ನ್ಯೂಯಾರ್ಕ್ (ಯುಎಸ್) : ಅಫ್ಘಾನಿಸ್ತಾನದಲ್ಲಿ ತಾಲಿಬಾನಿಗಳ ಅಟ್ಟಹಾಸ ಮುಂದುವರೆದಿದೆ. ಈಗಾಗಲೇ ಕಾಬೂಲ್ನಿಂದ ಹಿಡಿದು ಎಲ್ಲಾ ಸರ್ಕಾರಿ ಕಚೇರಿಗಳು ಸಹ ಅವರ ಹಿಡಿತದಲ್ಲಿದ್ದು, ಪಾರುಪತ್ಯ ಮೆರೆಯುತ್ತಿದ್ದಾರೆ. ಆದರೆ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತಾಲಿಬಾನ್ಗೆ ಸಿಗುತ್ತಿದ್ದ ಸೌಲಭ್ಯಗಳಿಗೆ ಕತ್ತರಿ ಬಿದ್ದಿದೆ. ಐಎಂಎಫ್ ಸಹ ಆರ್ಥಿಕ ನೆರವು ನೀಡುವುದಿಲ್ಲ ಎಂದು ಘೋಷಿಸಿದೆ.
ಈ ನಡುವೆ ಅಮೆರಿಕದ ಕೇಂದ್ರೀಯ ಬ್ಯಾಂಕ್ನಲ್ಲಿ ಅಘ್ಫನ್ ಸರ್ಕಾರ ಹೊಂದಿದ್ದ ಸ್ವತ್ತುಗಳು ತಾಲಿಬಾನ್ಗೆ ಲಭ್ಯವಾಗುವುದಿಲ್ಲ ಎಂದು ಬೈಡನ್ ಸರ್ಕಾರದ ಅಧಿಕಾರಿಯೊಬ್ಬರು ಬಿಬಿಸಿ ಮಾಧ್ಯಮಕ್ಕೆ ಸ್ಪಷ್ಟಪಡಿಸಿದ್ದಾರೆ. ಡಾ. ಅಫ್ಘಾನಿಸ್ತಾನ ಬ್ಯಾಂಕ್ (DAB) ಸುಮಾರು 9 ಬಿಲಿಯನ್ ಡಾಲರ್ ನಷ್ಟು ಮೀಸಲುಗಳನ್ನು ಹೊಂದಿದೆ, ಅದರಲ್ಲಿ ಹೆಚ್ಚಿನವು ಅಮೆರಿಕದಲ್ಲಿವೆ.
ಆದರೆ, ಡಾಲರ್ ಬದಲಾವಣೆ, ಅಂತಾರಾಷ್ಟ್ರೀಯ ಸಾಲ ಮತ್ತು ಅನುದಾನ ಸಹ ತಾಲಿಬಾನ್ಗೆ ಸಿಗುವುದು ಅನುಮಾನ ಎಂದಿದ್ದಾರೆ. ಅಲ್ಲದೆ ಅಫ್ಘನ್ ಆರ್ಥಿಕತೆಗೆ ಮೂಗುದಾರ ಹಾಕಬೇಕಿದೆ ಎಂದು ಡಾ. ಅಫ್ಘಾನಿಸ್ತಾನ ಬ್ಯಾಂಕ್ನ ಮಾಜಿ ಗವರ್ನರ್ ಎಚ್ಚರಿಸಿದ್ದಾರೆ.
ತಾಲಿಬಾನಿಗಳು ಅಫ್ಘಾನಿಸ್ತಾನದಲ್ಲಿ ಹಿಡಿತ ಸಾಧಿಸಿದ ಬಳಿಕ ಸರ್ಕಾರದ ಸಚಿವರು ಪಲಾಯಾನ ಮಾಡಿದ್ದಾರೆ. ಈ ವೇಳೆ ದೇಶ ತೊರೆದ ಅಫ್ಘನ್ನ ಮಾಜಿ ಕೈಗಾರಿಕಾ ಮತ್ತು ವಾಣಿಜ್ಯ ಸಚಿವ ಅಜ್ಮಲ್ ಅಹ್ಮಾಡಿ, ಡಾ ಅಫ್ಘಾನಿಸ್ತಾನ ಬ್ಯಾಂಕ್ನಲ್ಲಿ ಸುಮಾರು 9 ಬಿಲಿಯನ್ ಮೀಸಲು ಹಣವಿದೆ ಎಂದಿದ್ದರು.
ಇದು ತಾಲಿಬಾನ್ಗೆ ನೀಡುವುದು ಅಂತಾರಾಷ್ಟ್ರೀಯ ನಿಯಮದಲ್ಲಿಲ್ಲ. ಅಲ್ಲದೆ ಇಂತಹ ಹಣವನ್ನು ಬಹುತೇಕ ತಡೆ ಹಿಡಿಯಲಾಗುತ್ತದೆ. ಆದರೆ, ತಾಲಿಬಾನ್ಗೆ ಶೇ.0.1-0.2ರಷ್ಟು ಮಾತ್ರ ಹಣ ಮಾತ್ರ ಬಳಕೆಗೆ ನೀಡಬಹುದಿದೆ ಎಂದಿದ್ದಾರೆ. ಯುಎಸ್ ಅನುಮೋದನೆಯಿಲ್ಲದೆ, ಯಾವುದೇ ದಾನಿಗಳು ತಾಲಿಬಾನ್ ಸರ್ಕಾರವನ್ನು ಬೆಂಬಲಿಸುವ ಸಾಧ್ಯತೆಯೂ ಇಲ್ಲ ಎಂದಿದ್ದಾರೆ. ಈ ನಡುವೆ ಅಂತಾರಾಷ್ಟ್ರೀಯ ಹಣಕಾಸು ನಿಧಿಯು ಡಿಎಬಿಗೆ ನೀಡಲು ಇಚ್ಛಿಸಿದ್ದ 450 ಮಿಲಿಯನ್ ಸಾಲವನ್ನು ನೀಡದಿರಲು ಈಗಾಗಲೇ ನಿರ್ಧರಿಸಿದೆ.
ಓದಿ: ಭಾರತೀಯ ಕಾನ್ಸುಲೇಟ್ ಕಚೇರಿಗಳಿಗೆ ನುಗ್ಗಿ ಕಾರುಗಳನ್ನ ಹೊತ್ತೊಯ್ದ ತಾಲಿಬಾನ್
