ಸ್ಯಾನ್ ಫ್ರಾನ್ಸಿಸ್ಕೋ: ವಾಟ್ಸ್ಆ್ಯಪ್ನಲ್ಲೂ ಇನ್ನು ಮುಂದೆ ಜಾಹೀರಾತುಗಳು ಕಾಣಿಸುವ ಸಾಧ್ಯತೆಗಳಿವೆ. ಸ್ಟೋರೀಸ್ ಮತ್ತು ಚಾನೆಲ್ಗಳಲ್ಲಿ ಜಾಹೀರಾತುಗಳು ಕಾಣಿಸಬಹುದು, ಆದರೆ ಮೇನ್ ಬಾಕ್ಸ್ನಲ್ಲಿ ಯಾವುದೇ ಜಾಹೀರಾತು ತೋರಿಸುವುದಿಲ್ಲ ಎಂದು ವಾಟ್ಸ್ಆ್ಯಪ್ ಮುಖ್ಯಸ್ಥ ವಿಲ್ ಕ್ಯಾಥ್ಕಾರ್ಟ್ ಹೇಳಿದ್ದಾರೆ. ಬ್ರೆಜಿಲ್ ಮಾಧ್ಯಮಕ್ಕೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ವಿಲ್ ಕ್ಯಾಥ್ಕಾರ್ಟ್, ಕಂಪನಿಯು ನಿಮ್ಮ ಮುಖ್ಯ ಚಾಟ್ನಲ್ಲಿ ಯಾವುದೇ ಜಾಹೀರಾತುಗಳನ್ನು ತೋರಿಸಲು ಯೋಜಿಸುತ್ತಿಲ್ಲ, ಆದರೆ ಇತರ ಸ್ಥಳಗಳಲ್ಲಿ ಜಾಹೀರಾತುಗಳನ್ನು ತೋರಿಸಬಹುದು ಎಂದು ಹೇಳಿದ್ದಾರೆ.
ಕಂಪನಿಯು ಪ್ರಸ್ತುತ ಯಾವುದೇ ದೇಶದಲ್ಲಿ ಸ್ಟೇಟಸ್ ಜಾಹೀರಾತು ವೈಶಿಷ್ಟ್ಯವನ್ನು ಟೆಸ್ಟ್ ಮಾಡುತ್ತಿಲ್ಲ ಎಂದು ಮೆಟಾ ವಕ್ತಾರರು ತಿಳಿಸಿದ್ದಾರೆ. ಮಾರ್ಕ್ ಜುಕರ್ಬರ್ಗ್ ನೇತೃತ್ವದ ಕಂಪನಿಯಾಗಿರುವ ವಾಟ್ಸ್ಆ್ಯಪ್ ತನ್ನಲ್ಲಿ ಜಾಹೀರಾತು ತೋರಿಸುವ ವರದಿಗಳನ್ನು ಸೆಪ್ಟೆಂಬರ್ನಲ್ಲಿ ನಿರಾಕರಿಸಿತ್ತು. ವಾಟ್ಸ್ಆ್ಯಪ್ ಜಾಗತಿಕವಾಗಿ 2 ಬಿಲಿಯನ್ ಬಳಕೆದಾರರನ್ನು ಹೊಂದಿದೆ. ಇದರಲ್ಲಿ ಭಾರತದಲ್ಲೇ 500 ದಶಲಕ್ಷಕ್ಕೂ ಹೆಚ್ಚು ಬಳಕೆದಾರರಿದ್ದಾರೆ.
ವಾಟ್ಸ್ಆ್ಯಪ್ ಈ ಹಿಂದೆ ಸ್ಟೇಟಸ್ನಲ್ಲಿ ಜಾಹೀರಾತುಗಳನ್ನು ಪ್ರದರ್ಶಿಸುವ ವೈಶಿಷ್ಟ್ಯವನ್ನು ಸಿದ್ಧಪಡಿಸಿತ್ತು. ಆದರೆ ಅದನ್ನು ಜಾರಿ ಮಾಡಲಿಲ್ಲ. ಈಗ ಕೊನೆಗೂ ವಾಟ್ಸ್ಆ್ಯಪ್ ಮುಖ್ಯಸ್ಥರೇ ಇದರ ಬಗ್ಗೆ ಮಾತನಾಡಿರುವುದರಿಂದ ಜಾಹೀರಾತುಗಳು ಆರಂಭವಾಗುವ ಸಾಧ್ಯತೆಗಳು ದಟ್ಟವಾಗಿವೆ. ಫೇಸ್ಬುಕ್ ಸಂಸ್ಥಾಪಕ ಜುಕರ್ಬರ್ಗ್ 2014 ರಲ್ಲಿ ವಾಟ್ಸ್ಆ್ಯಪ್ ಅನ್ನು 19 ಬಿಲಿಯನ್ ಡಾಲರ್ಗೆ ಖರೀದಿಸಿದ್ದರು.
2012 ರಲ್ಲಿ ಫೇಸ್ಬುಕ್ ಸುಮಾರು 1 ಬಿಲಿಯನ್ ಡಾಲರ್ ನೀಡಿ ಇನ್ಸ್ಟಾಗ್ರಾಮ್ ಅನ್ನು ಖರೀದಿಸಿತ್ತು. ಇನ್ಸ್ಟಾಗ್ರಾಮ್ನಲ್ಲಿ ಜಾಹೀರಾತುಗಳನ್ನು ತೋರಿಸಲಾಗುತ್ತದೆ. ಆದರೆ ಈವರೆಗೂ ವಾಟ್ಸ್ಆ್ಯಪ್ ಮಾತ್ರ ಜಾಹೀರಾತುಗಳಿಲ್ಲದೆಯೇ ಮುಂದುವರೆದಿದೆ. ವಾಟ್ಸ್ಆ್ಯಪ್ ಇದು ಉಚಿತವಾಗಿ ಡೌನ್ಲೋಡ್ ಮಾಡಿ ಸ್ಮಾರ್ಟ್ಫೋನ್ಗಳಲ್ಲಿ ಬಳಸುವ ತ್ವರಿತ ಸಂದೇಶ ಕಳುಹಿಸುವ ಅಪ್ಲಿಕೇಶನ್ ಆಗಿದೆ. ಇದನ್ನು ಬಳಸಲು ನಿಮಗೆ ಸಿಮ್ ಕಾರ್ಡ್, ಇಂಟರ್ನೆಟ್ ಸಂಪರ್ಕ ಮತ್ತು ಫೋನ್ ಸಂಖ್ಯೆಯೊಂದಿಗೆ ಹೊಂದಿಕೆಯಾಗುವ ಸ್ಮಾರ್ಟ್ಫೋನ್ ಅಥವಾ ಟ್ಯಾಬ್ಲೆಟ್ ಬೇಕಾಗುತ್ತದೆ.
ಇಂಟರ್ನೆಟ್ ಸಂಪರ್ಕದ ಮೂಲಕ ನೀವು ಇದರಲ್ಲಿ ಚಿತ್ರಗಳು, ವೀಡಿಯೊಗಳ ಮತ್ತು ಡಾಕ್ಯುಮೆಂಟ್ಗಳನ್ನು ಕಳುಹಿಸಬಹುದು. ವಾಟ್ಸ್ಆ್ಯಪ್ ಬಳಕೆದಾರರು ತಮ್ಮ ಲೋಕೆಶನ್ ಮಾಹಿತಿಯನ್ನು ನೈಜ ಸಮಯದಲ್ಲಿ ಸಂದೇಶಗಳ ಮೂಲಕ ಹಂಚಿಕೊಳ್ಳಬಹುದು. ಗ್ರೂಪ್ ಚಾಟ್ಗಳಲ್ಲಿ ಬಹಳಷ್ಟು ಜನರಿಗೆ ತ್ವರಿತವಾಗಿ ಸಂದೇಶಗಳನ್ನು ಕಳುಹಿಸಬಹುದು. ಮಾಜಿ ಯಾಹೂ ಉದ್ಯೋಗಿಗಳು 2009 ರಲ್ಲಿ ಸ್ಥಾಪಿಸಿದ ಇದು ಸಣ್ಣ ಸ್ಟಾರ್ಟ್ಅಪ್ ಆಗಿ ಪ್ರಾರಂಭವಾಗಿ ಕೆಲವೇ ತಿಂಗಳುಗಳಲ್ಲಿ 2,50,000 ಬಳಕೆದಾರರನ್ನು ಪಡೆದುಕೊಂಡಿತ್ತು.
ಇದನ್ನೂ ಓದಿ: 24 ಗಂಟೆಗಳಲ್ಲಿ ಡೀಪ್ಫೇಕ್ ಕಂಟೆಂಟ್ ತೆಗೆದುಹಾಕಿ; ಸಾಮಾಜಿಕ ಮಾಧ್ಯಮಗಳಿಗೆ ಸರ್ಕಾರದ ನಿರ್ದೇಶನ
