ಸಿನಿಮಾಗಳಲ್ಲಿ ಲವ್ ಸ್ಟೋರಿ ಜೊತೆಗೆ ಜೀವನದ ಫಿಲಾಸಫಿ ಹೇಳುವ ನಿರ್ದೇಶಕ ಯೋಗರಾಜ್ ಭಟ್. ಈಗ ಗಣೇಶ್, ದಿಗಂತ್ ಹಾಗು ಪವನ್ ಕುಮಾರ್ ಮುಖ್ಯ ಭೂಮಿಕೆಯಲ್ಲಿರುವ ಗಾಳಿಪಟ-2 ಚಿತ್ರ ನಿರ್ದೇಶಿಸಿರುವ ಭಟ್ರು ಈಟಿವಿ ಭಾರತ ಜೊತೆ ಸವಿಸ್ತಾರವಾಗಿ ಮಾತನಾಡಿದರು.
ಯೋಗರಾಜ್ ಭಟ್ ಅವರಿಗೆ ಗಾಳಿಪಟ ಅಂದ್ರೆ ನೆನಪಾಗೋದು ಸ್ವತಂತ್ರ ಅಂತೆ. ಗಾಳಿಪಟ -1 ಸಿನಿಮಾ ಮಾಡಿದಾಗ್ಲೇ ಪಾರ್ಟ್-2 ಮಾಡುವ ಐಡಿಯಾವೂ ಬಂದಿತ್ತು. ಆ ಮಟ್ಟಿಗೆ ಕಥೆ ಬರೆದು ಕಂಟೆಂಟ್ ರೆಡಿ ಮಾಡಿಕೊಂಡಿದ್ದೆವು. ಗಾಳಿಪಟ ಅಂತಾ ಟೈಟಲ್ ಕೊಟ್ಟಿದ್ದು ಖ್ಯಾತ ಸಾಹಿತಿ ಜಯಂತ್ ಕಾಯ್ಕಿಣಿ ಎಂದು ಭಟ್ರು ಹೇಳಿದರು.
ಗಾಳಿಪಟ ಅಂದಾಕ್ಷಣ ಎಲ್ಲರಿಗೂ ಬಾಲ್ಯ ನೆನಪಾಗುತ್ತೆ. ಹೀಗಾಗಿ ಗಾಳಿಪಟ -1 ಸಿನಿಮಾ ಆ ಮಟ್ಟದ ಸಕ್ಸಸ್ ಆಗಲು ಜನರೇ ಕಾರಣ. ಚಿತ್ರದ ಹಾಡುಗಳು, ಡೈಲಾಗ್ ಫೇಮಸ್ ಆಗಿದ್ದು ಗಾಳಿಪಟ ಜನರ ಸಿನಿಮಾ ಆಯಿತು ಎಂದು ಯೋಗರಾಜ್ ಭಟ್ ಹೇಳಿದರು.
ಟೆನ್ಶನ್ ಜೊತೆಗೆ ಭಯ ಇದೆ: ಗಾಳಿಪಟ -2 ಸಿನಿಮಾದ ಕಥೆಯೂ ಇಂಟ್ರಸ್ಟಿಂಗ್ ಆಗಿದೆ. ಗಾಳಿಪಟ -1 ಸಿನಿಮಾ ಆಗಿ ಮೂರು ವರ್ಷದಲ್ಲಿ ಈ ಸಿನಿಮಾ ಕಥೆ ಮಾಡಲು ಯೋಚಿಸಿದ್ದೆ. ಆದರೆ, ಆಗ ಕಥೆ ಶುರುವಾಗಲಿಲ್ಲ. ಕೊನೆಗೆ ಗಾಳಿಪಟ -2 ಚಿತ್ರದ ಕಥೆ ಶುರುವಾಗಿದ್ದು ಮುಗುಳು ನಗೆ ಸಿನಿಮಾ ಟೈಮಲ್ಲಿ. ಈ ಸಿನಿಮಾ ತುಂಬಾ ಕೆಲಸ ಮಾಡಿಸಿಕೊಳ್ತು. ಅಷ್ಟು ದೊಡ್ಡ ಮಟ್ಟದಲ್ಲಿ ಸಕ್ಸಸ್ ಆಗಿರೋ ಗಾಳಿಪಟ -1 ಸಿನಿಮಾದಿಂದ ಈ ಚಿತ್ರದ ಮೇಲೂ ಸಾಕಷ್ಟು ನಿರೀಕ್ಷೆ ಇದೆ. ಬಿಡುಗಡೆ ಟೆನ್ಶನ್ ಜೊತೆಗೆ ಸಿನಿಮಾ ಬಗ್ಗೆ ಸ್ವಲ್ಪ ಭಯನೂ ಇದೆ ಎನ್ನುತ್ತಾರೆ ಅವರು.
ಇದು ದೊಡ್ಡ ಮಟ್ಟದಲ್ಲಿ ಹಾರುತ್ತೆ: ಚಿತ್ರದ ಟ್ರೈಲರ್ಗೆ ದೊಡ್ಡ ಮಟ್ಟದಲ್ಲಿ ರೀಚ್ ಸಿಕ್ಕಿದೆ. ಜನ ಮೆಚ್ಚಿಕೊಂಡಿದ್ದಾರೆ. ಅಂದಿನ ಗಾಳಿಪಟಕ್ಕೂ ಇಂದಿನ ಗಾಳಿಪಟ -2 ಫ್ಲೇವರ್ ಬೇರೆ. ಈ ಸಿನಿಮಾ ಗಾಳಿಪಟ -1ಕ್ಕಿಂತ ಇದು ದೊಡ್ಡ ಮಟ್ಟದಲ್ಲಿ ಹಾರುತ್ತೆ ಎಂಬ ವಿಶ್ವಾಸ ಯೋಗರಾಜ್ ಭಟ್ ಅವರದ್ದು.
ಗಣೇಶ್ ಕಾಂಬಿನೇಷನ್ ಬಗ್ಗೆ ಹೇಳೋದಂದ್ರೆ, ಆತ ಅಸಾಮಾನ್ಯ ಪ್ರತಿಭೆ. ಯಾವ ಮಟ್ಟಿಗೆ ಅಂದ್ರೆ ಗಣೇಶ್ಗೆ ಆನೆಗೆ ಇರುವಂತಹ ನೆನಪಿನ ಶಕ್ತಿ ಇದೆ. ಸ್ನೇಹವನ್ನು ಕಟ್ಟಿಕೊಂಡು ಸ್ಕ್ರೀನ್ನಲ್ಲಿ ಮ್ಯಾಜಿಕ್ ಮಾಡ್ತಾನೆ. ನಾನು ಗಣೇಶನ ಗಣಪ ಅಂತಾ ಕರೆಯುತ್ತೇನೆ. ನಮ್ಮ ಮಧ್ಯೆ ದೊಡ್ಡ ಮಟ್ಟದಲ್ಲಿ ಜಗಳ ಇರುತ್ತೆ. ನಮ್ಮ ದೋಸ್ತಿ ತುಂಬಾ ಶುದ್ಧ ಎಂದು ಹೇಳಿದರು.
ಎಲ್ಲರ ಪಾತ್ರಗಳೂ ವಿಭಿನ್ನ: ಗಾಳಿಪಟ -2 ಸಿನಿಮಾದಲ್ಲಿ ಗಣೇಶ್ ಜೊತೆಗೆ ದೂದ್ ಪೇಡಾ ದಿಗಂತ್, ಪವನ್ ಕುಮಾರ್ ಪಾತ್ರಗಳು ಕೂಡ ವಿಭಿನ್ನವಾಗಿವೆ. ಗುರು ಶಿಷ್ಯರಂದ್ರೆ ಏನು?. ಅಮ್ಮ-ಮಗ, ಅಪ್ಪ-ಮಗನ ಸಂಬಂಧ ಏನು ಅನ್ನೋದನ್ನು ಸಿನಿಮಾ ಒಳಗೊಂಡಿದೆ. ಸಿನಿಮಾವನ್ನು ನಿರ್ಮಾಪಕ ಎಂ.ರಮೇಶ್ ರೆಡ್ಡಿ ಮಾಡಿದ್ದಾರೆ. ಸ್ವಲ್ಪ ವ್ಯಾಪಾರ ಕೂಡ ಆಗಿದೆ. ನಾನು ಒಬ್ಬ ಟೆಕ್ನಿಷಿಯನ್ ಆಗಿದ್ದರೂ, ಸಾಮಾನ್ಯ ಪ್ರೇಕ್ಷಕನಂತೆ ಸಿನಿಮಾ ನೋಡಲು ಕಾತುರನಾಗಿದ್ದೇನೆ ಎಂದು ಭಟ್ರು ತಿಳಿಸಿದರು.
ಇದನ್ನೂ ಓದಿ: ನಾಳೆ ಗಾಳಿಪಟ 2 ಬಿಡುಗಡೆ: ನಟ ಗಣೇಶ್ ಹೇಳಿದ್ದೇನು?
