ಹೈದರಾಬಾದ್: ಸಿಎಸ್ಕೆ ತಂಡದ ಆರಂಭಿಕ ಬೌಲರ್ ಆಗಿ ಯಶಸ್ವಿ ಕಂಡಿರುವ ದೀಪಕ್ ಚಹಾರ್ ಹಾಗೂ ಮುಂಬೈ ಇಂಡಿಯನ್ಸ್ ತಂಡದ ಸ್ಪಿನ್ ಬೌಲರ್ ರಾಹುಲ್ ಚಹಾರ್ ಇಂದು ಫೈನಲ್ ಕದನದಲ್ಲಿ ಎದುರಾಗುತ್ತಿದ್ದಾರೆ.
ಒಂದೇ ಕುಟುಂಬದವರಾದ ದೀಪಕ್ ತಂದೆ ಹಾಗೂ ರಾಹುಲ್ ತಂದೆ ಸಹೋದರಾಗಿದ್ದು, ದೀಪಕ್ ತಂದೆ ಲೋಕೇಂದ್ರಸಿಂಗ್ ದೀಪಕ್ ಹಾಗೂ ರಾಹುಲ್ರನ್ನು ಕ್ರಿಕೆಟಿಗರನ್ನಾಗಿ ಮಾಡುವ ದೃಷ್ಟಿಯಿಂದ ಭಾರತೀಯ ವಾಯುಸೇನೆಯ ತಮ್ಮ ಕೆಲಸಕ್ಕೆ ನಿವೃತ್ತಿ ಘೋಷಿಸಿ, ಈ ಇಬ್ಬರು ಮಕ್ಕಳನ್ನು ಪ್ರತಿಭಾವಂತ ಕ್ರಿಕೆಟರ್ಗಳಾಗಿ ರೂಪಿಸಿದ್ದಾರೆ.
ಈ ಇಬ್ಬರು ಪುಣೆ ಸೂಪರ್ ಜೇಂಟ್ಸ್ ತಂಡದ ಪರ ಒಟ್ಟಾಗಿ ಆಡಿದ್ದರು. ಆದರೆ ಈ ಆವೃತ್ತಿಯಲ್ಲಿ ದೀಪಕ್ ಸಿಎಸ್ಕೆ ಪರ, ರಾಹುಲ್ ಮುಂಬೈ ಇಂಡಿಯನ್ಸ್ ಪರ ಆಡುತ್ತಿದ್ದಾರೆ. ದ್ರಾವಿಡ್ ಗರಡಿಯಲ್ಲಿ ಪಳಗಿರುವ ಈ ಇಬ್ಬರು ಪ್ರಥಮ ದರ್ಜೆ ಕ್ರಿಕೆಟ್, ಲಿಸ್ಟ್ ಎ ಕ್ರಿಕೆಟ್ ಹಾಗೂ ಇಂಡಿಯಾ ಎ ತಂಡದ ಪರವಾಗಿ ಒಂದಾಗಿ ಆಡಿದ್ದಾರೆ. ಆದರೆ ಇಂದು ಚಹಾರ್ ಬ್ರದರ್ಸ್ ಚಾಂಪಿಯನ್ ಪಟ್ಟಕ್ಕಾಗಿ ಪ್ರತ್ಯೇಕ ತಂಡಗಳಾಗಿ ಹೋರಾಡಲಿದ್ದಾರೆ. ದೀಪಕ್ ಚಹಾರ್ 16 ಪಂದ್ಯಗಳಲ್ಲಿ 19 ವಿಕೆಟ್ ಪಡೆದಿದ್ದಾರೆ. ಸಹೋದರ ರಾಹುಲ್ ಚಹಾರ್ 12 ಪಂದ್ಯಗಳಿಂದ 12 ವಿಕೆಟ್ ಪಡೆದಿದ್ದಾರೆ.
ಇವರಿಬ್ಬರ ಸಹೋದರಿ ಮಾಲತಿ ಚಹಾರ್ ಎಂಎಸ್ ಧೋನಿಯ ಕಟ್ಟಾ ಅಭಿಮಾನಿಯಾಗಿದ್ದು ಇಂದು ಐಪಿಎಲ್ನ ಅಷ್ಟು ಪಂದ್ಯಗಳಲ್ಲೂ ಸಿಎಸ್ಕೆ ತಂಡವನ್ನೇ ಬೆಂಬಲಿಸಿದ್ದಾರೆ.
