ನವದೆಹಲಿ: ಕೇಂದ್ರ ಸರ್ಕಾರ ಕೋವಿಡ್-19 ತಡೆಯಲು ವಿಧಿಸಿರುವ ಲಾಕ್ಡೌನ್ ನಿಭಾಯಿಸಲು ಪ್ಯಾಕೇಜ್ ಘೋಷಣೆ ಮಾಡಿದ್ದು, ಇದರಿಂದ ದೇಶದಲ್ಲಿ ಹಣಕಾಸಿನ ಕೊರತೆ ಕಾಡಲಿದೆ. ಈ ಹಣಕಾಸಿನ ಕೊರತೆ 2020-21ನೇ ವರ್ಷದ ಜಿಡಿಪಿ ಮೇಲೆ ಪರಿಣಾಮ ಬೀರಲಿದ್ದು ಜಿಡಿಪಿಯಲ್ಲಿ ಶೇಕಡಾ 6.2ರಷ್ಟಿಂದ 3.5ರವರೆಗೆ ಇಳಿಕೆಯಾಗಲಿದೆ ಎಂದು ಮಾರ್ಕೆಟ್ ಡಾಟಾ ವಿಶ್ಲೇಷಣಾ ಸಂಸ್ಥೆ ಫಿಚ್ ಸಲ್ಯೂಷನ್ ಅಭಿಪ್ರಾಯಪಟ್ಟಿದೆ.
ಲಾಕ್ಡೌನ್ನಿಂದಾಗಿ ವ್ಯವಹಾರಗಳು ಕುಂಠಿತಗೊಂಡಿವೆ. ಆದಾಯದ ಮೇಲೆ ತೀವ್ರ ಒತ್ತಡ ಬಿದ್ದಿದೆ. ಇದು ಕೇಂದ್ರ ಸರ್ಕಾರ ತನ್ನ ವೆಚ್ಚಕ್ಕಾಗಿ ಬೇರೆಡೆಯಿಂದ ಸಾಲ ಪಡೆಯುವುದಕ್ಕೆ ಹಾಗೂ ರಿಸರ್ವ್ ಬ್ಯಾಂಕ್ನಿಂದ ಸಾಲ ನಿಧಿಯನ್ನು ತೆಗೆದುಕೊಳ್ಳುವಂತೆ ಮಾಡುತ್ತದೆ ಎಂದು ಫಿಚ್ ಸಲ್ಯೂಷನ್ ಅಭಿಪ್ರಾಯಪಟ್ಟಿದೆ.
ಭಾರತದ 2020-21ನೇ ಆರ್ಥಿಕ ವರ್ಷದಲ್ಲಿ ಆಗಬಹುದಾದ ಹಣಕಾಸಿನ ಕೊರತೆಯನ್ನು ಆಧರಿಸಿ ಈ ಅಂದಾಜು ಮಾಡಲಾಗಿದೆ ಎಂದು ಫಿಚ್ ಸೊಲ್ಯೂಷನ್ ತಿಳಿಸಿದೆ. ಕೊರೊನಾ ಹರಡದಂತೆ ತಡೆಯಲು ಹಾಗೂ ಲಾಕ್ಡೌನ್ ವೇಳೆ ಜನ ಜೀವನ ಸುಧಾರಣೆಗೆ ಹೆಚ್ಚಿನ ವೆಚ್ಚ ಮಾಡಲಾಗಿದ್ದು, ಇದರಿಂದಾಗಿ ಜಿಡಿಪಿ ಕುಸಿತವಾಗಲು ಕಾರಣವಾಗುತ್ತದೆ ಎಂದು ಅಂದಾಜಿಸಲಾಗಿದೆ. ಲಾಕ್ಡೌನ್ ಪ್ಯಾಕೇಜ್ನಲ್ಲಿ ಬಡವರಿಗೆ ಹಾಗೂ ಕಾರ್ಮಿಕರಿಗೆ ಉಚಿತ ಆಹಾರ, ವೈದ್ಯಕೀಯ ಸಿಬ್ಬಂದಿಗೆ ವಿಮೆ ಮುಂತಾದ ಕಾರ್ಯಕ್ರಮಗಳಿಂದ ಆರ್ಥಿಕ ಹೊಡೆತ ತೀವ್ರವಾಗಲಿದೆ ಎಂದು ಹೇಳಿದೆ.
ದೇಶದಲ್ಲಿ ಮಾರ್ಚ್ 25ರಿಂದ ಆರಂಭಗೊಂಡಂತೆ 21 ದಿನಗಳ ಕಾಲ ಲಾಕ್ಡೌನ್ ಘೋಷಣೆ ಮಾಡಲಾಗಿದೆ. ಇದರಿಂದಾಗಿ ಆರ್ಥಿಕ ಸ್ಥಿತಿ ಕುಂಠಿತವಾಗಲಿದ್ದು ಆದಾಯ ಸಂಗ್ರಹದ ಮೇಲೆಯೂ ಪರಿಣಾಮ ಬೀರಲಿದೆ. ಲಾಕ್ ಡೌನ್ಗೆ ಸಿದ್ಧತೆ ನಡೆಸಿಕೊಳ್ಳಲು ಸಾರ್ವಜನಿಕರಿಗೆ ಕೆಲವೇ ಗಂಟೆಗಳ ಕಾಲ ಮಾತ್ರ ಅವಕಾಶ ನೀಡಲಾಗಿತ್ತು. ಇದರಿಂದಾಗಿ ಗ್ರಾಮೀಣ ಭಾಗದ ಜನರು ಯಾವುದೇ ಸಿದ್ಧತೆಯಿಲ್ಲದೇ ಆಹಾರ, ವಸತಿಗಳನ್ನು ಬಿಟ್ಟು ಗ್ರಾಮಗಳಿಗೆ ವಲಸೆ ಹೋಗಿದ್ದೂ ಕೂಡಾ ಆರ್ಥಿಕತೆಯ ಮೇಲೆ ಪರಿಣಾಮ ಬೀರಲಿದೆ ಎಂದು ಉಲ್ಲೇಖಿಸಲಾಗಿದೆ.
ವೈರಸ್ನಿಂದಾದ ಈ ಆರ್ಥಿಕ ಸಂಕಷ್ಟ ಮುಂದಿನ ಕೆಲವು ತ್ರೈಮಾಸಿಕಗಳಿಗೂ ಮುಂದುವರೆಯುತ್ತದೆ. ಇದರಿಂದ ಈ ಆರ್ಥಿಕ ವರ್ಷದಲ್ಲಿ ವೈಯಕ್ತಿಕ ಹಾಗೂ ಕಾರ್ಪೊರೇಟ್ ಆದಾಯದ ಮೇಲೆಯೂ ಕೂಡಾ ಹೊಡೆತ ತೀವ್ರ ಒತ್ತಡ ಬೀಳುತ್ತದೆ. ಕೊರೊನಾದಿಂದ ಉಂಟಾಗಿರುವ ಆರ್ಥಿಕ ಸಂಕಷ್ಟ, ಸಾಮಾಜಿಕ ವಲಯದ ಮೇಲೆಯೂ ಪರಿಣಾಮ ಬೀರಲಿದೆ ಎಂದು ಫಿಚ್ ಸೊಲ್ಯೂಷನ್ ಅಭಿಪ್ರಾಯಪಡಿಸಿದೆ. ಅಮೆರಿಕ ಹಾಗೂ ಸಿಂಗಾಪುರ ಕೂಡಾ ಕೊರೊನಾ ವೈರಸ್ ಹರಡದಂತೆ ಸಾಕಷ್ಟು ಹಣ ವೆಚ್ಚ ಮಾಡಿದ್ದು ಇನ್ನೂ ಹೆಚ್ಚು ಹಣ ವೆಚ್ಚ ಮಾಡಲು ಸಿದ್ಧತೆ ನಡೆಸಿವೆ ಎಂದು ಹೇಳಲಾಗುತ್ತಿದೆ.
