ಜಗತ್ಸಿಂಗ್‌ಪುರ (ಒಡಿಶಾ): ತಮಿಳುನಾಡಿನಿಂದ ಒಡಿಶಾಗೆ ಹಿಂದಿರುಗಿದ 28 ವರ್ಷದ ಯುವಕನೊಬ್ಬ ಶೌಚಾಲಯದೊಳಗೆ ಹೋಮ್ ಕ್ವಾರಂಟೈನ್ ಕಳೆದ ಘಟನೆ ಜಗತ್ಸಿಂಗ್‌ಪುರ ಜಿಲ್ಲೆಯಲ್ಲಿ ನಡೆದಿದೆ.
ಬೇರೆ ರಾಜ್ಯಗಳಿಂದ ಒಡಿಶಾಗೆ ಬಂದವರು 14 ದಿನಗಳು ಕ್ವಾರಂಟೈನ್ನಲ್ಲಿ ಕಳೆಯುವುದು ಕಡ್ಡಾಯವಾಗಿದೆ. ಇದರಲ್ಲಿ ಏಳು ದಿನಗಳ ಕಾಲ ಸರ್ಕಾರಿ ಕ್ವಾರಂಟೈನ್ ಹಾಗೂ ಉಳಿದ ಏಳು ದಿನ ಹೋಮ್ ಕ್ವಾರಂಟೈನ್ನಲ್ಲಿರುವಂತೆ ನಿಯಮ ರೂಪಿಸಲಾಗಿದೆ.
ಲಾಕ್ಡೌನ್ ಸ್ವಲ್ಪ ತೆರವಾದ ನಂತರ ತಮಿಳುನಾಡಿನಿಂದ ವಾಪಸ್ ಆಗಿದ್ದ ನುವಾಗಾನ್ ಬ್ಲಾಕ್ನ ಜಮಾಗಾಂವ್ ಮಾನಸ್ ಪತ್ರಾ ಎಂಬಾತ ಸುಡುಕಂತಿ ಎಂಬಲ್ಲಿಯ ಸರ್ಕಾರಿ ಶಾಲೆಯಲ್ಲಿ ಸಾಂಸ್ಥಿಕ ಕ್ವಾರಂಟೈನ್ನಲ್ಲಿ ಕಳೆಯಬೇಕಾಯಿತು. ಏಳು ದಿನಗಳ ನಂತರ ಆತನನ್ನು ಹೋಮ್ ಕ್ವಾರಂಟೈನ್ಗೆ ತೆರಳುವಂತೆ ಸೂಚಿಸಲಾಯಿತು. ಪ್ರತ್ಯೇಕ ಮನೆಯಿಲ್ಲದ ಕಾರಣ ಅಧಿಕಾರಿಗಳ ಬಳಿ ಮಾನಸ್ ಪತ್ರಾ ಮನವಿ ಮಾಡಿದರೂ ಸರ್ಕಾರಿ ಕ್ವಾರಂಟೈನ್ನಲ್ಲಿರಲು ಆತನಿಗೆ ಅವಕಾಶ ನೀಡಿರಲಿಲ್ಲ.
ಆತನ ಮನೆಯಲ್ಲಿ ಈಗಾಗಲೇ ಆರು ಮಂದಿ ವಾಸವಿದ್ದು, ಕ್ವಾರಂಟೈನ್ನಲ್ಲಿರುವುದಕ್ಕೆ ಸಾಧ್ಯವಾಗುತ್ತಿರಲಿಲ್ಲ. ಸರ್ಕಾರಿ ಕ್ವಾರಂಟೈನ್ನಲ್ಲಿ ಉಳಿದುಕೊಳ್ಳುವುದಕ್ಕೆ ಅವಕಾಶ ಸಿಗದ ಕಾರಣದಿಂದ ತನ್ನ ಮನೆಯ ಸಮೀಪದಲ್ಲಿಯೇ ಇದ್ದ, ಹೊಸದಾಗಿ ನಿರ್ಮಿಸಿದ್ದ, ಸ್ವಚ್ಚ ಭಾರತ ಶೌಚಾಲಯದಲ್ಲಿ ಮಾನಸ್ ಉಳಿದುಕೊಂಡಿದ್ದಾನೆ. ಸುಮಾರು ಏಳು ದಿನದ ಕ್ವಾರಂಟೈನ್ ಅನ್ನು ಜೂನ್ 9ರಿಂದ 15ರವರೆಗೆ ಕಳೆದಿದ್ದಾನೆ.
