ಲಂಡನ್: ಎರಡು ವರ್ಷಗಳ ಹಿಂದೆ ಇಂಗ್ಲೆಂಡ್ನಲ್ಲಿ ಮಹಿಳೆ ಮೇಲೆ ಅತ್ಯಾಚಾರ ಎಸಗಿ ಭಾರತದಲ್ಲಿ ತಲೆಮರೆಸಿಕೊಂಡಿದ್ದ ಆರೋಪಿಗೆ ಇದೀಗ ಇಂಗ್ಲೆಂಡ್ ನ್ಯಾಯಾಲಯ 7 ವರ್ಷಗಳ ಜೈಲು ಶಿಕ್ಷೆ ವಿಧಿಸಿದೆ.
ಅಜಯ್ ರಾಣಾ (35) ಅತ್ಯಾಚಾರ ಪ್ರಕರಣದಲ್ಲಿ ಇಂಗ್ಲೆಂಡ್ನಲ್ಲಿ ಜೈಲು ಕಂಬಿ ಎಣಿಸುತ್ತಿದ್ದಾನೆ. ಇಂಗ್ಲೆಂಡ್ನಲ್ಲಿ ಅತ್ಯಾಚಾರ ಎಸಗಿರುವ ಆರೋಪಿ ಭಾರತದಲ್ಲಿ ತಲೆಮರೆಸಿಕೊಂಡಿದ್ದ. ಆದರೆ 2 ವರ್ಷಗಳ ನಂತರ ಸ್ಪೇನ್ನಲ್ಲಿ ಈತನನ್ನು ಬಂಧಿಸಲಾಗಿತ್ತು ಎಂದು ಇಂಗ್ಲೆಂಡ್ ಪೊಲೀಸರು ತಿಳಿಸಿದ್ದಾರೆ.
ಇಯರ್ಫೋನ್ ನೀಡಿತ್ತು ಆರೋಪಿಯ ಸುಳಿವು:
2017 ಡಿಸೆಂಬರ್ 9ರಂದು ಇಂಗ್ಲೆಂಡ್ನಲ್ಲಿ ಮಹಿಳೆಯೊಬ್ಬರಿಗೆ ಕಾರಿನಲ್ಲಿ ಲಿಫ್ಟ್ ನೀಡುವುದಾಗಿ ಹೇಳಿ, ಮಾರ್ಗಮಧ್ಯೆ ಆಕೆಯ ಮೇಲೆ ಅತ್ಯಾಚಾರ ಮಾಡಿದ್ದ. ಆನಂತರ ತನ್ನ ತಾಯಿಗೆ ಹುಷಾರಿಲ್ಲವೆಂದು ನೆಪ ಹೇಳಿ ಭಾರತಕ್ಕೆ ಬಂದು ತಲೆಮರೆಸಿಕೊಂಡಿದ್ದ.
ಮಹಿಳೆ ನೀಡಿದ ದೂರಿನಂತೆ ತನಿಖೆಗೆ ಮುಂದಾದ ಪೊಲೀಸರು ಸಿಸಿಟಿವಿಯಲ್ಲಿ ಕಾರು ಪತ್ತೆ ಮಾಡಿದ್ದರು. ಕಾರ್ ಹುಡುಕಿ ಹೊರಟಾಗ ಅದು ರಾಣಾನ ಗೆಳೆಯನದ್ದು ಎಂದು ತಿಳಿದುಬಂದಿತ್ತು. ಪರಿಶೀಲನೆ ವೇಳೆ ಕಾರಿನಲ್ಲಿ ಪೊಲೀಸರಿಗೆ ಇಯರ್ಫೋನ್ ಸಿಕ್ಕಿತ್ತು. ಅಂದು ಕಾರ್ ರಾಣಾ ಬಳಿ ಇತ್ತು ಎಂದು ಅರಿತ ಪೊಲೀಸರು, ಇಯರ್ಫೋನ್ ಮೂಲಕ ಡಿಎನ್ಎ ಪರೀಕ್ಷೆ ಮಾಡಿಸಿದಾಗ, ಮಹಿಳೆ ಮೇಲೆ ಅತ್ಯಾಚಾರ ಮಾಡಿದ್ದು ರಾಣಾ ಎಂಬುದು ಸ್ಪಷ್ಟವಾಗಿತ್ತು. ಅಂದೇ, ರಾಣಾ ವಿರುದ್ಧ ಯೂರೋಪಿಯನ್ ಅರೆಸ್ಟ್ ವಾರೆಂಟ್ ಜಾರಿ ಮಾಡಲಾಗಿತ್ತು.
ಭಾರತದಿಂದ ಸ್ಪೇನ್ಗೆ ಬಂದಿದ್ದ ರಾಣಾನನ್ನು ಬಂಧಿಸಿ, ಅಲ್ಲಿಂದ ಇಂಗ್ಲೆಂಡ್ಗೆ ಹಸ್ತಾಂತರ ಮಾಡಲಾಯಿತು. 2 ವರ್ಷಗಳ ಹಿಂದೆ ಮಾಡಿದ ತಪ್ಪಿಗಾಗಿ ಇಂದು ಶಿಕ್ಷೆ ಅನುಭವಿಸುವಂತಾಗಿದೆ.
