ನವದೆಹಲಿ: ವಿಶ್ವದಲ್ಲಿ ಈ ವರ್ಷದ ಎರಡನೇ ತ್ರೈಮಾಸಿಕದಲ್ಲಿ (ಕ್ಯೂ 2) 175 ಮಿಲಿಯನ್ಗೂ ಅಧಿಕ ಹೊಸ 5ಜಿ ನೆಟ್ವರ್ಕ್ ಬಳಕೆದಾರರು ಸೇರ್ಪಡೆಯಾಗಿದ್ದಾರೆ. ಭಾರತದಲ್ಲಿ ಈ ಅವಧಿಯಲ್ಲಿ ಅತ್ಯಧಿಕ ಏಳು ದಶಲಕ್ಷಕ್ಕೂ ಹೆಚ್ಚು ಹೊಸ 5ಜಿ ಬಳಕೆದಾರರು ಸೇರ್ಪಡೆಯಾಗಿದ್ದಾರೆ ಎಂದು ಹೊಸ ವರದಿ ಮಂಗಳವಾರ ತಿಳಿಸಿದೆ. ಎರಿಕ್ಸನ್ ಮೊಬಿಲಿಟಿ ವರದಿಯ ಪ್ರಕಾರ, ಎರಡನೇ ತ್ರೈಮಾಸಿಕದಲ್ಲಿ ಜಾಗತಿಕವಾಗಿ 5 ಜಿ ಬಳಕೆದಾರರ ಸಂಖ್ಯೆ 1.3 ಬಿಲಿಯನ್ (130 ಕೋಟಿ)ಗೆ ತಲುಪಿದೆ.
ಎರಡನೇ ತ್ರೈಮಾಸಿಕದಲ್ಲಿ 40 ಮಿಲಿಯನ್ ಹೊಸ ಮೊಬೈಲ್ ಬಳಕೆದಾರರು ಸೃಷ್ಟಿಯಾಗಿದ್ದು, ಜಾಗತಿಕವಾಗಿ ಒಟ್ಟಾರೆ ಮೊಬೈಲ್ ಬಳಕೆದಾರರ ಸಂಖ್ಯೆ 8.3 ಬಿಲಿಯನ್ ಆಗಿದೆ. ಹಾಗೆಯೇ ಅನನ್ಯ ಮೊಬೈಲ್ ಬಳಕೆದಾರರ ಸಂಖ್ಯೆ 6.1 ಬಿಲಿಯನ್ ಆಗಿದೆ. ಈ ತ್ರೈಮಾಸಿಕದಲ್ಲಿ ಭಾರತದಲ್ಲಿ ಅತಿ ಹೆಚ್ಚು ಅಂದರೆ 7 ಮಿಲಿಯನ್ಗೂ ಅಧಿಕ ಹೊಸ ಮೊಬೈಲ್ ಬಳಕೆದಾರರು ಸೇರ್ಪಡೆಯಾಗಿದ್ದಾರೆ. ಚೀನಾ 5 ಮಿಲಿಯನ್ ಹಾಗೂ ಅಮೆರಿಕ 3 ಮಿಲಿಯನ್ ಹೊಸ ಮೊಬೈಲ್ ಬಳಕೆದಾರರ ಸೇರ್ಪಡೆಯೊಂದಿಗೆ ನಂತರದ ಸ್ಥಾನಗಳಲ್ಲಿವೆ.
"ವಿಶ್ವದಲ್ಲಿ ಸುಮಾರು 260 ಮೊಬೈಲ್ ಸಂಪರ್ಕ ಕಂಪನಿಗಳು (communications service providers -CSPs) ವಾಣಿಜ್ಯ 5 ಜಿ ಸೇವೆಗಳನ್ನು ಪ್ರಾರಂಭಿಸಿವೆ. ಸುಮಾರು 35 ಸಿಎಸ್ಪಿಗಳು ಸ್ವತಂತ್ರ 5 ಜಿ (ಎಸ್ಎ) ನೆಟ್ವರ್ಕ್ಗಳನ್ನು ಪ್ರಾರಂಭಿಸಿವೆ" ಎಂದು ವರದಿ ತಿಳಿಸಿದೆ. ಎರಡನೇ ತ್ರೈಮಾಸಿಕದಲ್ಲಿ ಜಾಗತಿಕ ಮೊಬೈಲ್ ಚಂದಾದಾರಿಕೆಯ ಬೆಳವಣಿಗೆ ಶೇಕಡಾ 105 ರಷ್ಟಿತ್ತು.
ಹಾಗೆಯೇ ಮೊಬೈಲ್ ಬ್ರಾಡ್ಬ್ಯಾಂಡ್ ಚಂದಾದಾರರ ಸಂಖ್ಯೆ ತ್ರೈಮಾಸಿಕದಲ್ಲಿ ಸುಮಾರು 100 ಮಿಲಿಯನ್ನಷ್ಟು ಏರಿಕೆಯಾಗಿ, ಒಟ್ಟು 7.4 ಬಿಲಿಯನ್ಗೆ ತಲುಪಿದೆ. ಒಟ್ಟಾರೆ ಮೊಬೈಲ್ ಚಂದಾದಾರಿಕೆಗಳ ಪೈಕಿ ಮೊಬೈಲ್ ಬ್ರಾಡ್ಬ್ಯಾಂಡ್ ಪ್ರಮಾಣ ಶೇಕಡಾ 88 ರಷ್ಟಿದೆ ಎಂದು ಸಂಶೋಧನೆಗಳು ತೋರಿಸಿವೆ. 2022 ಮತ್ತು 2023 ರ ಎರಡನೇ ತ್ರೈಮಾಸಿಕದ ನಡುವೆ ಮೊಬೈಲ್ ಡೇಟಾ ದಟ್ಟಣೆ ಶೇಕಡಾ 33 ರಷ್ಟು ಹೆಚ್ಚಾಗಿದೆ. 4 ಜಿ ಚಂದಾದಾರಿಕೆಗಳು 11 ಮಿಲಿಯನ್ನಷ್ಟು ಏರಿಕೆಯಾಗಿ ಒಟ್ಟು 5.2 ಬಿಲಿಯನ್ಗೆ ತಲುಪಿವೆ. ಒಟ್ಟು ಮೊಬೈಲ್ ಬಳಕೆದಾರರ ಪೈಕಿ ಶೇ 62 ರಷ್ಟು ಜನ 4ಜಿ ನೆಟ್ವರ್ಕ್ ಬಳಸುತ್ತಿದ್ದಾರೆ.
5 ಜಿ ಎಂಬುದು ವೈರ್ಲೆಸ್ ಸೆಲ್ಯುಲಾರ್ ತಂತ್ರಜ್ಞಾನದ ಐದನೇ ಪೀಳಿಗೆಯಾಗಿದ್ದು, ಅತ್ಯಧಿಕ ಅಪ್ಲೋಡ್ ಮತ್ತು ಡೌನ್ಲೋಡ್ ವೇಗ, ಹೆಚ್ಚು ಸ್ಥಿರವಾದ ಸಂಪರ್ಕ ಮತ್ತು ಹಿಂದಿನ ನೆಟ್ವರ್ಕ್ಗಳಿಗಿಂತ ಸುಧಾರಿತ ಸಾಮರ್ಥ್ಯವನ್ನು ಹೊಂದಿದೆ. ಪ್ರಸ್ತುತ ಜನಪ್ರಿಯವಾಗಿರುವ 4 ಜಿ ನೆಟ್ವರ್ಕ್ಗಿಂತ 5 ಜಿ ಹೆಚ್ಚು ವೇಗವಾಗಿದೆ ಮತ್ತು ವಿಶ್ವಾಸಾರ್ಹವಾಗಿದೆ. ಹೆಚ್ಚಿನ ವೇಗ, ಉತ್ತಮ ವಿಶ್ವಾಸಾರ್ಹತೆ ಮತ್ತು ಅತಿ ಕಡಿಮೆ ವಿಳಂಬದೊಂದಿಗೆ, 5 ಜಿ ತಂತ್ರಜ್ಞಾನವು ಮೊಬೈಲ್ ಬಳಕೆಯ ವಿಚಾರದಲ್ಲಿ ಹೊಸ ಕ್ರಾಂತಿಯನ್ನೇ ಉಂಟು ಮಾಡಿದೆ. 5 ಜಿ ತಂತ್ರಜ್ಞಾನವು ಇಂದಿನ ಬಹುತೇಕ ಎಲ್ಲ ಉದ್ಯಮಗಳ ಮೇಲೆ ಪರಿಣಾಮ ಬೀರುತ್ತಿದೆ.
ಇದನ್ನೂ ಓದಿ : ಜುಲೈನಲ್ಲಿ 72 ಲಕ್ಷ ಖಾತೆಗಳನ್ನು ನಿರ್ಬಂಧಿಸಿದ ವಾಟ್ಸ್ಆ್ಯಪ್
