ಆನ್ಮೈ ಕ್ರಿಯೇಶನ್ಸ್ ಲಾಂಛನದಲ್ಲಿ ತಯಾರಾಗುತ್ತಿರುವ ಬಹುಭಾಷಾ ಚಿತ್ರ 'ಮ್ಯಾಡಿ ಅಲಿಯಾಸ್ ಮಾಧವ'. ತಮಿಳು, ಕನ್ನಡ, ತೆಲುಗು ಮತ್ತು ಹಿಂದಿ ಭಾಷೆಗಳಲ್ಲಿ ಸಿದ್ಧಗೊಂಡಿರುವ ಈ ಸಿನಿಮಾ ಜಾಗತಿಕ ಮಟ್ಟದ ಕಥಾವಸ್ತುವನ್ನು ಒಳಗೊಂಡಿದೆ.
ಚಿಕ್ಕ ವಯಸ್ಸಿಗೆ ತಂದೆಯನ್ನು ಕಳೆದುಕೊಂಡ ಬಡ ಕುಟುಂಬದ ಹುಡುಗ ತಾಯಿಯ ಆಸರೆಯಲ್ಲೇ ಬೆಳೆಯುತ್ತಿರುತ್ತಾನೆ. ಭಾರತ ಮೂಲದ ಅಮೆರಿಕ ವಿಜ್ಞಾನಿಯೊಬ್ಬರು ಮಕ್ಕಳ ವೈಜ್ಞಾನಿಕ ಜ್ಞಾನವನ್ನು ಗುರುತಿಸುವ ಉದ್ದೇಶದಿಂದ ಅಂತಾರಾಷ್ಟ್ರೀಯ ಮಟ್ಟದ ವಿಜ್ಞಾನ ಸ್ಪರ್ಧೆ ಆಯೋಜಿಸಿರುತ್ತಾರೆ. ಆ ಸ್ಪರ್ಧೆಗೆ ಮಾಧವ ಕೂಡಾ ಆಯ್ಕೆಯಾಗಿರುತ್ತಾನೆ. ಯುವ ವಿಜ್ಞಾನಿಗಳೆಲ್ಲಾ ತಮ್ಮ ಆವಿಷ್ಕಾರಗಳನ್ನು ಪರಿಚಯಿಸಲು ಸಿದ್ಧರಾಗಿದ್ದ ಸಂದರ್ಭದಲ್ಲೇ ಅವರ ಸಂಶೋಧನೆಗಳನ್ನು ಕದಿಯುವ ಉದ್ದೇಶದಿಂದ ದುಷ್ಟರ ಗುಂಪೊಂದು ಸಂಚು ರೂಪಿಸಿ ಅವರನ್ನೆಲ್ಲಾ ಅಪಹರಿಸುತ್ತದೆ. ಈ ಹೊತ್ತಿನಲ್ಲಿ ಮಾಧವನ ಜಾಣ್ಮೆ, ಧೈರ್ಯ ಮತ್ತು ಸಮಯ ಪ್ರಜ್ಞೆ ಹೇಗೆ ಸಹಾಯಕ್ಕೆ ಬರುತ್ತದೆ? ಮಾಧವ, ಅಪಹರಣಕಾರರಿಂದ ಎಲ್ಲರನ್ನೂ ರಕ್ಷಿಸುತ್ತಾನಾ ಎಂಬಿತ್ಯಾದಿ ಸಾಹಸಮಯ ಮತ್ತು ಸಕಾರಾತ್ಮಕ ಅಂಶಗಳನ್ನು ಒಳಗೊಂಡ ಕಥೆ ಮ್ಯಾಡಿ ಅಲಿಯಾಸ್ ಮಾಧವ ಚಿತ್ರದ್ದು.
ಅಲ್ಲದೆ ಹೆತ್ತವರೊಂದಿಗೆ ಮಕ್ಕಳ ನಿಜವಾದ ಬಾಂಧವ್ಯ ಹೇಗಿರುತ್ತದೆ ಅನ್ನೋದು ಈ ಚಿತ್ರದಲ್ಲಿ ಅನಾವರಣಗೊಂಡಿದೆ.
ಪ್ರಭು, ಭಾನುಪ್ರಕಾಶ್, ನೇಹಾ ಖಾನ್, ಆದಿತ್ ಅರುಣ್, ರಿಚಾ ಪಲ್ಲೋಡ್, ವಯ್ಯಾಬುರಿ ಸೇರಿದಂತೆ ಸಾಕಷ್ಟು ಹೆಸರಾಂತ ಕಲಾವಿದರು ಈ ಚಿತ್ರದಲ್ಲಿ ಪಾತ್ರ ನಿರ್ವಹಿಸಿದ್ದಾರೆ. ಪ್ರತೀಶ್ ದೀಪು ನಿರ್ದೇಶನದ ಈ ಚಿತ್ರಕ್ಕೆ ಅಜಯ್ ವಿನ್ಸೆಂಟ್ ಮತ್ತು ಆಕಾಶ್ ವಿನ್ಸೆಂಟ್ ಛಾಯಾಗ್ರಹಣ, ತೋಟ ತಾರಿಣಿ ಕಲಾ ನಿರ್ದೇಶನವಿದೆ.
ಈ ಚಿತ್ರಕ್ಕೆ ಅನಿಲ್ ಕುಮಾರ್ ಕಥೆ ಜೊತೆಗೆ ನಿರ್ಮಾಣವನ್ನೂ ಮಾಡಿದ್ದಾರೆ. ಆಗಸ್ಟ್ 15ರ ಸ್ವಾತಂತ್ರ್ಯ ದಿನಾಚರಣೆಯಂದು ʻವೇಷ ಬೇರೆ ಭಾಷೆ ಬೇರೆ ದೇಶವೊಂದೇ ಇಂಡಿಯಾʼ ಹಾಡಿನ ಲಿರಿಕಲ್ ವಿಡಿಯೋ ಲಾಂಚ್ ಮಾಡಲಾಗಿದೆ. ಭಾರತದ ಮಕ್ಕಳು ಮತ್ತು ಮಕ್ಕಳನ್ನು ಹೆತ್ತ ಪೋಷಕರು ನೋಡಲೇಬೇಕಿರುವ ಚಿತ್ರವಾಗಿ ʼಮ್ಯಾಡಿ ಅಲಿಯಾಸ್ ಮಾಧವʼ ಚಿತ್ರವನ್ನು ನಿರ್ಮಾಣ ಮಾಡಿರುವುದಾಗಿ ನಿರ್ಮಾಪಕ ಅನಿಲ್ ಕುಮಾರ್ ತಿಳಿಸಿದ್ದಾರೆ.
