ ಆತುರವಿಲ್ಲ ಎಂದಿದ್ದಾರೆ. ಪ್ರಸ್ತುತ ಐಸಿಸಿ ನಿಯಮಗಳು ಬದಲಾಗಿವೆ. ಐಸಿಸಿ ಅಧ್ಯಕ್ಷ ಹುದ್ದೆಗೇರಬೇಕಾದ್ರೆ ತನ್ನ ದೇಶದ ಕ್ರಿಕೆಟ್ ಬೋರ್ಡ್ನ ಪದವಿಯಿಂದ ಕೆಳಗಿಳಿಯಬೇಕಾಗಿದೆ. ಸದ್ಯದ ಪರಿಸ್ಥಿತಿಯಲ್ಲಿ ಬಿಸಿಸಿಐ ಬಿಟ್ಟು ಹೋಗುವುದು ಸರಿಯಲ್ಲ ಎಂದು ದಾದಾ ತಿಳಿಸಿದ್ದಾರೆ.
"ಇವೆಲ್ಲವು ಗೌರವಯುತ ಸ್ಥಾನಗಳು. ಜೀವನದಲ್ಲಿ ಒಮ್ಮೆ ಮಾಡುವ ಉದ್ಯೋಗಳು. ನೀವು ಈ ಹಿಂದೆ ಶ್ರೇಷ್ಠ ಆಡಳಿತಗಾರರು ಒಂದು ಅವಧಿಗೆ ಅಧಿಕಾರದಲ್ಲಿದ್ದಿದ್ದನ್ನು ನೋಡಿದ್ದೀರ. ಒಂದು ವೇಳೆ ನಾನು ಐಸಿಸಿ ಅಧ್ಯಕ್ಷರಾಗುವ ಸಮಯ ಬಂದರೆ, ಅದು ಬಿಸಿಸಿಐ ಸದಸ್ಯರ ಒಮ್ಮತದ ತೀರ್ಮಾನವಾಗಿರಲಿದೆ " ಎಂದು ದಾದಾ ಹೇಳಿದ್ದಾರೆ.
ದಕ್ಷಿಣ ಆಫ್ರಿಕಾ ಮಂಡಳಿಯ ನಿರ್ದೇಶಕ ಗ್ರೇಮ್ ಸ್ಮಿತ್, ಇಂಗ್ಲೆಂಡ್ ತಂಡದ ಮಾಜಿ ಕ್ರಿಕೆಟಿಗ ಡೇವಿಡ್ ಗೋವರ್ ಕೂಡ ಐಸಿಸಿ ಅಧ್ಯಕ್ಷರಾಗುವ ಎಲ್ಲಾ ಆರ್ಹತೆಗಳು ಗಂಗೂಲಿ ಅವರಿಗಿವೆ ಎಂದಿದ್ದರು. ಗಂಗೂಲಿ ಮನಸ್ಸು ಮಾಡಿದ್ರೆ ಈಗಾಗಲೇ ಐಸಿಸಿ ಹುದ್ದೆ ಮೇಲೆ ಕಣ್ಣಿಟ್ಟಿರುವ ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿಯ ಮಾಜಿ ಅಧ್ಯಕ್ಷ ಕಾಲಿನ್ ಗ್ರೇವ್ಸ್ ಅವರನ್ನು ಸುಲಭವಾಗಿ ಹಿಂದಿಕ್ಕಬಹುದು ಎಂಬ ಮಾತು ಕೇಳಿ ಬಂದಿದ್ದವು.
