ಖಾಸಗಿ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಸರಿಗಮಪ ಸೀಸನ್ 15 ರ ಫೈನಲ್ ಸ್ಪರ್ಧೆ ನಿನ್ನೆ ನಡೆದಿದ್ದು ಕೀರ್ತನ್ ಹೊಳ್ಳ ಈ ಸೀಸನ್ ವಿನ್ನರ್ ಆಗಿ ಸೂಪರ್ ಸಿಂಗರ್ ಪಟ್ಟ ಗಳಿಸಿದ್ದಾರೆ. ಇನ್ನು ಗ್ರಾಮೀಣ ಪ್ರತಿಭೆ ಹನುಮಂತ ಎರಡನೇ ಸ್ಥಾನ ಪಡೆದಿದ್ದಾರೆ.
ಕಾರ್ಯಕ್ರಮದ ಆರಂಭದಲ್ಲಿ 20 ಸ್ಪರ್ಧಿಗಳಿಂದ ಆರಂಭವಾದ ಈ ಕಾರ್ಯಕ್ರಮದ ಸೆಮಿ ಫೈನಲ್ಗೆ 12 ಸ್ಪರ್ಧಿಗಳು ಆಯ್ಕೆಯಾಗಿದ್ದರು. ಅಲ್ಲಿಂದ ಅಂತಿಮ ಸ್ಪರ್ಧೆಗೆ ಕೀರ್ತನ್ ಹೊಳ್ಳ, ಹನುಮಂತ, ವಿಜೇತ್, ಹೃತ್ವಿಕ್, ನಿಹಾಲ್, ಸಾಧ್ವಿಕ್ ಸೇರಿ 6 ಸ್ಪರ್ಧಿಗಳು ಎಂಟ್ರಿ ಪಡೆದಿದ್ದರು. ಇನ್ನು ಫೈನಲ್ನ ಎರಡನೇ ಹಂತದಲ್ಲಿ ಮೂವರು ಸ್ಪರ್ಧಿಗಳಿದ್ದು ಕೀರ್ತನ್ ಹೊಳ್ಳ ಈ ಸೀಸನ್ನ ವಿನ್ನರ್ ಆಗಿ ಹೊರಹೊಮ್ಮಿದ್ದಾರೆ.
ವಿನ್ನರ್ ಕೀರ್ತನ್ ಹೊಳ್ಳಗೆ ಕಾನ್ಫಿಡೆಂಟ್ ಗ್ರೂಪ್ ವತಿಯಿಂದ 35 ಲಕ್ಷ ರೂಪಾಯಿ ಮೌಲ್ಯದ 3 ಬಿಹೆಚ್ಕೆ ಅಪಾರ್ಟ್ಮೆಂಟ್ ಹಾಗೂ ಜೀ ಕನ್ನಡ ವಾಹಿನಿ ವಿನ್ನರ್ ಟ್ರೋಫಿ ದೊರಕಿದೆ. ರನ್ನರ್ಅಪ್ ಆದ ಹನುಮಂತ ಅವರಿಗೆ 15 ಲಕ್ಷ ರೂ. ಮೌಲ್ಯದ ನಿವೇಶನವನ್ನು ನೀಡಲಾಯಿತು. ಫಲಿತಾಂಶ ಪ್ರಕಟಿಸುವ ಮುನ್ನ ರನ್ನರ್ ಅಪ್ ಗೆ ಒಂದು ಸರ್ಪ್ರೈಸ್ ಕಾದಿರುವುದಾಗಿ ಕಾನ್ಫಿಡೆಂಟ್ ಗ್ರೂಪ್ನ ಮಾಲೀಕರು ಹೇಳಿದ್ದರು.
ಬೆಂಗಳೂರಿನ ಕೊರಮಂಗಲದ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಕಾರ್ಯಕ್ರಮವನ್ನು ಅನುಶ್ರೀ ನಿರೂಪಣೆ ಮಾಡಿದರು. ವಿಜಯ್ ಪ್ರಕಾಶ್, ಅರ್ಜುನ್ ಜನ್ಯ, ರಾಜೇಶ್ ಕೃಷ್ಣನ್ ತೀರ್ಪುಗಾರರಾಗಿದ್ದರೆ ಹಂಸಲೇಖ ಕಾರ್ಯಕ್ರಮದ ಮಹಾಗುರುಗಳಾಗಿ ಪಾಲ್ಗೊಂಡಿದ್ದರು.
