ನವದೆಹಲಿ: ಭಾರತ ಬ್ಯಾಡ್ಮಿಂಟನ್ ತಂಡ ಬುಧವಾರ ಕೋವಿಡ್-19 ಪರೀಕ್ಷೆಯಲ್ಲಿ ನೆಗೆಟಿವ್ ಪಡೆದಿದ್ದು, ಮುಂದಿನ ವಾರ ಶುರುವಾಗಲಿರುವ ಯುನೆಕ್ಸ್ ಥಾಯ್ಲೆಂಡ್ ಓಪನ್ಗಾಗಿ ಅಭ್ಯಾಸ ನಡೆಸಲು ಎದುರು ನೋಡುತ್ತಿದೆ.
ಗ್ರೀನ್ ಝೋನ್ ಭಾಗವಾಗಿರುವ ಭಾರತೀಯ ತಂಡ, ಎಲ್ಲಾ ರಾಷ್ಟ್ರಗಳ ಆಟಗಾರರು, ಸ್ಟೇಕ್ ಹೋಲ್ಡರ್ಸ್, ಅಂಪೈರ್ಗಳು, ಲೈನ್ ತೀರ್ಪುಗಾರರು, ಥಾಯ್ಲೆಂಡ್ ಬ್ಯಾಡ್ಮಿಂಟನ್ ಅಸೋಸಿಯೇಷನ್ನ ವೈದ್ಯಕೀಯ ಸಿಬ್ಬಂದಿ, ಟಿವಿ ಪ್ರೊಡಕ್ಷನ್ ಸಿಬ್ಬಂದಿ ಬ್ಯಾಂಕಾಕ್ಗೆ ಆಗಮಿಸಿದ ನಂತರ ಕೋವಿಡ್-19 ಪರೀಕ್ಷೆಗೆ ಒಳಗಾಗಿದ್ದರು.
"ಬ್ಯಾಂಕಾಕ್ಗೆ ಆಗಮಿಸಿ ಗ್ರೀನ್ ಝೋನ್ನಲ್ಲಿ ಕ್ವಾರಂಟೈನ್ ಆಗಿದ್ದ ಎಲ್ಲಾ 824 ಆಟಗಾರರು ಕೋವಿಡ್-19 ಪರೀಕ್ಷೆಯಲ್ಲಿ ನೆಗೆಟಿವ್ ಪಡೆದಿರುವುದರಿಂದ ಟೂರ್ನಿ ಉತ್ತೇಜನ ಪಡೆದುಕೊಂಡಿದೆ. ಇದೀಗ ಎಲ್ಲಾ ಆಟಗಾರರು ಕಟ್ಟುನಿಟ್ಟಾದ ಸುರಕ್ಷತಾ ಪ್ರೋಟೋಕಾಲ್ಗಳ ಅಡಿಯಲ್ಲಿ ತರಬೇತಿಗೆ ಮುಕ್ತರಾಗಿದ್ದಾರೆ" ಎಂದು ಬಿಡಬ್ಲ್ಯೂಎಫ್ ಹೇಳಿಕೆ ಬಿಡುಗಡೆ ಮಾಡಿದೆ.
ಭಾರತೀಯ ಒಲಿಂಪಿಕ್ ಭರವಸೆಯ ಆಟಗಾರರಾದ ಪಿ.ವಿ.ಸಿಂಧು, ಸೈನಾ ನೆಹ್ವಾಲ್ ಮತ್ತು ಸಾಯಿ ಪ್ರಣೀತ್ ತರಬೇತಿಗಾಗಿ ಸಮಯವನ್ನು ಪಡೆದುಕೊಂಡಿದ್ದಾರೆ. ಜೊತೆಗೆ ಎಲ್ಲಾ ಆಟಗಾರರು ಮಧ್ಯಾಹ್ನ ಜಿಮ್ ಸೆಷನ್ ಕೂಡ ಪಡೆದುಕೊಂಡಿದ್ದಾರೆ ಎಂದು ತಿಳಿದು ಬಂದಿದೆ.
"ಭಾರತ ತಂಡ ಇಂದಿನಿಂದ ತಮ್ಮ ತರಬೇತಿಯನ್ನು ಪುನರಾರಂಭಿಸಲಿದೆ. ಜಿಮ್ಗಾಗಿ ಮಧ್ಯಾಹ್ನ 2:30 ಮತ್ತು ತರಬೇತಿ ಸಮಯವನ್ನು ಸಂಜೆ 7ರಿಂದ 8ರವರೆಗೆ ನಿಗದಿ ಮಾಡಲಾಗಿದೆ" ಎಂದು ಬಿಎಐ(ಬ್ಯಾಡ್ಮಿಂಟನ್ ಫಡೆರೇಶನ್ ಆಫ್ ಇಂಡಿಯಾ) ಟ್ವೀಟ್ ಮಾಡಿದೆ.
2021ರಲ್ಲಿ ಬ್ಯಾಡ್ಮಿಂಟನ್ ಮೊದಲ ಟೂರ್ನಿಯಾದ ಯುನೆಕ್ಸ್ ಥಾಯ್ಲೆಂಡ್ ಓಪನ್ ಜನವರಿ 12-17 ಮತ್ತು ಎರಡನೇ ಸೂಪರ್ 1000 ಇವೆಂಟ್ ಆದ ಟೊಯೊಟಾ ಥಾಯ್ಲೆಂಡ್ ಓಪನ್ ಜನವರಿ 19ರಿಂದ 24ರವರೆಗೆ ನಡೆಯಲಿದೆ. ನಂತರ ಜನವರಿ 27ರಿಂದ 31ರವರೆಗೆ 15,00,000 ಡಾಲರ್ ಮೊತ್ತದ ಹೆಚ್ಸಿಬಿಸಿ ಬಿಡಬ್ಲ್ಯೂಫ್ ಟೂರ್ ಫೈನಲ್ ನಡೆಯಲಿದೆ.
ಇದನ್ನು ಓದಿ:ಕೇವಲ ಒಂದು ಗಂಟೆ ಮಾತ್ರ ಅಭ್ಯಾಸ, ಕೋಚ್ ಭೇಟಿಗೆ ಅವಕಾಶವಿಲ್ಲ: BWF ವಿರುದ್ಧ ಸೈನಾ ಆಕ್ರೋಶ
