ನವದೆಹಲಿ : ಹಾರಾಟ ವಿಭಾಗದಲ್ಲಿ ಕೆಲಸ ಮಾಡದ ತನ್ನ ಸಿಬ್ಬಂದಿಗೆ ಏರ್ ಇಂಡಿಯಾ ಘೋಷಿಸಿದ್ದ ವಿಆರ್ಎಸ್ (ಸ್ವಯಂ ನಿವೃತ್ತಿ ಯೋಜನೆ) ಯೋಜನೆಯನ್ನು ಮೇ 31ರವರೆಗೆ ವಿಸ್ತರಿಸಿದೆ. ಕಳೆದ ಜನವರಿಯಲ್ಲಿ ಏರ್ ಇಂಡಿಯಾವನ್ನು ಸ್ವಾಧೀನ ಪಡಿಸಿಕೊಂಡ ನಂತರ ಇದು ಟಾಟಾ ಕಂಪನಿಯ ಮೂರನೇ ವಿಆರ್ಎಸ್ ಆಫರ್ ಆಗಿದೆ. ಏರ್ ಇಂಡಿಯಾದ ಪ್ರಕಾರ, 40 ವರ್ಷ ಅಥವಾ ಅದಕ್ಕಿಂತ ಹೆಚ್ಚಿನ ವಯಸ್ಸನ್ನು ತಲುಪಿದ ಮತ್ತು ಏರ್‌ಲೈನ್‌ಗಳಲ್ಲಿ ಕನಿಷ್ಠ ಐದು ವರ್ಷಗಳ ನಿರಂತರ ಸೇವೆಯನ್ನು ಪೂರ್ಣಗೊಳಿಸಿದ ಖಾಯಂ ಸಾಮಾನ್ಯ ಕೇಡರ್ ಅಧಿಕಾರಿಗಳು ಆಫರ್‌ಗೆ ಅರ್ಹರಾಗಿರುತ್ತಾರೆ.
ಕನಿಷ್ಠ ಐದು ವರ್ಷಗಳ ನಿರಂತರ ಸೇವೆಯನ್ನು ಪೂರ್ಣಗೊಳಿಸಿದ ಕ್ಲೆರಿಕಲ್ ಮತ್ತು ಕೌಶಲ್ಯರಹಿತ ಉದ್ಯೋಗಿಗಳು ಸಹ ಇದಕ್ಕೆ ಅರ್ಹರಾಗಿರುತ್ತಾರೆ. "ಇದು ಮಾರ್ಚ್ 17 ರ ಪ್ರಕಟಣೆಯನ್ನು ಉಲ್ಲೇಖಿಸುತ್ತದೆ. ಈ ನಿಟ್ಟಿನಲ್ಲಿ, ಎಲ್ಲ ಅರ್ಹ ಉದ್ಯೋಗಿಗಳಿಗೆ ಮೇಲಿನ ಪ್ರಕಟಣೆಯ ಪ್ರಕಾರ ಸ್ವಯಂ ನಿವೃತ್ತಿಗೆ ಅರ್ಜಿ ಸಲ್ಲಿಸುವ ಕೊನೆಯ ದಿನಾಂಕವನ್ನು 31 ಮೇ 2023 ರವರೆಗೆ ವಿಸ್ತರಿಸಲಾಗಿದೆ" ಎಂದು ಸೋಮವಾರ ಏರ್ ಇಂಡಿಯಾ ನೋಟಿಸ್ ಜಾರಿ ಮಾಡಿದೆ. "ಆದಾಗ್ಯೂ, ಅರ್ಜಿಯ ಸ್ವೀಕಾರ ಮತ್ತು ಬಿಡುಗಡೆಯ ದಿನಾಂಕವು ಆಡಳಿತ ಮಂಡಳಿಯ ವಿವೇಚನೆಗೆ ಒಳಪಟ್ಟಿರುತ್ತದೆ. ಯಾವುದೇ ಪ್ರಶ್ನೆಗಳು ಅಥವಾ ಗೊಂದಲಗಳಿದ್ದರೆ ದಯವಿಟ್ಟು ಸ್ಪಷ್ಟೀಕರಣಕ್ಕಾಗಿ ಮಾನವ ಸಂಪನ್ಮೂಲ ಪ್ರತಿನಿಧಿಗಳನ್ನು ಸಂಪರ್ಕಿಸಿ" ಎಂದು ನೋಟಿಸ್ನಲ್ಲಿ ತಿಳಿಸಲಾಗಿದೆ.
ಒಟ್ಟು 2,100 ಉದ್ಯೋಗಿಗಳು ಇತ್ತೀಚಿನ ಸ್ವಯಂ ನಿವೃತ್ತಿ ಯೋಜನೆಯನ್ನು ಪಡೆಯಲು ಅರ್ಹರಾಗಿರುತ್ತಾರೆ ಎಂದು ಮೂಲಗಳು ತಿಳಿಸಿವೆ. ಪ್ರಸ್ತುತ, ವಿಮಾನಯಾನ ಕಂಪನಿಯು ಸುಮಾರು 11,000 ಜನರ ಸಿಬ್ಬಂದಿ ಹೊಂದಿದೆ. ಇದರಲ್ಲಿ ಫ್ಲೈಯಿಂಗ್ ಮತ್ತು ನಾನ್ ಫ್ಲೈಯಿಂಗ್ ಸಿಬ್ಬಂದಿ ಸೇರಿದ್ದಾರೆ. ಜೂನ್ 2022 ರಲ್ಲಿ, ಏರ್ ಇಂಡಿಯಾ ಸ್ವಯಂ ನಿವೃತ್ತಿ ಯೋಜನೆಯ ಮೊದಲ ಹಂತವನ್ನು ಪ್ರಾರಂಭಿಸಿತ್ತು.
ಸ್ವಯಂ ನಿವೃತ್ತಿಯ ಹೆಚ್ಚುವರಿ ಪ್ರಯೋಜನವನ್ನು ಇತರ ಖಾಯಂ ಉದ್ಯೋಗಿಗಳಿಗೂ ವಿಸ್ತರಿಸುವಂತೆ ನೌಕರರು ಮನವಿ ಮಾಡಿದ್ದರು. ಇದಕ್ಕೆ ಪ್ರತಿಕ್ರಿಯೆಯಾಗಿ, ಏರ್ ಇಂಡಿಯಾ ಎರಡನೇ ಹಂತದ ಸ್ವಯಂ ನಿವೃತ್ತಿ ಯೋಜನೆಯನ್ನು ಪ್ರಕಟಿಸುತ್ತಿದೆ ಎಂದು ವಿಮಾನಯಾನ ಸಂಸ್ಥೆಯ ಮುಖ್ಯ ಮಾನವ ಸಂಪನ್ಮೂಲ ಸುರೇಶ್ ದತ್ ತ್ರಿಪಾಠಿ ಶುಕ್ರವಾರ ಸಿಬ್ಬಂದಿಗೆ ಕಳುಹಿಸಲಾದ ಸಂವಹನದಲ್ಲಿ ತಿಳಿಸಿದ್ದಾರೆ.
ಸ್ವಯಂ ನಿವೃತ್ತಿ ಯೋಜನೆ ಮೊದಲ ಹಂತದಲ್ಲಿ, ಫ್ಲೈಯಿಂಗ್ ಮತ್ತು ನಾನ್ ಫ್ಲೈಯಿಂಗ್ ಸಿಬ್ಬಂದಿಗಳೆರಡನ್ನೂ ಒಳಗೊಂಡಿತ್ತು. ಆ ಸಮಯದಲ್ಲಿ, ಸುಮಾರು 4,200 ಉದ್ಯೋಗಿಗಳು ಅರ್ಹರಾಗಿದ್ದರು ಮತ್ತು ಅವರಲ್ಲಿ ಸುಮಾರು 1,500 ಜನರು ಈ ಯೋಜನೆಯನ್ನು ಆರಿಸಿಕೊಂಡರು ಎಂದು ಮೂಲಗಳು ತಿಳಿಸಿವೆ. ಕಳೆದ ವರ್ಷ ಸೆಪ್ಟೆಂಬರ್‌ನಲ್ಲಿ, ಏರ್ ಇಂಡಿಯಾ Vihaan. AI ಹೆಸರಿನ ರೂಪಾಂತರ ಯೋಜನೆ ಘೋಷಿಸಿದೆ. ಮುಂದಿನ ಐದು ವರ್ಷಗಳ ಅವಧಿಯಲ್ಲಿ ಸಾಧಿಸಬೇಕಾದ ವಿವಿಧ ಗುರಿಗಳ ಮೇಲೆ ಈ ಯೋಜನೆ ಕೇಂದ್ರೀಕರಿಸಿದೆ. ಈ ಯೋಜನೆಯು ಏರ್ ಇಂಡಿಯಾವನ್ನು ನಿರಂತರ ಬೆಳವಣಿಗೆ, ಲಾಭದಾಯಕತೆ ಮತ್ತು ಮಾರುಕಟ್ಟೆ ನಾಯಕತ್ವದ ಹಾದಿಯಲ್ಲಿ ಇರಿಸುವ ಗುರಿ ಹೊಂದಿದೆ.
ಇದನ್ನೂ ಓದಿ : ಅದಾನಿ ಸಮೂಹಕ್ಕೆ ನೆರವು ನೀಡಲು ಮುಂದಾದ 3 ಜಪಾನ್ ಬ್ಯಾಂಕ್ಗಳು
