ಹೈದರಾಬಾದ್: ನಿರಂತರ ಮಳೆ, ಪ್ರವಾಹದಿಂದಾಗಿ ಗೋದಾವರಿ ಮತ್ತು ಕೃಷ್ಣಾ ನದಿಗಳ ದಡದಲ್ಲಿ ಹಲವಾರು ಮೊಸಳೆಗಳು ಕಾಣಿಸಿಕೊಳ್ಳುತ್ತಿವೆ. ಇದನ್ನೇ ದುರ್ಬಳಕೆ ಮಾಡಿಕೊಳ್ಳುತ್ತಿರುವ ಕಳ್ಳ ಬೇಟೆಗಾರರು ಮೊಸಳೆಗಳನ್ನು ಹಿಡಿದು ಕೊಂದು, ಅದರ ಮಾಂಸ ಮಾರಾಟ ಮಾಡುತ್ತಿದ್ದಾರೆ.
ಇಂಥಹದ್ದೇ ಪ್ರಕರಣದಲ್ಲಿ ತೆಲಂಗಾಣದ ವ್ಯಕ್ತಿಯೊಬ್ಬನನ್ನು ಪೊಲೀಸರು ಬಂಧಿಸಿದ್ದಾರೆ. ಮೊಸಳೆಯನ್ನು ಕೊಂದು ಅದರ ಮಾಂಸ ಮಾರಾಟ ಮಾಡುತ್ತಿದ್ದಾಗ ವ್ಯಕ್ತಿಯನ್ನು ಬಂಧಿಸಲಾಗಿದೆ. ಇತ್ತೀಚಿಗೆ ನಿರಂತರ ಮಳೆಯಿಂದಾಗಿ ಪ್ರವಾಹ ಉಂಟಾಗಿ ಮುಳುಗು ಜಿಲ್ಲೆಯಲ್ಲಿ ಗೋದಾವರಿ ನದಿ ಉಕ್ಕಿ ಹರಿಯುತ್ತಿದೆ. ಪ್ರವಾಹದಿಂದಾಗಿ ನದಿಯ ದಡಕ್ಕೆ ಮೊಸಳೆಗಳು ನುಗ್ಗಿ ಬರುತ್ತಿವೆ.
ಕಳ್ಳ ಬೇಟೆಗಾರರು ಮೊಸಳೆಗಳನ್ನು ಹಿಡಿದು, ಕೊಂದು ಅದರ ಮಾಂಸವನ್ನು ಮಾರಾಟ ಮಾಡುತ್ತಿದ್ದರು. ಈ ಬಗ್ಗೆ ಮಾಹಿತಿ ಪಡೆದ ಪೊಲೀಸರು ವಾಜೇಡು ಮಂಡಲದ ಚಂದ್ರುಪಟ್ಲ ಗ್ರಾಮದಲ್ಲಿ ಸೋಮವಾರ ದಾಳಿ ನಡೆಸಿದರು. ಮೊಸಳೆ ಮಾಂಸ ಮಾರಾಟ ಮಾಡುತ್ತಿದ್ದ ಓರ್ವನನ್ನು ಹಿಡಿದರೆ, ಇತರರು ತಪ್ಪಿಸಿಕೊಂಡಿದ್ದಾರೆ. ಬಂಧಿತನಿಂದ ಅಧಿಕಾರಿಗಳು ಮಾಂಸ ಮತ್ತು ದೇಹದ ಭಾಗಗಳನ್ನು ವಶಪಡಿಸಿಕೊಂಡಿದ್ದಾರೆ.
ಇದನ್ನೂ ಓದಿ: ಲಾಭದಲ್ಲಿ ಕೊನೆಗೊಂಡ ಷೇರುಪೇಟೆ, ಮುಂದುವರಿದ ಗೂಳಿ ಆಟ.. ಸೆನ್ಸೆಕ್ಸ್ 367, ನಿಫ್ಟಿ 107 ಅಂಕ ಜಿಗಿತ
ಈ ಬಗ್ಗೆ ಕೇಸ್ ದಾಖಲಿಸಿಕೊಂಡು, ತನಿಖೆ ಕೈಗೆತ್ತಿಕೊಂಡಿದ್ದಾರೆ. ತಪ್ಪಿಸಿಕೊಂಡಿರುವ ಇತರ ಕಳ್ಳಬೇಟೆಗಾರರಿಗಾಗಿ ಶೋಧ ನಡೆಸುತ್ತಿದ್ದೇವೆ ಎಂದು ಅರಣ್ಯಾಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಜನರಿಗೆ ಮೊಸಳೆಗಳ ಕಾಟ: ಪ್ರವಾಹದಿಂದಾಗಿ ಮೊಸಳೆಗಳು ನದಿಯಿಂದ ಹೊರಬಂದು, ಸೂರ್ಯನ ಶಾಖಕ್ಕಾಗಿ ದಡದಲ್ಲಿ ಠಿಕಾಣಿ ಹೂಡುತ್ತಿವೆ. ಕೃಷಿ ಗದ್ದೆಗಳು, ಕೊಳಗಳು ಮತ್ತು ಇತರ ಜಲಮೂಲಗಳಲ್ಲಿ ಕೂಡ ಕಾಣಿಸಿಕೊಳ್ಳುತ್ತಿವೆ. ಇದು ನದಿ ಪಾತ್ರದ ಗ್ರಾಮಸ್ಥರ ನಿದ್ದೆಗೆಡಿಸಿದೆ. ವನಪರ್ತಿ, ಗದ್ವಾಲ್, ನಾರಾಯಣಪೇಟೆ ಮತ್ತು ಮುಳುಗು ಜಿಲ್ಲೆಗಳ ಕೆಲವು ಗ್ರಾಮಗಳಲ್ಲಿ ನದಿಗೆ ತಾಗಿಕೊಂಡಿರುವ ಪ್ರದೇಶಗಳಲ್ಲಿ ಮೊಸಳೆಗಳು ಹೆಚ್ಚಾಗಿ ಕಾಣಿಸಿಕೊಂಡಿವೆ.
ಮೊಸಳೆಗೆ ಚಿತ್ರಹಿಂಸೆ ಮಾಡಿ ಕೊಲೆ : ಕಳೆದ ತಿಂಗಳು ಬಿಹಾರದ ವೈಶಾಲಿಯಲ್ಲಿ ಬಾಲಕನ ಸಾವಿಗೆ ಕಾರಣವಾಗಿದ್ದ ಮೊಸಳೆಯನ್ನು ಹಿಡಿದ ಗ್ರಾಮಸ್ಥರು ಅದನ್ನು ಕೋಲು, ಕಲ್ಲಿನಿಂದ ಹೊಡೆದು ಚಿತ್ರಹಿಂಸೆ ನೀಡಿದ ವಿಡಿಯೋ ವೈರಲ್ ಆಗಿತ್ತು. ಜನರು ನದಿಯಿಂದ ಮೊಸಳೆಯನ್ನು ಹೊರತಂದು ಕೊಂದಿದ್ದರು. ಈ ಘಟನೆಯನ್ನು ಯಾರೋ ಚಿತ್ರೀಕರಿಸಿದ್ದರು. ವಿಡಿಯೋದಲ್ಲಿ ಮೊಸಳೆಯನ್ನು ಥಳಿಸುವುದು ಕಂಡಿತ್ತು. ಇದಾದ ನಂತರ ಅರಣ್ಯ ಇಲಾಖೆ ಅಧಿಕಾರಿಗಳು ಮೊಸಳೆ ಹತ್ಯೆಗೆ ಸಂಬಂಧಿಸಿದಂತೆ ಕೇಸ್ ದಾಖಲಿಸಿದ್ದರು.
ನದಿ ಸಮೀಪ ಬಾಲಕ ರಾಸುಗಳನ್ನು ಮೇಯಿಸುತ್ತಿದ್ದಾಗ ನೀರು ಕುಡಿಸಲು ಹೋದಾಗ ಮೊಸಳೆ ದಾಳಿ ಮಾಡಿ, ಬಾಲಕನನ್ನು ನದಿಯಲ್ಲಿ ಎಳೆದುಕೊಂಡು ಹೋಗಿತ್ತು. ಬಾಲಕನ ಕೆಲ ಕುರುಹುಗಳು ನದಿ ದಡದಲ್ಲಿ ಸಿಕ್ಕ ಬಳಿಕ ಇದು ಮೊಸಳೆ ದಾಳಿ ಎಂದು ಕುಪಿತಗೊಂಡಿದ್ದ ಜನರು, ಅದನ್ನು ಹಿಡಿದು ಹತ್ಯೆ ಮಾಡಿದ್ದರು.
ಇದನ್ನೂ ಓದಿ: 9 ವರ್ಷಗಳ ಹಿಂದೆ ಮದುವೆ, 7 ವರ್ಷದ ಮಗ.. ಚಾಕುವಿನಿಂದ ಪತ್ನಿ ಕತ್ತು ಕೂಯ್ದು ಪತಿ ಪರಾರಿ
