ಭೋಪಾಲ್: ಕಳೆದ ಕೆಲ ತಿಂಗಳ ಹಿಂದೆ ಮದುವೆಯಾಗಿದ್ದ 21 ವರ್ಷದ ಯುವತಿ ಮೇಲೆ ಮಂತ್ರವಾದಿ ಜತೆ ಸೇರಿ ಪಾಪಿ ಗಂಡ ಅತ್ಯಾಚಾರ ನಡೆಸಿರುವ ಅಮಾನವೀಯ ಘಟನೆ ಮಧ್ಯಪ್ರದೇಶದ ಭೋಪಾಲ್ನಲ್ಲಿ ನಡೆದಿದ್ದು, ಇದೀಗ ಆರೋಪಿಗಳ ಬಂಧನ ಮಾಡಲಾಗಿದೆ.
ಗಂಡ-ಹೆಂಡತಿ ನಡುವೆ ಕಳೆದ ನವೆಂಬರ್ 23ರಂದು ಜಗಳವಾಗಿದ್ದು, ಆಕೆಗೆ ತ್ರಿವಳಿ ತಲಾಖ್ ನೀಡಿ ಮನೆಯಿಂದ ಹೊರಹಾಕಿದ್ದಾನೆ. ಇದಾದ ಕೆಲ ದಿನಗಳ ಬಳಿಕ ಮನಸ್ಸು ಬದಲಿಸಿಕೊಂಡ ಆಕೆಯ ಗಂಡ ಪುನರ್ ವಿವಾಹವಾಗುವುದಾಗಿ ನಂಬಿಸಿ ಆಕೆಯನ್ನ ವಾಪಸ್ ಮನೆಗೆ ಕರೆದುಕೊಂಡು ಬಂದಿದ್ದಾನೆ. ಈ ವೇಳೆ ತಾವು ಮತ್ತೊಮ್ಮೆ ಮದುವೆಯಾಗುವುದಾಗಿ ಮಂತ್ರವಾದಿ ಹತ್ತಿರ ಹೋಗಿ ಹೇಳಿದ್ದಾರೆ.
ಇದಕ್ಕೆ ಉತ್ತರಿಸಿರುವ ಮಂತ್ರವಾದಿ ಈ ಮದುವೆಯಾಗುವುದಕ್ಕೂ ಮುಂಚಿತವಾಗಿ ಯುವತಿ ಬೇರೆ ವ್ಯಕ್ತಿ ಜತೆ ಮದುವೆಯಾಗಬೇಕು ಎಂದು ಸಲಹೆ ನೀಡಿ, ಆಕೆಯನ್ನ ತನ್ನ ಮನೆಗೆ ಕರೆದುಕೊಂಡು ಹೋಗಿದ್ದಾನೆ. ಈ ವೇಳೆ ಆಕೆಯ ಮೇಲೆ ಗಂಡನೊಂದಿಗೆ ಸೇರಿ ಅತ್ಯಾಚಾರ ನಡೆಸಿದ್ದಾನೆ. 50 ವರ್ಷದ ಅನ್ವರ್ ಬಾಬಾ ಈ ಹಿಂದೆ ಇವರಿಬ್ಬರಿಗೂ ಮದುವೆ ಮಾಡಿಸಿದ್ದ ವ್ಯಕ್ತಿ ಸಹ ಆಗಿದ್ದನು. ಇದಾದ ಬಳಿಕ ಆಕೆ ವಾಪಸ್ ಮನೆಗೆ ಬಂದಾಗ ಮದುವೆಯಾಗಲು ನಿರಾಕರಿಸಿ ಮತ್ತೊಮ್ಮೆ ಅತ್ಯಾಚಾರ ನಡೆಸಿದ್ದಾನೆ.
ಈ ಘಟನೆ ಬಗ್ಗೆ ಮಹಿಳೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲು ಮಾಡಿದ್ದು, ಈಗಾಗಲೇ ಇಬ್ಬರು ಆರೋಪಿಗಳ ಬಂಧನ ಮಾಡುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಜತೆಗೆ ಇಬ್ಬರ ಮೇಲೂ ಮದುವೆ ಮೇಲಿನ ಹಕ್ಕುಗಳ ರಕ್ಷಣೆ ಕಾಯ್ದೆ, ತ್ರಿವಳಿ ತಲಾಖ್ ರದ್ದು ಅಡಿಯಲ್ಲಿ ದೂರು ದಾಖಲು ಮಾಡಿಕೊಂಡಿದ್ದಾರೆ.
