ಮುಂಬೈ : ಸತತ ಎರಡು ದಿನಗಳ ಕಾಲ ಇಳಿಕೆಯಲ್ಲಿ ಕೊನೆಗೊಂಡ ನಂತರ ಭಾರತೀಯ ಈಕ್ವಿಟಿ ಸೂಚ್ಯಂಕಗಳು ಗುರುವಾರ ಏರಿಕೆಯಲ್ಲಿ ಮುಕ್ತಾಯಗೊಂಡವು. ಇಂದಿನ ವಹಿವಾಟಿನಲ್ಲಿ ಸೆನ್ಸೆಕ್ಸ್ 405.53 ಪಾಯಿಂಟ್ ಅಥವಾ ಶೇಕಡಾ 0.62 ರಷ್ಟು ಏರಿಕೆ ಕಂಡು 65,631.57 ಕ್ಕೆ ತಲುಪಿದೆ ಮತ್ತು ನಿಫ್ಟಿ 108.20 ಪಾಯಿಂಟ್ ಅಥವಾ ಶೇಕಡಾ 0.56 ರಷ್ಟು ಏರಿಕೆ ಕಂಡು 19,544.30 ಕ್ಕೆ ತಲುಪಿದೆ.
ನಿಫ್ಟಿಯಲ್ಲಿ ಬಜಾಜ್ ಆಟೋ, ಲಾರ್ಸನ್ ಆಂಡ್ ಟೂಬ್ರೊ, ಟೈಟಾನ್ ಕಂಪನಿ, ಎಂ & ಎಂ ಮತ್ತು ಟಿಸಿಎಸ್ ಹೆಚ್ಚು ಲಾಭ ಗಳಿಸಿದವು. ಪವರ್ ಗ್ರಿಡ್ ಕಾರ್ಪೊರೇಷನ್, ಹಿಂಡಾಲ್ಕೊ ಇಂಡಸ್ಟ್ರೀಸ್, ಸಿಪ್ಲಾ, ಎನ್ಟಿಪಿಸಿ ಮತ್ತು ನೆಸ್ಲೆ ಇಂಡಿಯಾ ನಷ್ಟ ಅನುಭವಿಸಿದವು. ಆಟೋ, ಬ್ಯಾಂಕ್, ಮಾಹಿತಿ ತಂತ್ರಜ್ಞಾನ ಮತ್ತು ಬಂಡವಾಳ ಸರಕುಗಳು ಶೇಕಡಾ 0.5-1 ರಷ್ಟು ಏರಿಕೆ ಕಂಡರೆ, ಫಾರ್ಮಾ, ವಿದ್ಯುತ್ ಮತ್ತು ಪಿಎಸ್ಯು ಬ್ಯಾಂಕಿಂಗ್ ಷೇರುಗಳಲ್ಲಿ ಹೆಚ್ಚಿನ ಮಾರಾಟ ಕಂಡು ಬಂದಿತು.
ಬಿಎಸ್ಇ ಮಿಡ್ಕ್ಯಾಪ್ ಸೂಚ್ಯಂಕವು ಫ್ಲಾಟ್ ಆಗಿ ಕೊನೆಗೊಂಡರೆ, ಸ್ಮಾಲ್ಕ್ಯಾಪ್ ಸೂಚ್ಯಂಕವು ಶೇಕಡಾ 0.6 ರಷ್ಟು ಏರಿಕೆಯಾಗಿದೆ. ಸುಮಾರು 2178 ಷೇರುಗಳು ಏರಿಕೆಯಾದರೆ, 1361 ಷೇರುಗಳು ಕುಸಿದವು. 121 ಷೇರುಗಳ ಬೆಲೆಗಳಲ್ಲಿ ಯಾವುದೇ ಬದಲಾವಣೆಯಾಗಲಿಲ್ಲ. ಮತ್ತೊಂದೆಡೆ, ಭಾರತೀಯ ರೂಪಾಯಿ ಬುಧವಾರದ ಮುಕ್ತಾಯದ 83.23 ಕ್ಕೆ ಹೋಲಿಸಿದರೆ ಗುರುವಾರ ಪ್ರತಿ ಡಾಲರ್ಗೆ 83.25 ರಲ್ಲಿ ಕೊನೆಗೊಂಡಿತು. ರೂಪಾಯಿ ಗುರುವಾರ ಪ್ರತಿ ಡಾಲರ್ಗೆ 83.21 ರಲ್ಲಿ ಆರಂಭವಾಗಿತ್ತು.
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದ (ಆರ್ಬಿಐ) ಮೂರು ದಿನಗಳ ಹಣಕಾಸು ನೀತಿ ಸಮಿತಿ (ಎಂಪಿಸಿ) ಸಭೆ ಸದ್ಯ ನಡೆಯುತ್ತಿದೆ. ಆರ್ಬಿಐ ಗವರ್ನರ್ ಶಕ್ತಿಕಾಂತ್ ದಾಸ್ ನಾಳೆ ಸಭೆಯ ಫಲಿತಾಂಶ ಪ್ರಕಟಿಸಲಿದ್ದಾರೆ. ಬಡ್ಡಿದರ ಮತ್ತು ವಿತ್ತೀಯ ನೀತಿ ನಿಲುವಿನ ಮೇಲೆ ಆರ್ಬಿಐ ಯಥಾಸ್ಥಿತಿ ಕಾಪಾಡಿಕೊಳ್ಳಲಿದೆ ಎಂದು ಹಣಕಾಸು ತಜ್ಞರ ನಿರೀಕ್ಷೆಯಾಗಿದೆ.
ಏತನ್ಮಧ್ಯೆ, ಜಾಗತಿಕವಾಗಿ ಕಚ್ಚಾ ತೈಲ ಬೆಲೆಗಳು ಮತ್ತಷ್ಟು ಕುಸಿದಿವೆ. ಬ್ರೆಂಟ್ ಕಚ್ಚಾ ತೈಲ ಸೂಚ್ಯಂಕವು ಶೇಕಡಾ 1 ರಷ್ಟು ಕುಸಿದು ಬ್ಯಾರೆಲ್ಗೆ 85 ಡಾಲರ್ಗೆ ತಲುಪಿದೆ. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್ಐಐ) ಮಂಗಳವಾರ 2,034.14 ಕೋಟಿ ರೂ.ಗಳ ಈಕ್ವಿಟಿಗಳನ್ನು ಮಾರಾಟ ಮಾಡಿದ್ದಾರೆ ಎಂದು ವಿನಿಮಯ ಕೇಂದ್ರದ ಅಂಕಿ ಅಂಶಗಳು ತಿಳಿಸಿವೆ.
ಇದನ್ನೂ ಓದಿ : ಫೋರ್ಬ್ಸ್ ಅಮೆರಿಕ ಸಿರಿವಂತರ ಪಟ್ಟಿ: ಅಗ್ರಸ್ಥಾನದಲ್ಲಿ ಮಸ್ಕ್, 2ನೇ ಸ್ಥಾನದಲ್ಲಿ ಬೆಜೋಸ್
