ಉಪ ಸಮರದಲ್ಲಿ ಗೆದ್ದರೂ ಬೀಗದ ಬಿಜೆಪಿ, ಸೋತರೂ ಬೀಗಿದ ಜೆಡಿಎಸ್!.. ಮುಂದಿನ ಲೆಕ್ಕಾಚಾರವೇನು?

ಬೆಳಗಾವಿಯಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಸತೀಶ್ ಜಾರಕಿಹೊಳಿ ಗೆಲುವಿನ ಅಂಚಿಗೆ ಬಂದು ಜಾರಿದರು. ಕಳೆದ ನಾಲ್ಕು ಬಾರಿಗೆ ಹೋಲಿಸಿದರೆ ಈ ಬಾರಿ ಕಾಂಗ್ರೆಸ್ ಸಾಧನೆ ದೊಡ್ಡದು.

ಬೆಂಗಳೂರು : ರಾಜ್ಯದ ಒಂದು ಲೋಕಸಭೆ ಹಾಗೂ ಎರಡು ವಿಧಾನಸಭೆ ಉಪಚುನಾವಣೆಯಲ್ಲಿ ಎರಡು ಕ್ಷೇತ್ರಗಳಲ್ಲಿ ಬಿಜೆಪಿ ಗೆಲುವು ಸಾಧಿಸಿದರೂ ಬೀಗದ ಪರಿಸ್ಥಿತಿ ಇಲ್ಲ. ಆದರೆ, ಯಾವುದೇ ಕ್ಷೇತ್ರದಲ್ಲೂ ಗೆಲ್ಲದ ಜೆಡಿಎಸ್ ಲೆಕ್ಕಾಚಾರವೇ ಬೇರೆ.

ಬೆಳಗಾವಿ ಲೋಕಸಭಾ ಕ್ಷೇತ್ರ ಮತ್ತು ಬಸವಕಲ್ಯಾಣ ವಿಧಾನಸಭಾ ಕ್ಷೇತ್ರದಲ್ಲಿ ಬಿಜೆಪಿ ಗೆಲುವು ಗಳಿಸಿದರೆ, ಕಾಂಗ್ರೆಸ್ ಪಕ್ಷ ಮಸ್ಕಿಯಲ್ಲಿ ಗೆಲುವು ಸಾಧಿಸಿದೆ. ಉಳಿದಂತೆ ಜೆಡಿಎಸ್ ಸ್ಪರ್ಧಿಸಿದ್ದ ಬಸವಕಲ್ಯಾಣ ಕ್ಷೇತ್ರದಲ್ಲಿ ಸೋತಿದೆ.

ಸಹಜವಾಗಿ ಈ ಫಲಿತಾಂಶದಿಂದ ಬಿಜೆಪಿ ಪಾಳೆಯದಲ್ಲಿ ಹರ್ಷ ಮೂಡಬೇಕಿತ್ತು. ಜೆಡಿಎಸ್​​ನಲ್ಲಿ ಬೇಸರ ಕಾಣಬೇಕಿತ್ತು. ಆದರೆ, ಇದ್ಯಾವುದೂ ಆಗಲಿಲ್ಲ. ಹಿಂದೆ ಇಂತಹ ಪರಿಸ್ಥಿತಿಯಲ್ಲಿ ಉಪಚುನಾವಣೆಗಳು ಬಂದಾಗ ಬಿಜೆಪಿ ದೊಡ್ಡ ಮಟ್ಟದ ಗೆಲುವು ಸಾಧಿಸಿತ್ತು‌. ಯಡಿಯೂರಪ್ಪ ಅವರ ನಾಯಕತ್ವ ಅಭಾಧಿತವಾಗುವಂತೆ ಮಾಡಿತ್ತು.

ಈ ಬಾರಿ ನಾಯಕತ್ವ ಬದಲಾವಣೆಯ ಕೂಗು ಕೇಳಿಬಂದವು. ಆ ಸಮಯದಲ್ಲೇ ಉಪಚುನಾವಣೆಗಳು ಘೋಷಣೆಯಾದವು. ಇದು ಸಹಜವಾಗಿಯೇ ಮುಖ್ಯಮಂತ್ರಿ ಯಡಿಯೂರಪ್ಪ ಅವರಿಗೆ ಸವಾಲಿನ ಪ್ರಶ್ನೆಯಾಗಿ ಪರಿಣಮಿಸಿತು. ಹಾಗಾಗಿ, ಯಡಿಯೂರಪ್ಪ ಅವರು ಈ ಬಾರಿ ಉಪಚುನಾವಣೆಗಳು ಘೋಷಣೆಯಾದ ಕೂಡಲೇ ದೊಡ್ಡ ಮಟ್ಟದ ತಯಾರಿ ಮಾಡಿಕೊಂಡರು.

ಬೆಳಗಾವಿ ಕ್ಷೇತ್ರದಲ್ಲಿ ಸ್ಪರ್ಧಿಸಲು ದಿವಂಗತ ಸುರೇಶ್ ಅಂಗಡಿಯವರ ಪತ್ನಿ ಮಂಗಳಾ ಅಂಗಡಿ ಅವರಿಗೆ ಟಿಕೆಟ್ ಕೊಟ್ಟರೆ ಹೆಚ್ಚು ಲಾಭ ಎಂದು ಯಡಿಯೂರಪ್ಪ ಲೆಕ್ಕಾಚಾರ ಹಾಕಿದರು.
ಅದೇ ರೀತಿ, ಕಾಂಗ್ರೆಸ್​​ನಿಂದ ಹೊರಬಂದು ತಾವು ಸರ್ಕಾರ ರಚಿಸಲು ಸಹಕಾರ ನೀಡಿದ ಪ್ರತಾಪ್ ಗೌಡ ಪಾಟೀಲ್ ಅವರನ್ನು ಗೆಲ್ಲಿಸಿಕೊಂಡು ಬರುವುದು ಖುದ್ದು ಯಡಿಯೂರಪ್ಪ ಅವರಿಗೆ ಪ್ರತಿಷ್ಟೆಯ ಪ್ರಶ್ನೆಯಾಗಿತ್ತು.

ಉಳಿದಂತೆ ಮಲ್ಲಿಕಾರ್ಜುನ ಖೂಬಾ ಅವರಿಗೆ ಟಿಕೆಟ್ ತಪ್ಪಿಸಿ ಶರಣು ಸಲಗಾರ್ ಅವರಿಗೆ ಟಿಕೆಟ್ ನೀಡಬೇಕು ಎಂಬ ವಿಷಯದಲ್ಲಿ ಅಂತಿಮ ನಿರ್ಧಾರ ತೆಗೆದುಕೊಂಡಿದ್ದು ಸ್ವತಃ ಯಡಿಯೂರಪ್ಪ. ಹೀಗೆ ಎಲ್ಲ ದೃಷ್ಟಿಯಿಂದ ಯೋಚಿಸಿ ಅವರು ಟಿಕೆಟ್ ಹಂಚಿಕೆಗೆ ಸಹಕರಿಸಿದರಾದರೂ, ಉಪಚುನಾವಣೆಗಳಲ್ಲಿ ಹಿಂದಿನಂತೆ ಅವರ ಮಂತ್ರದಂಡ ಕೆಲಸ ಮಾಡಲಿಲ್ಲ ಎಂತಲೇ ಹೇಳಬಹುದು.

'ಮಂಗಳ' ವಿಚಾರದಲ್ಲಿ ಕೈ ಸವಾಲು

ಬೆಳಗಾವಿ ಲೋಕಸಭಾ ಕ್ಷೇತ್ರವನ್ನೇ ಗಮನಿಸಿದರೆ ಅಲ್ಲಿ ಸ್ಪರ್ಧಿಸಿದ್ದ ಮಂಗಳಾ ಅಂಗಡಿ ಅವರ ಗೆಲುವು ನಿರಾಯಾಸವಾಗಲಿದೆ. ಪತಿಯ ನಿಧನದಿಂದ ಸೃಷ್ಟಿಯಾದ ಅನುಕಂಪ ಅವರ ಭಾರೀ ಅಂತರದ ಗೆಲುವಿಗೆ ಕಾರಣವಾಗುತ್ತದೆ ಎಂಬ ಲೆಕ್ಕಾಚಾರ ಯಡಿಯೂರಪ್ಪ ಅವರಲ್ಲಿತ್ತು. ಆದರೆ, ಅದು ಉಲ್ಟಾ ಹೊಡೆಯಿತು. ಮಂಗಳಾ ಅಂಗಡಿ ಅವರ ಗೆಲುವು ನಿರಾಯಾಸವಾಗುವುದಿರಲಿ, ಮತ ಎಣಿಕೆ ನಡೆದ ಸಂಜೆಯ ವೇಳೆಗೆ ಕಾಂಗ್ರೆಸ್ ಅಭ್ಯರ್ಥಿ ಸತೀಶ್ ಜಾರಕಿಹೊಳಿ ಗೆಲ್ಲುವುದು ಬಹುತೇಕ ನಿಶ್ಚಿತ ಎಂಬ ಪರಿಸ್ಥಿತಿ ಕಾಣಿಸಿಕೊಂಡಿತ್ತು.

ಆದರೆ, ಮಂಗಳಾ ಅಂಗಡಿ ಗೆಲುವು ಸಾಧಿಸಿ ಸಮಾಧಾನದ ನಿಟ್ಟುಸಿರು ಬಿಡಲು ಅಂತಿಮ ಸುತ್ತುಗಳವರೆಗೆ ಕಾಯಬೇಕಾಯಿತು. ಕಳೆದ ಲೋಕಸಭಾ ಚುನಾವಣೆಯಲ್ಲಿ ಸುರೇಶ್ ಅಂಗಡಿ ಅವರಿಗೆ ಸುಮಾರು ನಾಲ್ಕು ಲಕ್ಷದಷ್ಟು ಲೀಡ್ ಕೊಟ್ಟ ಕ್ಷೇತ್ರದಲ್ಲಿ ಬೆರಳೆಣಿಕೆಯಷ್ಟು ಮತಗಳಿಂದ ಮಂಗಳಾ ಅಂಗಡಿ ಗೆಲುವು ಸಾಧಿಸಿದರು.

ವಸ್ತುಸ್ಥಿತಿ ಎಂದರೆ ಇದು ಕ್ಷೇತ್ರದಲ್ಲಿ ಬಿಜೆಪಿ ವರ್ಚಸ್ಸು ಕುಸಿದ ಪರಿಣಾಮವೇ ಹೊರತು ಮತ್ತೇನಲ್ಲ. ಮರಾಠ ಮತಗಳು ದೊಡ್ಡ ಮಟ್ಟದಲ್ಲಿ ಬಿಜೆಪಿ ವಿರುದ್ದ ಚಲಾವಣೆಯಾಗುತ್ತದೆ ಎಂಬ ಸುಳಿವಿದ್ದರೂ ಬಿಜೆಪಿ ನಾಯಕರು ಅದನ್ನು ಸರಿದೂಗಿಸಿಕೊಳ್ಳಲು ಯಾವುದೇ ತಂತ್ರ ಬಳಸಲಿಲ್ಲ. ಲಿಂಗಾಯತ ಮತ ಬ್ಯಾಂಕಿನಲ್ಲೂ ಸಣ್ಣ ಪ್ರಮಾಣದ ಒಡಕು ಕಾಣಿಸಿಕೊಂಡಿತು. ಅದನ್ನು ಸರಿಪಡಿಸುವ ಕೆಲಸವಾಗಲಿಲ್ಲ.

ಜೆಡಿಎಸ್ ನಿರಾಸಕ್ತಿಯೇ ಬಿಜೆಪಿ ಗೆಲುವಿಗೆ ಕಾರಣ..?

ಈ ಮಧ್ಯೆ ಬಿಜೆಪಿಯ ಗೆಲುವಿಗೆ ನೆರವಾದ ಮತ್ತೊಂದು ಮುಖ್ಯ ಕಾರಣವೆಂದರೆ ಜೆಡಿಎಸ್ ತೋರಿದ ನಿರಾಸಕ್ತಿ. ಕ್ಷೇತ್ರದಲ್ಲಿ ತನಗಿರುವ ಶಕ್ತಿಯಿಂದ ಒಬ್ಬ ಬಲಿಷ್ಟ ಅಭ್ಯರ್ಥಿಯನ್ನು ಕಣಕ್ಕಿಳಿಸಿ ಒಂದು ಲಕ್ಷಕ್ಕೂ ಹೆಚ್ಚು ಮತ ಪಡೆಯುವ ಶಕ್ತಿ ಜೆಡಿಎಸ್​​​ಗಿತ್ತು. ಮಾಜಿ ಪ್ರಧಾನಿ, ಜೆಡಿಎಸ್ ವರಿಷ್ಠ ಹೆಚ್.ಡಿ. ದೇವೇಗೌಡರೂ ಕ್ಷೇತ್ರದಿಂದ ಒಬ್ಬ ಲಿಂಗಾಯತ ಅಭ್ಯರ್ಥಿಯನ್ನು ಕಣಕ್ಕಿಳಿಸಿ ಆ ಮೂಲಕ ಜೆಡಿಎಸ್ ಇರುವಿಕೆಯನ್ನು ತೋರಿಸುವ ಬಯಕೆ ಹೊಂದಿದ್ದರು.

ಆದರೆ, ಅಂತಿಮ ಹಂತದಲ್ಲಿ ಅಂತಹ ನಿಲುವಿನಿಂದ ಪಕ್ಷ ಹೊರಗೆ ಬಂತು ಎಂಬ ಮಾತುಗಳು ಪಕ್ಷದ ವಲಯದಲ್ಲಿ ಕೇಳಿ ಬಂದಿವೆ. ಒಂದು ವೇಳೆ ಈ ಕ್ಷೇತ್ರದಲ್ಲಿ ಆಸಕ್ತಿ ವಹಿಸಿ ಗಣನೀಯ ಮತಗಳನ್ನು ಸೆಳೆಯುವ ಅಭ್ಯರ್ಥಿಯನ್ನು ಜೆಡಿಎಸ್ ಕಣಕ್ಕಿಳಿಸಿದ್ದರೆ ಅದು ನಿಶ್ಚಿತವಾಗಿ ಬಿಜೆಪಿ ಅಭ್ಯರ್ಥಿ ಮಂಗಳಾ ಅಂಗಡಿ ಸೋಲಿಗೆ ಕಾರಣವಾಗುತ್ತಿತ್ತು ಎಂದು ವಿಶ್ಲೇಷಿಸಲಾಗುತ್ತಿದೆ.

ಮಸ್ಕಿಯಲ್ಲಿ ಬಿಜೆಪಿ ಎಡವಟ್ಟು

ಮಸ್ಕಿ ವಿಧಾನಸಭಾ ಕ್ಷೇತ್ರದ ವಿಷಯದಲ್ಲಿ ತರಾತುರಿಯ ಹೆಜ್ಜೆಗಳನ್ನಿಟ್ಟು ಯಡಿಯೂರಪ್ಪ ಎಡವಟ್ಟು ಮಾಡಿಕೊಂಡರು. ಇದಕ್ಕೆ ಅಪರಿಮಿತ ವಿಶ್ವಾಸವೇ ಕಾರಣ ಎಂದು ಹೇಳಲಾಗುತ್ತಿದೆ. ಏಕೆಂದರೆ ಪ್ರತಾಪ್ ಗೌಡ ಪಾಟೀಲರು ಗೆದ್ದೇ ಗೆಲ್ಲುತ್ತಾರೆ ಎಂಬ ಅತಿಯಾದ ಆತ್ಮವಿಶ್ವಾಸ, ನಂಬಿಕೆಯಿಂದ ತಮ್ಮ ಪುತ್ರ ವಿಜಯೇಂದ್ರ ಅವರಿಗೆ ಚುನಾವಣೆ ಸ್ಪೆಷಲಿಸ್ಟ್ ಪ್ರಶಾಂತ್ ಕಿಶೋರ್ ರೇಂಜಿನ ಬಿಲ್ಡಪ್ ಕೊಡಲಾಗಿತ್ತು.

ಯಾವಾಗ ಸ್ಥಳೀಯ ನಾಯಕರನ್ನು ನಿರ್ಲಕ್ಷಿಸಿ ವಿಜಯೇಂದ್ರ ಅವರಿಗೆ ಪ್ರಾತಿನಿಧ್ಯ ನೀಡಲಾಯಿತೋ ಆಗ ಕ್ಷೇತ್ರದ ಹಲವು ನಾಯಕರು ಪಕ್ಷದ ಅಭ್ಯರ್ಥಿಯ ವಿರುದ್ದ ತಿರುಗಿ ಬಿದ್ದರು. ಇದರ ಪರಿಣಾಮ ಈಗ ಯಡಿಯೂರಪ್ಪ ಅವರೇ ಈ ಸೋಲಿನ ಅಪಖ್ಯಾತಿಯನ್ನು ಹೊರಬೇಕಾಗಿದೆ.

ಉಳಿದಂತೆ ಬಸವಕಲ್ಯಾಣ ವಿಧಾನಸಭಾ ಕ್ಷೇತ್ರದಲ್ಲಿ ಬಿಜೆಪಿ ಅಭ್ಯರ್ಥಿ ಶರಣು ಸಲಗಾರ್ ಗೆದ್ದರಾದರೂ ಈ ಗೆಲುವಿಗೆ ಜೆಡಿಎಸ್ ನೀಡಿದ ಸಹಕಾರವೇ ಮುಖ್ಯ ಕಾರಣ. ಕ್ಷೇತ್ರದಲ್ಲಿ ಕಾಂಗ್ರೆಸ್ ಅಭ್ಯರ್ಥಿಯಾಗಿ ಕಣಕ್ಕಿಳಿದಿದ್ದ ಮಲ್ಲಮ್ಮ ನಾರಾಯಣರಾವ್ ಅವರಿಗೆ ಗೆಲ್ಲುವ ಅವಕಾಶ ಹೆಚ್ಚಿತ್ತು.

ಬಿಜೆಪಿ ಗೆಲುವಿಗೆ ಕಾರಣವಾದ ಜೆಡಿಎಸ್​..?

ಉಪಚುನಾವಣೆ ಘೋಷಣೆಯಾದ ತಕ್ಷಣ ಕ್ಷೇತ್ರದಲ್ಲಿ ಸರ್ವೇ ಮಾಡಿಸಿದ ಕುಮಾರಸ್ವಾಮಿ ಅವರಿಗೆ ಈ ಕುರಿತು ಯಾವಾಗ ಸ್ಪಷ್ಟತೆ ಸಿಕ್ಕಿತೋ, ನಂತರ ಅವರು ಕ್ಷೇತ್ರದಲ್ಲಿ ಕಾಂಗ್ರೆಸ್ ಅಭ್ಯರ್ಥಿಗೆ ಮುಳ್ಳಾಗಬಹುದಾದ ಅಭ್ಯರ್ಥಿಯನ್ನು ಹುಡುಕಿದರು.

ಹೀಗೆ ಕಣಕ್ಕಿಳಿದ ಜೆಡಿಎಸ್ ಅಭ್ಯರ್ಥಿ, ಕಾಂಗ್ರೆಸ್​​ನ ಮಲ್ಲಮ್ಮ ನಾರಾಯಣರಾವ್ ಅವರ ಸೋಲಿಗೆ ನೆರವಾಗಿದ್ದಲ್ಲದೆ ಆ ಮೂಲಕ ಬಿಜೆಪಿಯ ಗೆಲುವಿಗೆ ಕಾರಣರಾದರು. ಹೀಗೆ ಎರಡು ಕ್ಷೇತ್ರಗಳಲ್ಲಿ ಬಿಜೆಪಿ ಗೆಲುವು ಗಳಿಸಿದರೂ ಅದರ ಹಿಂದಿದ್ದ ಕಾರಣಗಳು ಸಹಜವಾಗಿಯೇ ಕಮಲ ಪಾಳೆಯದ ಬಲ ರಾಜ್ಯದಲ್ಲಿ ಕಡಿಮೆಯಾಗಿದೆ ಎಂಬುದಕ್ಕೆ ಬಿಂಬಿಸುವಂತಿತ್ತು.

ಕಾಂಗ್ರೆಸ್ ಸಾಧನೆ ದೊಡ್ಡದು

ಇನ್ನು ಕಳೆದ ಹಲವು ಉಪಚುನಾವಣೆಗಳನ್ನು ನೋಡಿದರೆ ಕಾಂಗ್ರೆಸ್ ಪರಿಸ್ಥಿತಿ ಉತ್ತಮವಾಗಿರುವುದು ನಿಜ. ಬೆಳಗಾವಿಯಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಸತೀಶ್ ಜಾರಕಿಹೊಳಿ ಗೆಲುವಿನ ಅಂಚಿಗೆ ಬಂದು ಜಾರಿದರು. ಕಳೆದ ನಾಲ್ಕು ಬಾರಿಗೆ ಹೋಲಿಸಿದರೆ ಈ ಬಾರಿ ಕಾಂಗ್ರೆಸ್ ಸಾಧನೆ ದೊಡ್ಡದು. ಕಳೆದ ಚುನಾವಣೆಯಲ್ಲಿ ಬಿಜೆಪಿಯ ಸುರೇಶ್ ಅಂಗಡಿ ಸುಮಾರು ನಾಲ್ಕು ಲಕ್ಷಗಳಷ್ಟು ಮತಗಳ ಅಂತರದಿಂದ ಗೆದ್ದಿದ್ದರು. ಆದರೆ, ಈ ಬಾರಿ ಬಿಜೆಪಿ ಗೆಲುವಿಗಾಗಿ ಲಾಟರಿ ಹೊಡೆಯುವ ಸ್ಥಿತಿ ಎದುರಾಗಿತ್ತು.

ಆ ದೃಷ್ಟಿಯಿಂದ ಇದು ಕಾಂಗ್ರೆಸ್ ನ ಭವಿಷ್ಯಕ್ಕೆ ಪೂರಕವಾಗಿದೆ. ಇನ್ನು ಮಸ್ಕಿ ವಿಧಾನಸಭಾ ಕ್ಷೇತ್ರದ ಗೆಲುವು ಕೂಡಾ ಅದಕ್ಕೆ ಟಾನಿಕ್ ನೀಡುವಂತಾಗಿದೆ. ಬಸವಕಲ್ಯಾಣದಲ್ಲಿ ಅದಕ್ಕೆ ಸೋಲಾಗಿದ್ದಕ್ಕೆ ಬಿಜೆಪಿ ಮಾತ್ರವಲ್ಲ, ಜೆಡಿಎಸ್ ಕೂಡಾ ಕಾರಣ.

ತನ್ನನ್ನು ಸೋಲಿಸಲು ಬಿಜೆಪಿಯಂತಹ ಎದುರಾಳಿ ಮತ್ತೊಂದು ಪಕ್ಷದ ನೆರವು ಕೇಳುವ ಸ್ಥಿತಿಗೆ ಬಂದಿರುವುದು ಹಿಗ್ಗಿರುವ ತನ್ನ ಶಕ್ತಿಯ ಸಂಕೇತ ಎಂಬುದು ಕಾಂಗ್ರೆಸ್ ನಂಬಿಕೆ. ಆದರೆ ಹೀಗೆ ತನ್ನ ಬಲ ಹಿಗ್ಗಿದೆ ಎಂಬ ಕಾರಣಕ್ಕಾಗಿ ಅದು ಖುಷಿ ಪಡುವ ಸ್ಥಿತಿಯಲ್ಲೂ ಇಲ್ಲ. ಕಾರಣ, ಉತ್ತರ ಕರ್ನಾಟಕದ ಕ್ಷೇತ್ರಗಳಲ್ಲಿ ತನ್ನ ಗೆಲುವಿಗೆ ಅಡ್ಡಿಯಾಗಬಹುದಾದ ತಂತ್ರಗಳನ್ನು ಹೆಣೆಯಲು ಜೆಡಿಎಸ್ ಶಕ್ತವಾಗಿದೆ ಎಂದರೆ, ಮುಂದಿನ ದಿನಗಳಲ್ಲಿ ಹಳೆ ಮೈಸೂರು ಭಾಗದ ಕ್ಷೇತ್ರಗಳಲ್ಲಿ ತನಗೆ ಅದು ಶಾಕ್ ಕೊಡಬಲ್ಲದು ಎಂಬುದು ಕಾಂಗ್ರೆಸ್​​​​ನ ಯೋಚನೆಯಾಗಿದೆ.

ಈ ಬಾರಿಯ ಉಪಚುನಾವಣೆಯ ನಂತರ 1999 ರ ಇತಿಹಾಸ ಪುನರಾವರ್ತನೆಯಾಗಲಿದೆ ಎಂಬ ನಂಬಿಕೆ ಕಾಂಗ್ರೆಸ್ ಪಾಳೆಯದಲ್ಲಿತ್ತು. ಅವತ್ತು ರಾಜ್ಯದಲ್ಲಿ ಜನತಾದಳ ಸರ್ಕಾರ ಅಧಿಕಾರದಲ್ಲಿತ್ತು. ಮತ್ತು ಧರ್ಮಸಿಂಗ್ ಅವರು ಪ್ರದೇಶ ಕಾಂಗ್ರೆಸ್ ಅಧ್ಯಕ್ಷರಾಗಿದ್ದರು.

ಈ ಸಂದರ್ಭದಲ್ಲಿ ರಾಮನಗರ, ಮೊಳಕಾಲ್ಕೂರು, ಬೈಂದೂರು ವಿಧಾನಸಭಾ ಕ್ಷೇತ್ರಗಳಿಗೆ ಉಪಚುನಾವಣೆ ನಡೆದಾಗ ಕಾಂಗ್ರೆಸ್ ಪಕ್ಷ ಜಯಭೇರಿ ಬಾರಿಸಿತ್ತು. ಆಗ, ರಾಜ್ಯದಲ್ಲಿ ಪರಿಸ್ಥಿತಿ ತನಗೆ ಪೂರಕವಾಗಿದೆ ಎಂಬ ಭಾವನೆ ಬಂತೋ? ಆಗ ಕಾಂಗ್ರೆಸ್ ಹೈಕಮಾಂಡ್ ಕೆಪಿಸಿಸಿ ಅಧ್ಯಕ್ಷ ಸ್ಥಾನದಿಂದ ಧರ್ಮಸಿಂಗ್ ಅವರನ್ನು ಬದಲಿಸಿ ಒಕ್ಕಲಿಗ ನಾಯಕ ಎಸ್.ಎಂ.ಕೃಷ್ಣ ಅವರನ್ನು ಅ ಜಾಗಕ್ಕೆ ತಂದು ಕೂರಿಸಿತು.

ಲಿಂಗಾಯತ ಶಕ್ತಿ ಬಿಜೆಪಿ ಮೈತ್ರಿಕೂಟದ ಬೆನ್ನ ಹಿಂದಿದ್ದಾಗ ಒಕ್ಕಲಿಗ ಪ್ಲಸ್ ಶೋಷಿತ ಸಮುದಾಯಗಳ ಮತಗಳನ್ನು ಕ್ರೋಢೀಕರಿಸಿದರೆ ಸಾಕು ಎಂಬುದು ಅದರ ಲೆಕ್ಕಾಚಾರ ಮತ್ತು ಈ ಲೆಕ್ಕಾಚಾರ ಯಶಸ್ವಿಯೂ ಆಗಿ 1999 ರಲ್ಲಿ ಕಾಂಗ್ರೆಸ್ ಅಧಿಕಾರ ಹಿಡಿಯಿತು.

ಇದನ್ನೂ ಓದಿ: ಸಿಎಂ ಆದ ಮೊದಲ ದಿನವೇ ತಮಿಳುನಾಡು ಜನತೆಗೆ ಸ್ಟಾಲಿನ್ ಬಂಪರ್‌ ಗಿಫ್ಟ್‌

ಅಂದು ಧರ್ಮಸಿಂಗ್ ಮತ್ತು ಕೃಷ್ಣ ಅವರ ರಥಕ್ಕೆ ಸಾರಥಿಯಾಗಿದ್ದವರು ಇದೇ ಡಿ.ಕೆ.ಶಿವಕುಮಾರ್. ಹೀಗಾಗಿ ಈ ಬಾರಿಯ ಉಪಚುನಾವಣೆಗಳೂ ರಾಮನಗರ, ಮೊಳಕಾಲ್ಮೂರು, ಬೈಂದೂರು ವಿಧಾನಸಭಾ ಕ್ಷೇತ್ರಗಳ ಉಪಚುನಾವಣೆಯಂತೆ ಕಾಂಗ್ರೆಸ್​​ಗೆ ಶಕ್ತಿ ತುಂಬುತ್ತವೆ ಎಂಬುದು ಕಾಂಗ್ರೆಸ್ ಪಾಳೆಯದ ಲೆಕ್ಕಾಚಾರವಾಗಿತ್ತು. ಆದರೆ ಆ ಲೆಕ್ಕಾಚಾರ ಉಲ್ಟಾ ಹೊಡೆದಿದ್ದಷ್ಟೇ ಅಲ್ಲ, ಮುಂದಿನ ವಿಧಾನಸಭಾ ಚುನಾವಣೆಯಲ್ಲೂ ತನ್ನ ಗೆಲುವಿಗೆ ಜೆಡಿಎಸ್ ದೊಡ್ಡ ಅಡ್ಡಿಯಾಗಲಿದೆ ಎಂಬ ಆತಂಕ ಕಾಂಗ್ರೆಸ್ ವಲಯದಲ್ಲಿ ಕಾಣಿಸಿಕೊಂಡಿದೆ.

ಜೆಡಿಎಸ್​ಗೆ ಒಳಗೊಳಗೆ ಸಂತಸ

ಉಪಚುನಾವಣೆಯ ಫಲಿತಾಂಶದ ನಂತರ ಆಡಳಿತಾರೂಢ ಬಿಜೆಪಿ ಮತ್ತು ಪ್ರತಿಪಕ್ಷ ಕಾಂಗ್ರೆಸ್​​ನಲ್ಲಿ ಕಾಣಿಸಿಕೊಂಡಿರುವ ಈ ಭಾವನೆಯೇ ಜೆಡಿಎಸ್ ಪಾಲಿಗೆ ಪ್ಲಸ್ ಆಗಿ ಪರಿಣಮಿಸಿದೆ. ವಾಸ್ತವವಾಗಿ ಒಂದು ರಾಜಕೀಯ ಪಕ್ಷ ತನ್ನ ಸೋಲಿನಿಂದ ವಿಚಲಿತವಾಗಬೇಕು.

ಆದರೆ, ಜೆಡಿಎಸ್ ಪಕ್ಷ ಸೋಲಿನಿಂದ ವಿಚಲಿತವಾಗಿಲ್ಲ. ಅದರ ಬದಲಿಗೆ ಒಳ ಒಳಗೆ ಸಂತಸಗೊಂಡಿದೆ. ಭವಿಷ್ಯದಲ್ಲಿ ತನ್ನನ್ನು ದೂರವಿಟ್ಟು ಅಧಿಕಾರ ಹಿಡಿಯಲು ಬಿಜೆಪಿಗೂ ಆಗಬಾರದು. ಕಾಂಗ್ರೆಸ್ ಪಕ್ಷಕ್ಕೂ ಆಗಬಾರದು ಎಂಬುದು ಜೆಡಿಎಸ್ ನ ಸದ್ಯದ ಗುರಿಯಾಗಿದೆ.

ಈಗಿನ ಪರಿಸ್ಥಿತಿಯಲ್ಲಿ ಜೆಡಿಎಸ್ ಲೆಕ್ಕಾಚಾರ ಯಶಸ್ವಿಯಾಗಿದೆ. ವಸ್ತುಸ್ಥಿತಿ ಎಂದರೆ ಕಳೆದ ಚುನಾವಣೆಯಲ್ಲಿ ಬಿಜೆಪಿ ನೂರಾ ನಾಲ್ಕು ಸೀಟುಗಳನ್ನು ಗೆಲ್ಲುವಷ್ಟರ ಮಟ್ಟಿಗೆ ಬಲಿಷ್ಟವಾಗಿತ್ತು. ಇದಕ್ಕೆ ಯಡಿಯೂರಪ್ಪ ಅವರ ನಾಯಕತ್ವ ಮುಖ್ಯ ಕಾರಣ. ಅಷ್ಟಾದರೂ ಅಂದು ಕಾಂಗ್ರೆಸ್ ಹಾಗೂ ಜೆಡಿಎಸ್ ಪರಸ್ಪರ ಕೈಗೂಡಿಸಿ ಮೈತ್ರಿ ಕೂಟ ಸರ್ಕಾರ ಅಸ್ತಿತ್ವಕ್ಕೆ ಬರುವಂತಾಯಿತು.

ಆದರೆ, ಆಪರೇಷನ್ ಕಮಲ ಕಾರ್ಯಾಚರಣೆಯ ಮೂಲಕ ಮೈತ್ರಿಕೂಟ ಸರ್ಕಾರವನ್ನು ಉರುಳಿಸಿದ ಬಿಜೆಪಿ ಅಧಿಕಾರ ಹಿಡಿಯಿತು. ದೇಶದ ಪಂಚರಾಜ್ಯಗಳ ಚುನಾವಣಾ ಫಲಿತಾಂಶದ ನಂತರ ರಾಜ್ಯದ ರಾಜಕೀಯ ಪರಿಸ್ಥಿತಿಯನ್ನು ನೋಡಿದರೆ ಮುಂದಿನ ಚುನಾವಣೆಯಲ್ಲಿ ಕಾಂಗ್ರೆಸ್ ಪಕ್ಷವೇ ಆಗಲಿ, ಬಿಜೆಪಿಯೇ ಆಗಲಿ, ಸ್ವಯಂ ಬಲದ ಮೇಲೆ ಗೆಲ್ಲುವ ಲಕ್ಷಣಗಳು ಕಾಣುತ್ತಿಲ್ಲ. ಹಾಗಾಗಿ, ಜೆಡಿಎಸ್​​ಗೆ ಅಧಿಕಾರದ ಆಸೆ ಚಿಗುರೊಡೆದಿದೆ.