ನವದೆಹಲಿ: 'ಪೆಗಾಸಸ್' ಅನ್ನೋ ಒಂದು ತಂತ್ರಾಂಶದ ಮೂಲಕ ಇಸ್ರೇಲಿ ಹ್ಯಾಕರ್ ವಾಟ್ಸ್ಆ್ಯಪ್ಗೆ ಎಂಟ್ರಿ ಕೊಟ್ಟಿರೋ ಬಗ್ಗೆ ವಾಟ್ಸ್ಆ್ಯಪ್ ಅಧಿಕಾರಿಗಳು ಯಾವುದೇ ವಿಚಾರಗಳನ್ನು ಹೇಳಿಲ್ಲ. ಕೇವಲ ತಾಂತ್ರಿಕ ದೌರ್ಬಲ್ಯ ಎಂಬುದನ್ನು ಮಾತ್ರ ವಾಟ್ಸ್ಆ್ಯಪ್ ಹೇಳಿತ್ತು ಎಂದು ಸರ್ಕಾರದ ಮೂಲಗಳು ತಿಳಿಸಿದೆ.
ಹಲವು ಭಾರತೀಯ ಬಳಕೆದಾರರ ಮೊಬೈಲ್ಗೆ 'ಪೆಗಾಸಸ್' ಅನ್ನೋ ಹ್ಯಾಕರ್ ಎಂಟ್ರಿ ಕೊಟ್ಟು, ಮೊಬೈಲ್ನಲ್ಲಿರೋ ಗೌಪ್ಯ ಮಾಹಿತಿ ಸೇರಿ, ಎಲ್ಲ ದಾಖಲೆಗಳನ್ನು ಹ್ಯಾಕ್ ಮಾಡಿರೋ ಬಗ್ಗೆ ಭಾರತೀಯ ಬಳಕೆದಾರರಿಂದ ದೂರು ಸಲ್ಲಿಕೆಯಾಗಿತ್ತು. ಈ ವಿಚಾರವನ್ನು ಭಾರತದ ಸರ್ಕಾರಿ ಸಂಸ್ಥೆಯಾದ CERT-IN(ಭಾರತೀಯ ಕಂಪ್ಯೂಟರ್ ತುರ್ತು ಪ್ರತಿಕ್ರಿಯೆ ತಂಡ)ಗೆ ಮಾಹಿತಿ ನೀಡಲಾಗಿದೆ ಎಂದು ವಾಟ್ಸ್ಆ್ಯಪ್ ಮೂಲಗಳು ಹೇಳಿದ್ದವು
ಆದರೆ, ಇದನ್ನು ತಳ್ಳಿಹಾಕಿರುವ ಭಾರತೀಯ ಸರ್ಕಾರಿ ಮೂಲಗಳು, ಈ ಪೆಗಾಸಸ್ ಬಗ್ಗೆ ವಾಟ್ಸ್ಆ್ಯಪ್ ಅಧಿಕಾರಿಗಳು ಯಾವುದೇ ವಿಚಾರಗಳನ್ನು ಪ್ರಸ್ತಾಪಿಸಿಲ್ಲ. ಕೇವಲ ತಾಂತ್ರಿಕ ಅಡಚಣೆಯ ಬಗ್ಗೆ ಅಷ್ಟೇ ನಮ್ಮ ಗಮನಕ್ಕೆ ತಂದಿತ್ತು ಎಂದು ತಿಳಿಸಿದೆ.
ಇನ್ನೊಂದೆಡೆ, ಈ ವಿಚಾರವಾಗಿ ಎಚ್ಚೆತ್ತಿರುವ ಅಮೆರಿಕ, ಇಂಗ್ಲೆಂಡ್, ಆಸ್ಟ್ರೇಲಿಯಾ ಸೇರಿದಂತೆ ಇತರ ದೇಶಗಳು ಕೂಡಾ ತಮ್ಮ ದೇಶದ ನಾಗರಿಕರ ಖಾಸಗಿತನದ ಗೌಪ್ಯತೆಯ ಬಗ್ಗೆ ಹೆಚ್ಚು ಗಮನ ಕೊಡಲು ಮುಂದಾಗಿದೆ.
ಪೆಗಾಸಸ್ ಹೆಸರಿನ ಹ್ಯಾಕರ್, ಬಳಕೆದಾರರ ಮೊಬೈಲ್ಗೆ ವಿಡಿಯೋ ಕಾಲ್ ಬರುವ ಮೂಲಕ ಎಂಟ್ರಿ ಕೊಡುತ್ತದೆ. ಈ ಕರೆಯನ್ನು ರಿಸೀವ್ ಮಾಡದಿದ್ದರೂ, ಮೊಬೈಲ್ನಲ್ಲಿರೋ ಎಲ್ಲ ಮಾಹಿತಿಯೂ ಈ ಇಸ್ರೇಲಿ ಹ್ಯಾಕರ್ಗಳ ಮೊಬೈಲ್ನಲ್ಲಿ ಸೇವ್ ಆಗುತ್ತೆ ಎನ್ನುವುದರ ಬಗ್ಗೆ ಭಾರತೀಯ ಬಳಕೆದಾರರು ವಾಟ್ಸ್ಆ್ಯಪ್ ಗಮನಕ್ಕೆ ತಂದಿದ್ದರು.
