ಮುಂಬೈ : ಅಕ್ಷಯ್ ಕುಮಾರ್ ಅಭಿನಯದ ರಕ್ಷಾ ಬಂಧನ ಸಿನಿಮಾದ ಟ್ರೈಲರ್ ಮಂಗಳವಾರ ಬಿಡುಗಡೆಗೊಂಡಿದ್ದು, ದೆಹಲಿಯ ಡೆಲಿಟ್ ಸಿನಿಮಾದಲ್ಲಿ ನಡೆದ ಟ್ರೈಲರ್ ಲಾಂಚ್ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ನಟ ಅಕ್ಷಯ್ ಕುಮಾರ್, ರಕ್ಷಾ ಬಂಧನ ಸಿನಿಮಾ ಬಿಡುಗಡೆ ದಿನವೇ ತೆರೆಗೆ ಬರುತ್ತಿರುವ ಅಮೀರ್ ಖಾನ್ ಅಭಿನಯದ ಲಾಲ್ ಸಿಂಗ್ ಛಡ್ಡಾ ಸಿನಿಮಾದೊಂದಿಗೆ ಬಾಕ್ಸ್ ಆಫೀಸ್ ಕ್ಲ್ಯಾಶ್ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದಾರೆ.
ಆನಂದ್ ಎಲ್. ರೈ ನಿರ್ದೇಶನದ ರಕ್ಷಾ ಬಂಧನ ಸಿನಿಮಾದಲ್ಲಿ ಅಕ್ಷಯ್ ಕುಮಾರ್ ಜೊತೆಗೆ ಭೂಮಿ ಪಡ್ನೇಕರ್ ಅವರೂ ಮುಖ್ಯಭೂಮಿಕೆಯಲ್ಲಿ ಅಭಿನಯಿಸಿದ್ದು, ಸಿನಿಮಾ ಆಗಸ್ಟ್ 11ರಂದು ಬಿಡುಗಡೆಯಾಗಲಿದೆ. ಅಮೀರ್ ಖಾನ್ ಅಭಿನಯದ ಲಾಲ್ ಸಿಂಗ್ ಛಡ್ಡಾ ಸಿನಿಮಾ ಕೂಡ ಇದೇ ದಿನ ತೆರೆಗೆ ಬರಲಿದ್ದು, ಈ ಬಗ್ಗೆ ಕೇಳಿದ ಪ್ರಶ್ನೆಗೆ ಅಕ್ಷಯ್ ಕುಮಾರ್, ಇದು ಕ್ಲ್ಯಾಶ್ ಅಲ್ಲ ಎಂದಿದ್ದಾರೆ.
ಎರಡು ಒಳ್ಳೆ ಸಿನಿಮಾಗಳು ಒಟ್ಟಿಗೆ ಬಿಡುಗಡೆಯಾಗುತ್ತಿವೆ. ಕೋವಿಡ್ ಕಾರಣದಿಂದಾಗಿ ಹಲವಾರು ಸಿನಿಮಾಗಳು ತೆರೆಗೆ ಬಂದಿಲ್ಲ. ತುಂಬಾ ಸಿನಿಮಾಗಳು ಈಗಲೂ ಬಿಡುಗಡೆಗೆ ಕಾಯುತ್ತಿವೆ. ಎರಡೂ ಸಿನಿಮಾಗಳು ಬಾಕ್ಸ್ ಆಫೀಸ್ನಲ್ಲಿ ಚೆನ್ನಾಗಿ ಓಡುತ್ತವೆ ಎಂಬ ಭರವಸೆ ನನಗಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಲಾಲ್ ಸಿಂಗ್ ಛಡ್ಡಾ ಏಪ್ರಿಲ್ನಲ್ಲಿ ತೆರೆಗೆ ಬರಲು ಸಿದ್ಧತೆ ನಡೆಸಿಕೊಂಡಿತ್ತು, ಆದರೆ, ಯಶ್ ಅಭಿನಯದ ಕೆಜಿಎಫ್ 2 ಜೊತೆಗಿನ ಕ್ಲ್ಯಾಶ್ ತಪ್ಪಿಸಲು ಸಿನಿಮಾ ರಿಲೀಸ್ ಡೇಟ್ ಮುಂದಕ್ಕೆ ಹಾಕಿತ್ತು. ಇದೀಗ ರಕ್ಷಾ ಬಂಧನ ರಿಲೀಸ್ ದಿನವೇ ಲಾಲ್ ಸಿಂಗ್ ಛಡ್ಡಾ ತೆರೆಗೆ ಬರಲಿದೆ. ರಕ್ಷಾ ಬಂಧನ ಸಿನಿಮಾ ಅಣ್ಣ ತಂಗಿಯರ ಬಂಧನದ ಕುರಿತಾಗಿದ್ದು, ಅಭಿಮಾನಿಗಳು ಬಾಲಿವುಡ್ನ ಎರಡು ಬಹುನಿರೀಕ್ಷಿತ ಸಿನಿಮಾಗಳ ಹವಾ ಹೇಗಿರಬಹುದು ಎಂಬುದನ್ನು ನೋಡಲು ಕಾಯುತ್ತಿದ್ದಾರೆ.
ಇದನ್ನೂ ಓದಿ : ಗ್ರೀನ್ ಇಂಡಿಯಾ ಚಾಲೆಂಜ್ಗೆ ಸಲ್ಮಾನ್ ಸಾಥ್; ಅಭಿಯಾನಕ್ಕೆ ಹೆಗಲಾಗಲು ಅಭಿಮಾನಿಗಳಿಗೆ ಮನವಿ
