ಜೈಪುರ: ಜೈಪುರದ 104 ವರ್ಷದ ವಯೋವೃದ್ಧ ರೋಗಿಯೊಬ್ಬರಿಗೆ ಶಸ್ತ್ರಚಿಕಿತ್ಸೆರಹಿತವಾಗಿ ಹೃದಯ ಕವಾಟ (ಹಾರ್ಟ್ ವಾಲ್ವ್)ವನ್ನು ಬದಲಾಯಿಸಲಾಗಿದೆ. ಇದರಿಂದಾಗಿ ಅವರು ಈ ವಯಸ್ಸಿನಲ್ಲಿಯೂ ಬದುಕಲು ಸಾಧ್ಯವಾಗಿದೆ. ದೇಶದಲ್ಲಿ ಈ ಹಿಂದೆ 92 ವರ್ಷದವರೆಗಿನ ರೋಗಿಗಳಿಗೆ TAVI ತಂತ್ರಜ್ಞಾನವನ್ನು ಬಳಸಿಕೊಂಡು ಯಶಸ್ವಿಯಾಗಿ ಹೃದಯ ಶಸ್ತ್ರಚಿಕಿತ್ಸೆ ಮಾಡಲಾಗಿತ್ತು ಎಂದು ವೈದ್ಯರು ಹೇಳಿದ್ದಾರೆ.
ರೋಗಿಗೆ ಯಶಸ್ವಿಯಾಗಿ ಶಸ್ತ್ರಚಿಕಿತ್ಸೆ ನಡೆಸಿದ ಆಸ್ಪತ್ರೆಯ ವೈದ್ಯ ಡಾ.ಅಮಿತ್ ಚೌರಾಸಿಯಾ ಮಾತನಾಡಿ, ರೋಗಿಯು ಎದೆನೋವು ಮತ್ತು ಉಸಿರಾಟದ ತೊಂದರೆಯ ಸಮಸ್ಯೆಗಳಿಂದ ಬಳಲುತ್ತಿದ್ದರು. ಹೀಗಾಗಿ ಚಿಕಿತ್ಸೆಗಾಗಿ ಅವರು ಆಸ್ಪತ್ರೆಗೆ ಬಂದಿದ್ದರು. 2D ಎಕೋ ಪರೀಕ್ಷೆಯನ್ನು ನಡೆಸಿದಾಗ, ಅವರ ಹೃದಯದ ಮಹಾಪಧಮನಿಯ ಕವಾಟವು (aortic valve of heart) ಕಿರಿದಾಗಿರುವುದು ಕಂಡುಬಂದಿತ್ತು. ಹೀಗಾಗಿ ಅವರಿಗೆ ವಾಲ್ವ್ ಬದಲಾವಣೆ ಮಾಡಿಸಿಕೊಳ್ಳುವಂತೆ ಸಲಹೆ ನೀಡಲಾಗಿತ್ತು. ಆ್ಯಂಜಿಯೋಗ್ರಫಿ ಮಾಡಿಸಿದಾಗ ಹೃದಯದಲ್ಲಿ ಮತ್ತೆ ಕೆಲ ಸಮಸ್ಯೆಗಳಿರುವುದು ತಿಳಿದಿತ್ತು.
ಹೀಗಾಗಿ ಅವರಿಗೆ ಮಹಾಪಧಮನಿಯ ಸ್ಟೆನೋಸಿಸ್ನಿಂದ ಎದೆನೋವು ಬರುತ್ತಿರುವುದು ಸ್ಪಷ್ಟವಾಗಿತ್ತು. ಆದರೆ ಅವರಿಗೆ ವಯಸ್ಸಾದ ಕಾರಣ, ಶಸ್ತ್ರಚಿಕಿತ್ಸೆಯ ಮೂಲಕ ಕವಾಟವನ್ನು ಬದಲಾಯಿಸುವುದು ಸಾಧ್ಯವಿರಲಿಲ್ಲ. ಆದ್ದರಿಂದ ಅವರ ಕವಾಟವನ್ನು TAVI (ಟ್ರಾನ್ಸ್‌ಕ್ಯಾಥೆಟರ್ ಮಹಾಪಧಮನಿಯ ವಾಲ್ವ್ ಇಂಪ್ಲಾಂಟೇಶನ್) ತಂತ್ರಜ್ಞಾನವನ್ನು ಬಳಸಿಕೊಂಡು ಬದಲಾಯಿಸಲಾಯಿತು.
ಈ ಕಾರ್ಯಾಚರಣೆಯು ಸುಮಾರು ಒಂದೂವರೆಯಿಂದ ಎರಡು ಗಂಟೆಗಳಲ್ಲಿ ಪೂರ್ಣಗೊಂಡಿತ್ತು. ಅಲ್ಲದೆ ಮರುದಿನವೇ ರೋಗಿಯು ನಡೆಯಲು ಪ್ರಾರಂಭಿಸಿದರು. ಈ ಪ್ರಕ್ರಿಯೆ ನಡೆದ ನಾಲ್ಕನೇ ದಿನದಂದು ರೋಗಿಯನ್ನು ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗಿತ್ತು.
TAVI ತಂತ್ರಜ್ಞಾನವನ್ನು ಬಳಸಿಕೊಂಡು ಈ ವಯಸ್ಸಿನ ರೋಗಿಯೊಬ್ಬರಿಗೆ ದೇಶದಲ್ಲಿ ನಡೆಸಲಾದ ಮೊದಲ ಶಸ್ತ್ರಚಿಕಿತ್ಸೆ ಇದಾಗಿದೆ ಎಂದು ವೈದ್ಯರು ಹೇಳುತ್ತಾರೆ. ವಯಸ್ಸಾದ ಕಾರಣ ಹೃದ್ರೋಗಿಗಳ ಮೇಲೆ ಔಷಧಗಳ ಪರಿಣಾಮ ಕಡಿಮೆಯಾಗಿರುತ್ತದೆ. ಔಷಧಿಗಳ ಸಹಾಯದಿಂದ ಮಾತ್ರ ರೋಗಿಗೆ ಚಿಕಿತ್ಸೆ ನೀಡಿದರೆ, ಮೊದಲ ವರ್ಷದಲ್ಲಿ ಶೇ 50 ಮತ್ತು ಚಿಕಿತ್ಸೆಯ ಎರಡನೇ ವರ್ಷದಲ್ಲಿ ಕೇವಲ ಶೇ 20 ರಷ್ಟು ಮಾತ್ರ ಬದುಕುಳಿಯುವ ಸಾಧ್ಯತೆಗಳಿರುತ್ತವೆ.
ಅಂಥ ಸಂದರ್ಭಗಳಲ್ಲಿ, TAVI ತಂತ್ರಜ್ಞಾನವು ಸುರಕ್ಷಿತ ಆಯ್ಕೆಯಾಗಿದ್ದು, ಇದರಲ್ಲಿ ಯಾವುದೇ ರೀತಿಯಿಂದ ದೇಹಕ್ಕೆ ಗಾಯ ಮಾಡಲಾಗುವುದಿಲ್ಲ. ಶಸ್ತ್ರಚಿಕಿತ್ಸೆಯ ನಂತರ ರೋಗಿ ಆರೋಗ್ಯವಾಗಿದ್ದಾರೆ ಎಂದು ವೈದ್ಯರು ಹೇಳಿದ್ದಾರೆ. ಇದರೊಂದಿಗೆ, ಜೈಪುರವು ದೇಶದಲ್ಲಿ ಮೊದಲ ಬಾರಿಗೆ 104 ನೇ ವಯಸ್ಸಿನಲ್ಲಿ ರೋಗಿಗೆ ಶಸ್ತ್ರಚಿಕಿತ್ಸೆ ಮಾಡುವ ಮೂಲಕ ಹೃದಯ ವಿಜ್ಞಾನ ಕ್ಷೇತ್ರದಲ್ಲಿ ವಿಭಿನ್ನ ದಾಖಲೆಗಳನ್ನು ನಿರ್ಮಿಸುತ್ತಿದೆ ಎಂದು ಅವರು ಹೇಳಿದ್ದಾರೆ.
ಇದನ್ನು ಓದಿ:ಮೆದುಳನ್ನೇ ತಿನ್ನುವ 'ಅಮೀಬಾ'ಗೆ ವ್ಯಕ್ತಿ ಬಲಿ: ಇಸ್ರೇಲ್‌ನಲ್ಲೊಂದು ಆಘಾತಕಾರಿ ಘಟನೆ
