ಬಾಲಿವುಡ್ ಸೂಪರ್ ಸ್ಟಾರ್ ಶಾರುಖ್ ಖಾನ್ ಅಭಿನಯದ ಪಠಾಣ್ ಚಿತ್ರ ಚಿತ್ರಮಂದಿರಗಳಲ್ಲಿ ಯಶಸ್ಸಿನ ಧೂಳೆಬ್ಬಿಸುತ್ತಿದೆ. ಬಾಕ್ಸ್ ಆಫೀಸ್ನಲ್ಲಿ ಮೂರೇ ದಿನಗಳಲ್ಲಿ 300 ಕೋಟಿ ರೂಪಾಯಿ ಗಳಿಕೆ ಮಾಡಿ ದಾಖಲೆ ಬರೆದ ಚಿತ್ರವಿದು. ಚಿತ್ರಮಂದಿರಗಳು ಪ್ರೇಕ್ಷಕರಿಂದ ಭರ್ತಿಯಾಗುತ್ತಿದ್ದು ಥಿಯೇಟರ್ ಮಾಲೀಕರು ಉತ್ಸವ ಮಾಡುತ್ತಿದ್ದಾರೆ. ಮುಂಬೈನ ಫೇಮಸ್ ಮರಾಠ ಮಂದಿರ್ ಥಿಯೇಟರ್ನಲ್ಲಿ ಪಠಾಣ್ ಜೊತೆಗೆ ಶಾರುಖ್ ಸೂಪರ್ ಹಿಟ್ ಮೂವಿ ದಿಲ್ವಾಲೆ ದುಲ್ಹನಿಯಾ ಲೇ ಜಾಯೇಂಗೆ ಅನ್ನು ಏಕಕಾಲದಲ್ಲಿ ಪ್ರದರ್ಶಿಸಲಾಗುತ್ತಿದೆ.
ಮನೋಜ್ ದೇಸಾಯಿ ಸಂತಸ: ಮರಾಠ ಮಂದಿರ್ ಚಿತ್ರಮಂದಿರದ ಕಾರ್ಯನಿರ್ವಾಹಕ ನಿರ್ದೇಶಕ, G7 ಮಲ್ಟಿಪ್ಲೆಕ್ಸ್‌ನ ಕಾರ್ಯನಿರ್ವಾಹಕ ನಿರ್ದೇಶಕ ಮನೋಜ್ ದೇಸಾಯಿ ಮಾತನಾಡಿ, "ಇಂತಹ ಉತ್ಸಾಹವು ಬಹಳ ವರ್ಷಗಳ ನಂತರ ಕಂಡುಬಂದಿದೆ" ಎಂದು ಹರ್ಷ ವ್ಯಕ್ತಪಡಿಸಿದರು.
ಒಂದೇ ಚಿತ್ರಮಂದಿರದಲ್ಲಿ ಶಾರುಖ್ ಸಿನಿಮಾಗಳು: ಜಿ7 ಮಲ್ಟಿಪ್ಲೆಕ್ಸ್‌ನಲ್ಲಿ 1000-1000 ಆಸನ ಸಾಮರ್ಥ್ಯದ 2 ಥಿಯೇಟರ್‌ಗಳಲ್ಲಿ ಚಿತ್ರ ಪ್ರದರ್ಶನವಾಗುತ್ತಿದೆ. 2000 ಮಂದಿ ಸಿನಿಮಾ ವೀಕ್ಷಿಸುತ್ತಿದ್ದರೆ, ಇನ್ನೂ 2000 ಮಂದಿ ಹೊರಗೆ ನಿಂತಿದ್ದಾರೆ. ಕೆಲವರು ಚಿತ್ರ ವೀಕ್ಷಣೆಗೆ ಟಿಕೆಟ್ ಖರೀದಿಸುತ್ತಿದ್ದಾರೆ. ಚಿತ್ರ ಬಿಡುಗಡೆಯಾದ ದಿನ ಕಾಲಿಡಲು ಜಾಗವೇ ಇರಲಿಲ್ಲ. ಶನಿವಾರವೂ ಕಲೆಕ್ಷನ್ ತುಂಬಾ ಚೆನ್ನಾಗಿದೆ, ಭಾನುವಾರ ಚಿತ್ರಮಂದಿರ ಭರ್ತಿ ಆಗಿದೆ. ಮರಾಠಾ ಮಂದಿರ್ ಥಿಯೇಟರ್ನಲ್ಲಿ ಶಾರುಖ್ ಮಾತ್ರ ಇದ್ದಾರೆ. ಅವರ ದಿಲ್ವಾಲೆ ದುಲ್ಹನಿಯಾ ಲೇ ಜಾಯೇಂಗೆ ಚಿತ್ರ 28 ವರ್ಷಗಳಿಂದ ಓಡುತ್ತಿದ್ದು, ಈಗ ಪಠಾಣ್ ಕೂಡ ಉತ್ತಮ ಪ್ರದರ್ಶನ ಕಾಣುತ್ತಿದೆ ಎಂದು ಮನೋಜ್ ದೇಸಾಯಿ ತಿಳಿಸಿದರು.
ಮನೋಜ್ ದೇಸಾಯಿ ಮನವಿ: ಪಠಾಣ್ ಬಿಡುಗಡೆಗೂ ಮುನ್ನ ಚಿತ್ರವನ್ನು ಬಹಿಷ್ಕರಿಸುವ ಎಚ್ಚರಿಕೆ ಇತ್ತು. ಸಾಮಾಜಿಕ ಮಾಧ್ಯಮದಲ್ಲಿ ಅವರ ವಿರುದ್ಧ ಕೆಲವು ಆಕ್ಷೇಪಾರ್ಹ ಪದಗಳನ್ನು ಬಳಸಲಾಯಿತು. ಪ್ರತಿಭಟನೆಗಳೂ ಕೂಡ ನಡೆದವು. ಯಾವುದೇ ಚಿತ್ರವನ್ನು ಬಹಿಷ್ಕರಿಸಬೇಡಿ ಎಂದು ಸಾರ್ವಜನಿಕರಲ್ಲಿ ಮನೋಜ್ ದೇಸಾಯಿ ಮನವಿ ಮಾಡಿಕೊಂಡಿದ್ದಾರೆ. ಶಾರುಖ್‌ಗಾಗಿ ಇಂತಹ ಮಾತುಗಳನ್ನು ಆಡಬಾರದು ಎಂದು ಸಹ ಕೇಳಿಕೊಂಡಿದ್ದಾರೆ.
ಸಿನಿಮಾಗಳನ್ನು ಮನೋರಂಜನೆಗಾಗಿ ನೋಡಿ: "ಸಿನಿಮಾಗಳನ್ನು ಮನೋರಂಜನೆಗಾಗಿ ನಿರ್ಮಿಸಲಾಗಿದೆ. ಅವನ್ನು ಮನೋರಂಜನೆಯಾಗಿಯೇ ನೋಡಬೇಕು. ಧರ್ಮಗಳು ಈ ಸಿನಿಮಾ ಉದ್ಯಮದಲ್ಲಿ ಅಥವಾ ಪ್ರೇಕ್ಷಕರ ನಡುವೆ ಕೆಲಸ ಮಾಡುವುದಿಲ್ಲ. ಯಾವುದೇ ಪ್ರೇಕ್ಷಕರು ಧರ್ಮ ನೋಡಿ ಟಿಕೆಟ್ ಖರೀದಿಸುವುದಿಲ್ಲ. ಅವರು ಇಷ್ಟಪಡುವ ಚಲನಚಿತ್ರಗಳನ್ನು ಅವರು ನೋಡುತ್ತಾರೆ" ಎಂದು ಮನೋಜ್ ದೇಸಾಯಿ ಹೇಳಿದರು.
ಕಂಗನಾ ರಣಾವತ್ ಟೀಕೆಗೆ ಪ್ರತಿಕ್ರಿಯೆ: ಚಿತ್ರಕ್ಕೆ 'ಇಂಡಿಯನ್ ಪಠಾಣ್' ಎಂದು ಹೆಸರಿಡಬೇಕಿತ್ತು ಎಂಬ ನಟಿ ಕಂಗನಾ ರಣಾವತ್ ಅವರ ಟೀಕೆಗಳನ್ನು ಮನೋಜ್ ದೇಸಾಯಿ ತಳ್ಳಿಹಾಕಿದರು. ನಟಿ ಕಂಗನಾ ರಣಾವತ್ ಅವರು ದೊಡ್ಡ ನಟಿ. ಅವರು ಒಳ್ಳೆಯದನ್ನು ಮಾತನಾಡಬೇಕು. ನಾವು ಖುದಾ ಗವಾಹ್ (Khuda Gawah) ಚಿತ್ರ ಮಾಡಿದ್ದೇವೆ, ಅದರಲ್ಲಿ ಅಫ್ಘಾನಿ ಪಠಾಣರನ್ನು ತೋರಿಸಿದ್ದೇವೆ. ಪಠಾಣ್ ಅಂದರೆ ಪಠಾಣ್. ಈಗ ಈ ದೇಶದಲ್ಲಿ ವಿವಿಧ ಪ್ರದೇಶಗಳ ಪಠಾಣರನ್ನು ತೋರಿಸಬೇಕೇ? ಎಂದು ಮನೋಜ್ ದೇಸಾಯಿ ಪ್ರಶ್ನಿಸಿದ್ದಾರೆ.
ಇದನ್ನೂ ಓದಿ: ಅಬ್ಬಬ್ಬಾ... ಮೂರೇ ದಿನಗಳಲ್ಲಿ 300 ಕೋಟಿ ಕಲೆಕ್ಷನ್ ಮಾಡಿದ ಪಠಾಣ್ ಸಿನಿಮಾ
ಸಿದ್ಧಾರ್ಥ್ ಆನಂದ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಈ ಚಿತ್ರದಲ್ಲಿ ಶಾರುಖ್ ಖಾನ್, ದೀಪಿಕಾ ಪಡುಕೋಣೆ, ಜಾನ್ ಅಬ್ರಹಾಂ ಅಭಿನಯ ಮಾಡಿದ್ದಾರೆ. ಸಿನಿಮಾ ಹಿಂದಿ ಚಿತ್ರರಂಗದ ಇತಿಹಾಸದಲ್ಲಿ ದೊಡ್ಡ ದಾಖಲೆ ಬರೆದಿದೆ. ಸಿನಿಮಾ ಬಿಡುಗಡೆ ಕಂಡ 3ನೇ ದಿನಕ್ಕೆ ವಿಶ್ವಾದ್ಯಂತ 313 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ ಎಂದು ಈ ಸಿನಿಮಾ ನಿರ್ಮಿಸಿರುವ ಯಶ್ ರಾಜ್ ಫಿಲ್ಮ್ಸ್ ಸಂತಸ ಹಂಚಿಕೊಂಡಿದೆ.
