ನವದೆಹಲಿ: ಹಾಲಿವುಡ್ನ ಬಹುನಿರೀಕ್ಷಿತ ಸೂಪರ್ ಹಿರೋ ಚಿತ್ರ ‘ಸ್ಪೈಡರ್ ಮ್ಯಾನ್: ನೋ ವೇ ಹೋಮ್’ ನಿನ್ನೆ ತೆರೆಗಪ್ಪಳಿಸಿದೆ. ಆದರೆ ಇದೇ ಸಮಯ ಕಾಯುತ್ತಿರುವ ಸೈಬರ್ ಖದೀಮರು ಟಿಕೆಟ್ ಬುಕ್ಕಿಂಗ್ ಸೇರಿದಂತೆ ಕೆಲ ಸೈಟ್ಗಳಲ್ಲಿ ನಕಲಿ ಲಿಂಕ್ ಕಳುಹಿಸಿ ಪ್ರೇಕ್ಷಕರ ಹಣ ಎಗರಿಸುತ್ತಿರುವುದು ವರದಿಯಾಗುತ್ತಿದೆ.
ಕಾಸ್ಪರ್ಸ್ಕೈ ಸಂಶೋಧಕರು ಗಮನಿಸಿರುವಂತೆ ಈ ಸಿನಿಮಾ ಟಿಕೆಟ್ ಬುಕ್ಕಿಂಗ್ ಕುರಿತಂತೆ ಆನ್ಲೈನ್ನಲ್ಲಿ ಸಾವಿರಾರು ನಕಲಿ ಲಿಂಕ್ಗಳು ಹರಿದಾಡುತ್ತಿವೆ. ಈ ಲಿಂಕ್ ಮೇಲೆ ಕ್ಲಿಕ್ ಮಾಡಿ ಟಿಕೆಟ್ ಬುಕ್ಕಿಂಗ್ಗಾಗಿ ಡೆಬಿಟ್ ಅಥವಾ ಕ್ರಿಡಿಟ್ ಕಾರ್ಡ್ನ ಮಾಹಿತಿ ನೀಡುತ್ತಿದ್ದಂತೆ ಖಾತೆಯಿಂದ ಹಣ ಮಾಯವಾಗಲಿದೆ ಎಂದು ಎಚ್ಚರಿಸಿದ್ದಾರೆ.
ಹಾಲಿವುಡ್ನ ಈ ಸೂಪರ್ ಹಿರೋ ಸಿನಿಮಾ ವಿಶ್ವದಾದ್ಯಂತ ಹೈಪ್ ಕ್ರಿಯೆಟ್ ಮಾಡಿದೆ. ಸಿನಿಮಾ ಪ್ರಿಯರು ಈ ಚಿತ್ರ ನೋಡಲು ಹಾತೊರೆಯುತ್ತಿದ್ದು, ಮೊಬೈಲ್ಗೆ ಬಂದ ಲಿಂಕ್ ಮೇಲೆ ಕ್ಲಿಕ್ ಮಾಡಿ ಪ್ರೀಮಿಯರ್ ಶೋ ನೋಡಲು ಉತ್ಸುಕರಾಗಿದ್ದಾರೆ. ಆದರೆ, ಈ ಲಿಂಕ್ಗಳು ನಕಲಿಯಾಗಿದ್ದು, ಆನ್ಲೈನ್ ವಂಚಕರು ಬಳಕೆದಾರರ ಮಾಹಿತಿಯ ಜೊತೆಗೆ ಬ್ಯಾಂಕ್ ಖಾತೆಯಲ್ಲಿನ ಹಣವನ್ನೂ ಎಗರಿಸುತ್ತಿದ್ದಾರೆ.
ಈ ಚಿತ್ರದ ಸ್ಟೋರಿಯನ್ನೇ ಗಾಳವಾಗಿ ಬಳಸುತ್ತಿರುವ ಖದೀಮರು ಸೈಟ್ಗಳಲ್ಲಿ ಈ ಚಿತ್ರದ ಪ್ರಮುಖ ಪಾತ್ರಗಳನ್ನು ವಿವಿಧ ರೀತಿಯ ಸ್ಪೈಡರ್ ಮ್ಯಾನ್ ಪಾತ್ರದಲ್ಲಿ ತೋರಿಸಿ ಸಿನಿ ಪ್ರಿಯರಲ್ಲಿ ಕುತೂಹಲ ಮೂಡಿಸುತ್ತಿದ್ದಾರೆ. ಈ ನಕಲಿ ಪೋಸ್ಟರ್ ಕಂಡು ಪ್ರೇಕ್ಷಕರು ಈ ಚಿತ್ರ ನೋಡಲು ಇನ್ನಷ್ಟು ಉತ್ಸುಕರಾಗಿ ಟಿಕೆಟ್ ಬುಕ್ಕಿಂಗ್ ಲಿಂಕ್ ಮೇಲೆ ಕ್ಲಿಕ್ ಮಾಡುತ್ತಿದ್ದಾರೆ.
ಇದರ ಜೊತೆ ಕೆಲ ಸೈಟ್ಗಳು ಇಡೀ ಚಿತ್ರ ಅನ್ನು ಡೌನ್ಲೋಡ್ ಮಾಡಿಕೊಳ್ಳಿ ಎಂದು ಲಿಂಕ್ ನೀಡುತ್ತಿದ್ದು, ಇದು ನಕಲಿಯಾಗಿದೆ, ಇದರಿಂದ ನಿಮ್ಮ ವೈಯಕ್ತಿಕ ದಾಖಲೆ ಕಳ್ಳತನವಾಗುವ ಸಾಧ್ಯತೆ ಇರಲಿದೆ ಎಂದು ಕಾಸ್ಪರ್ಸ್ಕೈ ಸಂಶೋಧಕರು ಎಚ್ಚರಿಸಿದ್ದಾರೆ.
ಇದನ್ನೂ ಓದಿ: ಕೊರೊನಾ ಲಸಿಕೆ ಹೆಸರಲ್ಲಿ ಕೋಟಿ ಕೋಟಿ ಕದ್ದ ಸೈಬರ್ ಕಳ್ಳರು.. ಈ ವೈದ್ಯರಿಗೆ 11.80 ಕೋಟಿ ರೂ. ವಂಚನೆ!
