राष्ट्रीय कार्यकारिणी की बैठक मा सीएम धामी: दिल्ली मा आज भारतीय जनता पार्टी राष्ट्रीय कार्यकारिणी की बैठक होंणी च. मुख्यमंत्री पुष्कर सिंह धामी भी राष्ट्रीय कार्यकारिणी की बैठक मा हिस्सा लेणौ दिल्ली पौंछिन. सीएम धामी का अलावा भाजपा प्रदेश अध्यक्ष महेंद्र भट्ट, प्रदेश महामंत्री संगठन अजय कुमार, रक्षा राज्यमंत्री अजय भट्ट, कैबिनेट मंत्री सतपाल महाराज, पूर्व सीएम डॉ रमेश पोखरियाल निशंक, पूर्व सीएम विजय बहुगुणा, सांसद अजय टम्टा, राज्यसभा सांसद अनिल बलूनी, पूर्व सीएम तीरथ सिंह रावत और त्रिवेंद्र सिंह रावत भी ई बैठक मा शामिल छन.
जोशीमठ भू धंसाव मामला पर SC मां सुणवै: जोशीमठ संकट थै राष्ट्रीय आपदा घोषित कन्नै मांग वाली याचिका पर आज सुप्रीम कोर्ट मा सुणवै ह्ले. सुणवै का बाद सुप्रीम कोर्ट न केस थै वापिस उत्तराखंड हाईकोर्ट भेजेली. सुप्रीम कोर्ट न याचिकाकर्ता थै ये मामला थै उत्तराखंड HC मा उठौणै मांग करी. वखी, दूसरी ओर मामला मा उत्तराखंड सरकार न सुप्रीम कोर्ट मा बथै राज्य सरकार पूरी गंभीरता से जोशीमठ मा काम कन्न च. जोशीमठ मा राहत और बचाव कार्य युद्दस्तर पर चलये जांणा छन.
जोशीमठ मामला मा धामी सरकार कु बड़ू फैसला: जोशीमठ मामला थै लेकी आज धामी सरकार न बड़ू फैसला लिनी. धामी सरकार न जोशीमठ शहर का पुनर्निर्माण थै लेकी ऐलान करी. अब धामी सरकार जोशीमठ मा केदारनाथ पुनर्निर्माण कार्यूं की तर्ज पर ही जोशीमठ मा भी काम करली. राज्य आपदा प्रबंधन सचिव रंजीत सिन्हा न बथै राज्य सरकार जोशीमठ का पुनर्विकास थै लेकी लगातार काम कन्नी च. ई कड़ी मा सरकार न यू फैसला लिनी.
पेपर लीक मामला की जांच करला अजय सिंह: पटवारी पेपर लीक मामला की जांच एसटीएफ बटी एसआईटी थै ट्रांसफर कन्ना मामला पर पुलिस मुख्यालय न सफाई दिनी. एडीजी लॉ एंड ऑर्डर वी. मुरुगेशन न जांच ट्रांसफर का सवालूं थै अनर्गल और बेबुनियाद बथै.ऊन बोली एसटीएफ का जांच अधिकारियूं दगड़ि मिली स्पेशल एसआईटी कु गठन करे गी. या टीम मिली ये मामलै जांच करली. UKSSSC जन बड़ा घोटाला कु पर्दाफाश कन्न वाला आईपीएस अजय सिंह थै ई टीमौ नेतृत्व सौंपे गी.
उत्तराखंड मा 20 संदिग्ध सब इंस्पेक्टर सस्पेंड: उत्तराखंड का दारोगा भर्ती घोटाला मा 20 संदिग्ध सब इंस्पेक्टरुं थै सस्पेंड करे गी. दारोगा भर्ती घोटाला साल 2015-16 मा ह्वे छौ. पुलिस महानिदेशक अशोक कुमार का आदेश का बाद या कार्रवाई करे गी. औंण वाला कुछ दिन मा और भी संदिग्ध दरोगा निलंबित ह्वे सकदन. अभी तक जांच पड़ताल मा 40 से अधिक दारोगाऊं पर परीक्षा मा धांधली करी नियुक्ति पौणौ आरोप च. विजिलेंस यूं सबी मामलौ मा साक्ष्य सबूत एकत्र कर विवेचना मा लगी च.
जल्द उत्तराखंड दौरा पर आला पीएम मोदी और राहुल गांधी: प्रधानमंत्री नरेंद्र मोदी(PM Modi Uttarakhand visit ) और कांग्रेस नेता राहुल गांधी जल्द ही उत्तराखंड दौरे पर ऐ सकदन. बथये जांणू च की पीएम मोदी लोहाघाट स्थित अद्वैत मायावती आश्रम(PM Modi will visit Advait Mayawati Ashram) कु दौरा करला. दगड़ा मा ही राहुल गांधी भी नैनीताल का हैड़ाखान आश्रम(Rahul Gandhi visit Haidakhan Ashram) पौंछला. यू द्वी नेता यू आश्रमूं मा ध्यान लगाला. हालांकि, अभी तक द्वी नेताऊं का दौरा थै लेकी क्वी भी आधिकारिक जानकारी नी च.
प्रदेशभर मा खुलेला 14 क्रिटिकल केयर ब्लॉक: सड़क दुर्घटनाऊं मा घायलूं और अन्य गंभीर बीमारियूं से ग्रसित मरीजूं का बेहतर इलाज थै प्रदेश भर मा 14 क्रिटिकल केयर ब्लॉक स्थापित किये जाला. यां का पैला चरण मा सात जिलों मा क्रिटिकल केयर ब्लाक बणौणै डीपीआर भी तैयार ह्ववे गी. यूं जिलों मा चमोली, चंपावत, बागेश्वर, पौड़ी, नैनीताल, रुद्रप्रयाग, उत्तरकाशी शामिल छन. स्वास्थ्य मंत्री डॉ. धन सिंह रावत न सबी अधिकारियूं थै क्रिटिकल केयर ब्लाक का काम मा तेजी लौणा निर्देश दिनीन.
उत्तराखंड मा शुरू ह्वे बर्फबारी कु दौर: उत्तराखंड मा एक बार फिर से मौसम न करवट बदली. प्रदेश का पर्वतीय अंचलों मा बारिश और बर्फबारी कु दौर जारी ह्वे गी. चमोली जनपद मा बर्फबारी ह्वे. बदरीनाथ धाम का परिसर समेत पहाड़ियूं पर भी बर्फबारी ह्ववे. उत्तरकाशी और टिहरी मा भी जोरदार बर्फबारी ह्वे. पर्यटन नगरी धनौल्टी मा भी देर रात से सुबेर तक सालै पैली बर्फबारी ह्वे. धनौल्टी आलू फार्म, एप्पल गार्डन, सुराकंडा देवी, कद्दूखाल बाटवालधार और तपोवन आदि जगहूं पर द्वी इंच तक बर्फ जम गी. प्रदेश मा बर्फबारी कु सैलानी जमकर लुत्फ उठौणा छन. बर्फबारी का बाद प्रदेश मा ठंड बढ़ गी.
