ಹೈದರಾಬಾದ್: ಗ್ರೇಟರ್ ಹೈದರಾಬಾದ್ ಮುನ್ಸಿಪಲ್ ಕಾರ್ಪೋರೇಷನ್ (ಜಿಹೆಚ್ಎಂಸಿ) ಚುನಾವಣೆ ಘೋಷಣೆ ಆಗಿದ್ದು, ಭಾರತೀಯ ಜನತಾ ಪಾರ್ಟಿ ತನ್ನ ಚುನಾವಣಾ ಪ್ರಣಾಳಿಕೆಯನ್ನು ಘೋಷಿಸಿದೆ. ಕೇಂದ್ರ ಸರ್ಕಾರದ ಷರತ್ತುಗಳ ಪ್ರಕಾರ ಎಲ್ಲರಿಗೂ ಕೊರೊನಾ ಲಸಿಕೆ ಮತ್ತು ಪರೀಕ್ಷೆ ಮಾಡಿಸುವುದಾಗಿ ಬಿಜೆಪಿ ತನ್ನ ಪ್ರಣಾಳಿಕೆಯಲ್ಲಿ ಭರವಸೆ ನೀಡಿದೆ..
ಡಿಸೆಂಬರ್ 1ರಂದು ಚುನಾವಣೆಗಳು ನಡೆಯಲಿದ್ದು, ಹೈದರಾಬಾದ್ನಲ್ಲಿರುವ ಬಿಜೆಪಿ ಕಚೇರಿಯಲ್ಲಿ ಮಹಾರಾಷ್ಟ್ರದ ಮಾಜಿ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಚುನಾವಣಾ ಪ್ರಣಾಳಿಕೆಯನ್ನು ಬಿಡುಗಡೆ ಮಾಡಿದ್ದಾರೆ.
ತೆಲಂಗಾಣ ರಾಷ್ಟ್ರ ಸಮಿತಿ (ಟಿಆರ್ಎಸ್) ಜಾರಿಗೆ ತಂದಿರುವ ಲ್ಯಾಂಡ್ ರೆಗ್ಯುಲೇಷನ್ ಸ್ಕೀಮ್ ಅನ್ನು ತೆಗೆದುಹಾಕುವುದಾಗಿ ಬಿಜೆಪಿ ಘೋಷಿಸಿದೆ. ಇದರಿಂದ ಹೈದರಾಬಾದ್ ಜನತೆಗೆ ಸಾಕಷ್ಟು ನಷ್ಟವಾಗಿದೆ ಎಂದು ಬಿಜೆಪಿ ಆರೋಪಿಸಿದೆ.
ಇದರ ಜೊತೆಗೆ ಇನ್ನೂ ಹಲವಾರು ಘೋಷಣೆಗಳನ್ನು ಬಿಜೆಪಿ ಘೋಷಿಸಿದೆ. ಅವುಗಳೆಂದರೆ
- ಪ್ರವಾಹದಿಂದ ಹಾನಿಗೊಳಗಾದ ಕುಟುಂಬಗಳಿಗೆ 25 ಸಾವಿರ ರೂಪಾಯಿ ಪರಿಹಾರ
- ಮೆಟ್ರೋ ಹಾಗೂ ನಗರ ಸಾರಿಗೆ ಬಸ್ಗಳಲ್ಲಿ ಮಹಿಳೆಯರಿಗೆ ಉಚಿತ ಪ್ರಯಾಣ
- ಬಡಕುಟುಂಬದ ವಿದ್ಯಾರ್ಥಿಗಳಿಗೆ ಉಚಿತ ಟ್ಯಾಬ್ಗಳ ವಿತರಣೆ ಹಾಗೂ ವೈಫೈ
- ಪರಿಶಿಷ್ಠ ಜಾತಿ ಕಾಲೋನಿ ಹಾಗೂ ಕೊಳಗೇರಿಗಳಿಗೆ ಆಸ್ತಿ ತೆರಿಗೆಯಿಂದ ವಿನಾಯಿತಿ
- 125 ಯಾರ್ಡ್ಗಳ ವಿಸ್ತೀರ್ಣದಲ್ಲಿ ಮನೆ ನಿರ್ಮಾಣ ಸರ್ಕಾರದಿಂದ ಉಚಿತ ಅನುಮತಿ
- ಹೈದರಾಬಾದ್ನ ಎಲ್ಲ ಮನೆಗಳಿಗೆ ಕುಡಿಯುವ ನೀರಿನ ಉಚಿತ ಸರಬರಾಜು
- 100 ಯುನಿಟ್ಗಳಿಗಿಂತ ಕಡಿಮೆ ವಿದ್ಯುತ್ ಬಳಕೆಗೆ ಯಾವುದೇ ಶುಲ್ಕವಿಲ್ಲ
- ಸಾಂಪ್ರದಾಯಿಕ ವೃತ್ತಿಗಳಿಗೆ ಉಚಿತ ವಿದ್ಯುತ್ ಪೂರೈಕೆ ಭರವಸೆ
- ಮೂಸಿ ನದಿಯ ಪುನರುಜ್ಜೀವನ ಮತ್ತು ಅಭಿವೃದ್ಧಿ ಮಾಡುವ ಭರವಸೆ
- ನಾಲೆಗಳು ಹಾಗೂ ಕೆರೆಗಳ ಒತ್ತುವರಿ ತಡೆಯಲು ಸುಮೇದ ಕಾಯ್ದೆ ಜಾರಿ
- ನಾಲೆಗಳು ಹಾಗೂ ಒಳಚರಂಡಿ ಅಭಿವೃದ್ಧಿಗಾಗಿ ಬಜೆಟ್ನಲ್ಲಿ 10 ಸಾವಿರ ಕೋಟಿ
- ಹೈದರಾಬಾದ್ನ ಓಲ್ಡ್ ಸಿಟಿ ಅಭಿವೃದ್ಧಿಗೆ ವಿಶೇಷ ಅನುದಾನ ಬಿಡುಗಡೆ
- ಓಲ್ಡ್ ಸಿಟಿ ಅಭಿವೃದ್ಧಿಗಾಗಿ ಪ್ರತಿ ವಿಭಾಗಕ್ಕೆ 4 ಕೋಟಿ ರೂ. ಅನುದಾನ
- ಹೀಗೆ ಹಲವು ಭರವಸೆಗಳನ್ನ ಮತದಾರರಿಗೆ ನೀಡಲಾಗಿದೆ. ಟಿಆರ್ಎಸ್ ಸಹ ಚುನಾವಣೆ ಗೆಲ್ಲಲು ಮತದಾರರಿಗೆ ನಾನಾ ಭರವಸೆ ನೀಡಿ ಪ್ರಣಾಳಿಕೆ ಈಗಾಗಲೇ ಬಿಡುಗಡೆ ಮಾಡಿದೆ.
