ಬೆಂಗಳೂರು: ವಿವಿಧ ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗಿ ಪೊಲೀಸರಿಂದ ಗುಂಡೇಟು ತಿಂದು ಜೈಲು ಸೇರಿದ್ದ ರೌಡಿಶೀಟರ್ ಅನೀಸ್ ಅಹಮದ್ ಪತ್ನಿ ಜೊತೆ ವಿವಾಹೇತರ ಸಂಬಂಧ ಹೊಂದಿದ್ದ ಆರೋಪದಡಿ ಮತ್ತೋರ್ವ ರೌಡಿಶೀಟರ್ನನ್ನು ಹಂತಕರು ಕೊಲೆ ಮಾಡಿರುವ ಘಟನೆ ಗೋವಿಂದಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.
ಸೈಯದ್ ಕರೀಂ ಅಲಿ ಕೊಲೆಯಾಗಿರುವ ರೌಡಿ. ಈತ ಕುಖ್ಯಾತ ರೌಡಿ ರಶೀದ್ ಮಲಬಾರಿ ಜೊತೆ ಗುರುತಿಸಿಕೊಂಡಿದ್ದ. ನಗರದ ಡಿ.ಜೆ. ಹಳ್ಳಿ ಠಾಣಾ ವ್ಯಾಪ್ತಿಯ ರೌಡಿಶೀಟರ್ ಅನೀಸ್ ಅಹಮ್ಮದ್ನ ಪತ್ನಿಯೊಂದಿಗೆ ಕರೀಂ ವಿವಾಹೇತರ ಸಂಬಂಧ ಹೊಂದಿದ್ದ ಎನ್ನಲಾಗ್ತಿದೆ. ಇದನ್ನ ಅರಿತಿದ್ದ ಅನೀಸ್ ಜೈಲಿನಿಂದಲೇ ಕರೀಂ ಹತ್ಯೆಗೆ ಸಂಚು ರೂಪಿಸಿದ್ದ.
ಗೋವಿಂದಪುರ ಬಳಿಯ ಆಂಜನೇಯ ದೇವಸ್ಥಾನದ ಬಳಿ ಕರೀಂನನ್ನು ಹಂತಕರು ಚಾಕುವಿನಿಂದ ತಿವಿದು ಕೊಲೆ ಮಾಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಅನೀಸ್ ವಿರುದ್ಧ ಬೆಂಗಳೂರಿನ ನಾಲ್ಕು ವಿಭಾಗಗಳ 12 ಠಾಣೆಗಳಲ್ಲಿ ಕೊಲೆ, ಕೊಲೆ ಯತ್ನ, ದರೋಡೆ, ರಾಬರಿ ಪ್ರಕರಣಗಳು ಈಗಾಗಲೇ ದಾಖಲಾಗಿವೆ.
