ಪ್ರಸ್ತುತ ದೇಶದಲ್ಲಿ ದಿನದಿಂದ ದಿನಕ್ಕೆ ಕೊರೊನಾ ಹೊಸ ರೂಪಾಂತರ ಓಮಿಕ್ರಾನ್ ಪ್ರಕರಣಗಳಲ್ಲಿ ಏರಿಕೆ ಕಂಡುಬರುತ್ತಿದೆ. ಹೀಗಾಗಿ 2022ರ 15ನೇ ಐಪಿಎಲ್ ಕ್ರಿಕೆಟ್ ಟೂರ್ನಿಗೆ ಓಮಿಕ್ರಾನ್ ಭೀತಿ ಎದುರಾಗಿದ್ದು, ಬಿಸಿಸಿಐ ಮುನ್ನೆಚ್ಚರಿಕಾ ಕ್ರಮಕ್ಕೆ ಮುಂದಾಗಿದೆ. ಹೊಸ ಸೀಸನ್ ಆರಂಭವಾಗುವ ವೇಳೆಗೆ ಪರಿಸ್ಥಿತಿ ಹೀಗೆಯೇ ಮುಂದುವರೆದರೆ ಏನು ಮಾಡಬೇಕೆಂಬುದರ ಬಗ್ಗೆ ಪ್ಲಾನ್-ಬಿ ಕೂಡ ಸಿದ್ಧವಾಗುತ್ತಿದೆಯಂತೆ.
2022ರ ಐಪಿಎಲ್ಗೆ ಒಮಿಕ್ರಾನ್ ಅಡ್ಡಿಯಾದರೆ ಏನೆಲ್ಲ ಕ್ರಮ ಕೈಗೊಳ್ಳಬೇಕೆಂಬುದರ ಬಗ್ಗೆ ಈಗಾಗಲೇ ಬಿಸಿಸಿಐ ವಲಯದಲ್ಲಿ ಚಿಂತನೆ ಆರಂಭಗೊಂಡಿದೆ. ಈ ಬಗ್ಗೆ ಮುಂದಿನ ತಿಂಗಳು ತಂಡದ ಮಾಲೀಕರ ಜೊತೆಗಿನ ಸಭೆಯಲ್ಲಿ ಚರ್ಚೆ ನಡೆಯಲಿದ ಎಂಬ ಮಾಹಿತಿ ಇದೆ.
ಪ್ಲಾನ್-ಬಿ ಏನು?
ಕಳೆದ ಎರಡು ಐಪಿಎಲ್ ಸೀಸನ್‌ಗಳು ಯುಎಇಯಲ್ಲಿ ನಡೆದಿವೆ (2021ರ ಮೊದಲಾರ್ಧ ಹೊರತುಪಡಿಸಿ). 2021ರ ಆವೃತ್ತಿಯನ್ನು ಕೆಲ ಪ್ರೇಕ್ಷಕರ ಸಮ್ಮುಖದಲ್ಲಿ ನಡೆಸಲಾಗಿತ್ತು. ಮುಂದಿನ 2022ರ ಆವೃತ್ತಿಯನ್ನು ತವರಿನಲ್ಲಿಯೇ ನಡೆಸಬೇಕೆಂದು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಆಶಿಸುತ್ತಿದೆ.
ಮುಂದಿನ ಐಪಿಎಲ್ನ ಮೊದಲ ಪಂದ್ಯವು ಏಪ್ರಿಲ್ 2, 2022ರಂದು ಚೆನ್ನೈನಲ್ಲಿ ನಡೆಯಲಿದೆ. ಆದರೆ ಕೊರೊನಾ ಹೆಚ್ಚಾದರೆ ಬಿಸಿಸಿಐ ಪರ್ಯಾಯ ಸ್ಥಳವನ್ನು ಪರಿಗಣಿಸಬೇಕಿದೆ. ಹೀಗಾಗಿ ಈ ಹಿಂದಿನಂತೆ ಯುಎಇಯಲ್ಲಿ ಟೂರ್ನಿ ನಡೆಯುವ ಸಾಧ್ಯತೆ ದಟ್ಟವಾಗಿದೆ.
ಅಲ್ಲದೆ, ಮುಂಬೈ, ಪುಣೆ, ಅಹಮದಾಬಾದ್, ಬರೋಡಾ ಮತ್ತು ರಾಜ್‌ಕೋಟ್‌ನ ಮೈದಾನದಲ್ಲಿ ಮಾತ್ರ ಪಂದ್ಯಗಳನ್ನು ಆಯೋಜಿಸಿ ಟೂರ್ನಿ ನಡೆಸುವ ಪ್ರಸ್ತಾವವೂ ಇದೆ ಎನ್ನಲಾಗುತ್ತಿದೆ.
ಸದ್ಯ ಐಪಿಎಲ್-2022 ಮೆಗಾ ಹರಾಜು ಪ್ರಕ್ರಿಯೆಯು ಬೆಂಗಳೂರಿನಲ್ಲಿ ಫೆ.7, 8ರಂದು ನಡೆಸಲು ಸಿದ್ಧತೆ ನಡೆಸಿದೆ ಎಂದು ಬಿಸಿಸಿಐ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಇದನ್ನೂ ಓದಿ: Icc Test Rankings: ಸ್ಮಿತ್ ಹಿಂದಿಕ್ಕಿ ಅಗ್ರ ಸ್ಥಾನಕ್ಕೇರಿದ ಲಾಬುಶೇನ್.. ರೋಹಿತ್, ಕೊಹ್ಲಿ ಎಷ್ಟರಲ್ಲಿದ್ದಾರೆ?
