ಬೆಂಗಳೂರಿನಲ್ಲಿ ಹೆಚ್ಚುತ್ತಿರುವ ಕ್ರೈಂ: ಅಂಕುಶ ಹಾಕಲು ಪೊಲೀಸ್ ಆಯುಕ್ತ ಕಮಲ್‌ ಪಂತ್ ಸಜ್ಜು

ಸಿಲಿಕಾನ್‌ ಸಿಟಿ ಖ್ಯಾತಿಯ ಬೆಂಗಳೂರು ನಗರದಲ್ಲಿ ಕೋವಿಡ್‌ ಅನ್‌ಲಾಕ್‌ ಆದ ನಂತರದ ದಿನಮಾನಗಳಲ್ಲಿ ಅಪರಾಧ ಜಗತ್ತು ತೆರೆದುಕೊಂಡಿದೆ. ಇವುಗಳಿಗೆ ಲಗಾಮು ಹಾಕಿ ನಗರವನ್ನು ಸುರಕ್ಷಿತವಾಗಿಸಲು ನಗರ ಪೊಲೀಸ್ ಆಯುಕ್ತರು ಮುಂದಾಗಿದ್ದಾರೆ.

ಬೆಂಗಳೂರು: ಅನ್​ಲಾಕ್ ನಂತರ ನಗರದಲ್ಲಿ ದಿನೇ‌ ದಿನೇ ಅಪರಾಧ ಪ್ರಕರಣ ಹೆಚ್ಚಾಗುತ್ತಿವೆ. ಇದಕ್ಕೆ ಕಡಿವಾಣ ಹಾಕಲು ನಗರ ಪೊಲೀಸ್ ಆಯುಕ್ತ ಕಮಲ್‌ ಪಂತ್ ಮುಂದಾಗಿದ್ದಾರೆ.

ಇತ್ತೀಚೆಗೆ ನಗರದಲ್ಲಿ ನಡೆದ ಅಪರಾಧ ಪ್ರಕರಣಗಳ ಕುರಿತು ಮಾತನಾಡಿದ ಅವರು, ಯುನಿಯನ್ ಬ್ಯಾಂಕ್​ನಲ್ಲಿ ನಡೆದ ಕೊಲೆ ಪ್ರಕರಣದಲ್ಲಿ ಇಬ್ಬರು ಆರೋಪಿಗಳನ್ನು ಬಂಧಿಸಲಾಗಿದೆ. ನಿನ್ನೆ ರಾತ್ರಿ ಖುದ್ದು ಕೆಲ ಠಾಣೆಗಳಿಗೆ ಭೇಟಿ ನೀಡಿದ್ದೇನೆ. ಇಂತಹ ಘಟನೆ ನಡೆಯಲು ಕಾರಣವೇನು?. ಸ್ಥಳೀಯ ಪೊಲೀಸರಿಗೆ ಈ ಬಗ್ಗೆ ಮಾಹಿತಿ ಇಲ್ಲವೇ? ಎಂಬುವುದರ ಬಗ್ಗೆ ಇನ್​ಸ್ಪೆಕ್ಟರ್​ಗೆ ಕೇಳಿದ್ದೇನೆ ಎಂದರು.

ಅಶೋಕ್ ನಗರ ಠಾಣೆ ವ್ಯಾಪ್ತಿಯಲ್ಲಿ ಅರುಣ್ ಕುಮಾರ್ ಮೇಲೆ ಕೊಲೆ ಯತ್ನ ಪ್ರಕರಣದಲ್ಲಿ ಬಬ್ಲಿ ಎಂಬಾತನ ಬಂಧನ ಮಾಡದ ವಿಚಾರ ಸಂಬಂಧ‌ ಕೇಂದ್ರ ವಿಭಾಗ ಡಿಸಿಪಿ ಅನುಚೇತ್ ಅವರಿಂದ‌ ಮಾಹಿತಿ ಪಡೆಯಲಾಗಿದೆ.‌ ಈ ಬಗ್ಗೆ ಪ್ರತ್ಯೇಕ ತನಿಖೆ ಮಾಡಲು ಸಿಸಿಬಿ ಡಿಸಿಪಿ‌ ಬಸವರಾಜ ಅಂಗಡಿ ಅವರಿಗೆ ಸೂಚಿಸಲಾಗಿದೆ. ಪ್ರಕರಣದಲ್ಲಿ ಬಬ್ಲಿಯನ್ನ ಬಂಧಿಸದಿರಲು ನಿಖರ ಕಾರಣಗಳೇನು? ಈ ಬಗ್ಗೆ ತನಿಖೆ ನಡೆಸಿ ವರದಿ ನೀಡುವಂತೆ ತಿಳಿಸಿದ್ದೇನೆ ಎಂದು ಹೇಳಿದರು.