ಜ್ಞಾನವಾಪಿ ಮಸೀದಿ ಆವರಣದಲ್ಲಿ ವೈಜ್ಞಾನಿಕ ಸಮೀಕ್ಷೆಗೆ ತಡೆಯಾಜ್ಞೆ ವಿಸ್ತರಣೆ: ವಾರಾಣಸಿಯಿಂದ ತೆರಳಿದ ಎಎಸ್​ಐ ತಂಡಗಳು

ವಿವಾದಿತ ಜ್ಞಾನವಾಪಿ ಮಸೀದಿ ಆವರಣದಲ್ಲಿ ವೈಜ್ಞಾನಿಕ ಸಮೀಕ್ಷೆಗೆ ಹೈಕೋರ್ಟ್​ ತಡೆಯಾಜ್ಞೆ ವಿಸ್ತರಣೆ ಮಾಡಿರುವುದಿಂದ ಎಎಸ್​ಐ ತಂಡಗಳ ಸದಸ್ಯರು ವಾರಾಣಸಿಯಿಂದ ತೆರಳಿದಿದ್ದಾರೆ.

ವಾರಾಣಸಿ (ಉತ್ತರ ಪ್ರದೇಶ): ಉತ್ತರ ಪ್ರದೇಶದ ವಾರಾಣಸಿಯ ವಿವಾದಿತ ಜ್ಞಾನವಾಪಿ ಮಸೀದಿ ಆವರಣದಲ್ಲಿ ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆ (ಎಎಸ್​ಐ)ಯ ವೈಜ್ಞಾನಿಕ ಸಮೀಕ್ಷೆಯನ್ನು ಅಲಹಾಬಾದ್ ಹೈಕೋರ್ಟ್ ಆಗಸ್ಟ್ 3ರವರೆಗೆ ತಡೆಯಾಜ್ಞೆ ವಿಸ್ತರಿಸಿದೆ. ಹೀಗಾಗಿ ಪಾಟ್ನಾ, ದೆಹಲಿ, ಆಗ್ರಾ, ಲಖನೌದಿಂದ ಆಗಮಿಸಿದ್ದ ಎಎಸ್‌ಐ ತಂಡದ ಸದಸ್ಯರು ತಮ್ಮ-ತಮ್ಮ ನಗರಗಳಿಗೆ ಮರಳಿದ್ದಾರೆ.

ಪ್ರಸಿದ್ಧ ಕಾಶಿ ವಿಶ್ವನಾಥ ದೇವಸ್ಥಾನದ ಪಕ್ಕದಲ್ಲಿರುವ ಜ್ಞಾನವಾಪಿ ಮಸೀದಿ ಇದೆ. ಹೀಗಾಗಿ ಹಿಂದೂ ದೇವಾಲಯದ ಸ್ಥಳದಲ್ಲಿ ಮಸೀದಿಯನ್ನು ನಿರ್ಮಿಸಲಾಗಿದೆಯೇ ಎಂದು ನಿರ್ಧರಿಸಲು ವೈಜ್ಞಾನಿಕ ಸಮೀಕ್ಷೆ ನಡೆಸಬೇಕು ಎಂಬ ಒತ್ತಾಯ ಇದೆ. ಈ ಸಂಬಂಧ ಹಿಂದೂ ಪರ ಸಂಘಟನೆಗಳು ಹಾಗೂ ಮಸೀದಿ ಮಂಡಳಿ ಎರಡೂ ಕಡೆಯಿಂದ ಕಾನೂನು ಹೋರಾಟ ನಡೆಯುತ್ತಿದೆ. ಜುಲೈ 21ರಂದು ವಾರಾಣಸಿಯ ಜಿಲ್ಲಾ ಸಿವಿಲ್ ಕೋರ್ಟ್ ಎಎಸ್‌ಐಯ ವೈಜ್ಞಾನಿಕ ಸಮೀಕ್ಷೆಗೆ ಆದೇಶ ನೀಡಿತ್ತು.

ಇದನ್ನೂ ಓದಿ: ಜ್ಞಾನವಾಪಿ ಮಸೀದಿ ಆವರಣದಲ್ಲಿ ವೈಜ್ಞಾನಿಕ ಸಮೀಕ್ಷೆಗೆ ವಾರಾಣಸಿ ಕೋರ್ಟ್​ ಆದೇಶ

ಈ ಆದೇಶದಂತೆ ಜುಲೈ 24ರಂದು ಪುರಾತತ್ವ ಸರ್ವೇಕ್ಷಣಾ ಇಲಾಖೆ ಅಧಿಕಾರಿಗಳ ತಂಡಗಳು ವೈಜ್ಞಾನಿಕ ಸಮೀಕ್ಷೆಯನ್ನು ಆರಂಭಿಸಿದ್ದವು. ಅಂದು ನಾಲ್ಕು ಗಂಟೆಗಳ ಕಾಲ ಈ ಸಮೀಕ್ಷೆ ನಡೆದಿತ್ತು. ಇದಾದ ನಂತರ ಅದೇ ದಿನ (ಜುಲೈ 24) ಸುಪ್ರೀಂಕೋರ್ಟ್ ಈ ಸಮೀಕ್ಷೆಗೆ ತಡೆ ನೀಡಿತ್ತು. ಮತ್ತೊಂದೆಡೆ, ತನ್ನ ವಿಚಾರಣೆ ಮುಂದುವರೆಸಿರುವ ಅಲಹಾಬಾದ್ ಹೈಕೋರ್ಟ್ ಈ ಸಮೀಕ್ಷೆಯ ತಡೆಯಾಜ್ಞೆಯನ್ನು ಆಗಸ್ಟ್ 3ರವರೆಗೆ ವಿಸ್ತರಿಸಿದೆ. ತನ್ನ ತೀರ್ಪನ್ನು ಹೈಕೋರ್ಟ್​ ಆಗಸ್ಟ್ 3ರಂದು ನೀಡಲಿದೆ. ಇದರಿಂದಾಗಿ ವಾರಣಾಸಿಯಲ್ಲಿ ತಂಗಿದ್ದ ಎಎಸ್‌ಐ ವೈಜ್ಞಾನಿಕ ಸಮೀಕ್ಷೆಯ ತಂಡಗಳ ಸದಸ್ಯರು ತಮ್ಮ-ತಮ್ಮ ನಗರಗಳಿಗೆ ವಾಪಸ್​ ಆಗಿದ್ದಾರೆ. ಆದರೆ, ತಂಡದ ಸದಸ್ಯರಿಗೆ ಆಗಸ್ಟ್ 2ರಂದು ಮತ್ತೆ ವಾರಾಣಸಿಗೆ ಮರಳಲು ಸೂಚನೆ ನೀಡಲಾಗಿದೆ.

ಇದನ್ನೂ ಓದಿ: Gyanvapi Survey: ಜ್ಞಾನವಾಪಿ ಮಸೀದಿಯೋ, ಮಂದಿರವೋ? ಬಿಗಿ ಪೊಲೀಸ್‌ ಭದ್ರತೆಯಲ್ಲಿ ASI ತಜ್ಞರಿಂದ ವೈಜ್ಞಾನಿಕ ಸಮೀಕ್ಷೆ

ಈ ಬಗ್ಗೆ ವಾರಾಣಸಿಯ ಸಾರಾನಾಥದಲ್ಲಿರುವ ಪುರಾತತ್ವ ಇಲಾಖೆಯ ಅಧಿಕಾರಿಯೊಬ್ಬರು ಪ್ರತಿಕ್ರಿಯಿಸಿ, ವೈಜ್ಞಾನಿಕ ಸಮೀಕ್ಷೆ ಕುರಿತು ಜುಲೈ 24ರಂದು ನ್ಯಾಯಾಲಯ ನೀಡಿದ್ದ ತೀರ್ಪಿನ ನಂತರ ಎಎಸ್‌ಐ ತಂಡಗಳ ಸದಸ್ಯರು ವಾರಾಣಸಿಯಲ್ಲೇ ಉಳಿದುಕೊಂಡಿದ್ದರು. ಆದರೆ, ಈಗ ಆಗಸ್ಟ್ 3ರವರೆಗೆ ತಡೆಯಾಜ್ಞೆ ವಿಸ್ತರಿಸಿದ ವಿಷಯವನ್ನು ತಂಡದ ಸದಸ್ಯರಿಗೆ ತಿಳಿಸಲಾಗಿದೆ. ಆದ್ದರಿಂದ ಎಲ್ಲ ಸದಸ್ಯರು ವಾರಾಣಸಿಯಿಂದ ಸದ್ಯಕ್ಕೆ ತೆರಳಿದ್ದಾರೆ ಎಂದು ಮಾಹಿತಿ ನೀಡಿದ್ದಾರೆ.

ಮತ್ತೊಂದೆಡೆ, ಜುಲೈ 24ರಂದು 4 ಗಂಟೆಗಳ ಕಾಲ ನಡೆದ ಸಮೀಕ್ಷೆಯಲ್ಲಿ ಕೆಲ ಮಾಹಿತಿಗಳನ್ನು ಕಲೆ ಹಾಕಲಾಗಿದೆ. ಸಾಕ್ಷ್ಯಗಳು ಹಾಗೂ ಛಾಯಾಚಿತ್ರಗಳ ಸಮೇತ ವಿಡಿಯೋವನ್ನು ಸುರಕ್ಷಿತವಾಗಿ ಇರಿಸಲಾಗಿದೆ. ಇಡೀ ಮಸೀದಿ ಸಂಕೀರ್ಣದ ಡಿಜಿಟಲ್ ನಕ್ಷೆಯನ್ನು ಸಹ ಸಿದ್ಧಪಡಿಸಲಾಗಿದೆ. ಯಾವ ಆಧಾರದ ಮೇಲೆ ತನಿಖೆ ನಡೆಸಬೇಕು ಎಂಬ ಮಾಸ್ಟರ್ ಪ್ಲಾನ್ ಕೂಡ ಎಎಸ್​ಐ ತಂಡಗಳು ಸಿದ್ಧಪಡಿಸಿವೆ. ಈ ಸಮೀಕ್ಷೆಯಲ್ಲಿ ಸಂಗ್ರಹಿಸಿದ ಕೆಲವು ಛಾಯಾಚಿತ್ರಗಳು ಈಟಿವಿ ಭಾರತ್​ಗೆ ಲಭ್ಯವಾಗಿವೆ.

ಇದನ್ನೂ ಓದಿ: Gyanvapi Survey: ಗ್ಯಾನವಾಪಿ ಮಸೀದಿ ಸಮೀಕ್ಷೆಗೆ ಸುಪ್ರೀಂ ಕೋರ್ಟ್​ ತಡೆ; ಜು.25ರವರೆಗೆ ಯಥಾಸ್ಥಿತಿಗೆ ಆದೇಶ