1. उत्तराखंड मा घटी कोरोना की रफ्तार: उत्तराखंड मा अब कोरोना कू प्रकोप कम हुंदु दिखेणु च, आज मंगलवार का दिन प्रदेश मा कोरोना का 29 नया केस समणि ऐनी, जैका बाद प्रदेश मा अब कुल 328 केस ही एक्टिव छिन, ये साल जनवरी बटि अब तक कुल 91866 लोग कोरोना से संक्रमित ह्वेनी. वखि आज 53 मरीजों ना कोरोना थै मात दे.
2. उत्तराखंड मा 16 मार्च से बच्चों थै लगलि कोविड वैक्सीन: उत्तराखंड का सबि स्वास्थ्य केंद्रों और वैक्सीनेशन सेंटर मा भोल बटि 12 से 14 आयु वर्ग का बच्चों थै लगलि कोविड वैक्सीन, बच्चों कु वैक्सीनेशन खुण नि होलि कुई रजिस्ट्रेशन की बाध्यता. केंद्र सरकार बटि उत्तराखंड स्वास्थ्य विभाग थै मिलिन 4 लाख से ज्यादा डोज.
3. सीएम पद थै लेकि जल्द खत्म होलु सस्पेंस: उत्तराखंड की बीजेपी सरकार मा सीएम पद थै लेकि जल्द खत्म होलु सस्पेंस, कार्यवाहक मुख्यमंत्री पुष्कर सिंह धामी, बीजेपी प्रदेश अध्यक्ष मदन कौशिक और पार्टी संगठन मंत्री अजय कुमार पौंचिन दिल्ली, तिनी नेता बीजेपी राष्ट्रीय अध्यक्ष जेपी नड्डा और राष्ट्रीय महामंत्री बीएल संतोष से करला मुलाकात.
4. विस चुनौ मा हार थै लेकि कांग्रेस नेताओं का बीच जुबानी जंग: उत्तराखंड विधानसभा चुनौ मा कांग्रेस की करारी हार बाद नेताओं का बीच जुबानी जंग तेज, रणजीत रावत ना हरीश रावत पर लगैन गंभीर आरोप, वखि यन बयानबाजियों थै कांग्रेस पदाधिकारियों ना बताई गलत, कांग्रेस प्रदेश प्रभारी देवेंद्र यादव ना बोली- बड़ा नेताओं की सार्वजनिक छींटाकशी से टूटणु च कार्यकर्ताओं कू मनोबल. जरुरत पुड़ पर हाईकमान लयालु एक्शन.
5. रणजीत रावत का आरोपों पर हरदा ना दै अपणि सफै: कांग्रेस नेता हरीश रावत ना रणजीत रावत का आरोपों पर दै सफाई, हरदा न बोली- बीजेपी मिपर मुस्लिम यूनिवर्सिटी खुना कू आरोप लगाणि च और अब अपणा ही साथी मिपर टिकट बिचणा कू आरोप लगाणा छिन, अगर मिन कुछ भि गलत करि होलु त मिथै खड्डा मा दबै द्यवा, या फिर होली मा मैरु राजनीतिक दहन त कै ही द्यावा.
6. शहीद जवान राजेंद्र सिंह थै द्याई अंतिम विदाई: छत्तीसगढ़ मा आईटीबीपी बटालियन पर नक्सली हमला, ये हमला मा उत्तराखंड का जवान राजेंद्र सिंह शहीद, आज पैतृक गांव देवप्रयाग लयै ग्या शहीद राजेंद्र सिंह कू पार्थिक शरीर, सैन्य सम्मान के साथ शहीद थै दिये ग्या अंतिम विदाई.
7. चारधाम यात्रा थै लेकि ऋषिकेश पुलिस कू न्यु ट्रैफिक प्लान: चारधाम यात्रा थै लेकि ऋषिकेश पुलिस ना कसी कमर, नगरवासियों थै ट्रैफिक से निजात दिलाणा खुण बणाई न्यु ट्रैफिक प्लान, अब यात्रा का दौरान बाहरी राज्यों से आणा वला वाहनों थै श्यामपुर बाईपास से भेजे जालु पहाड़, वखि पहाड़ बटि आण वला सभी वाहनों थै बाइपास से भेजे जालु हरिद्वार, शहर मा केवल लोकल वाहनों थै ही मिललु प्रवेश.
8. फायर सीजन मा अबतक वनाग्नि की 25 घटनाएं दर्ज: उत्तराखंड मा 15 फरवरी बटि फायर सीजन शुरूवात ह्वे गाई, जैका बाद से उत्तराखंड मा अब तक वनाग्नि का 25 मामला समणि ऐनि, जैमा 11 वनाग्नि की घटना कुमौ मंडल मा ही दर्ज किये ग्याई, वनाग्नि एवं आपदा प्रबंधन विभाग का मुताबिक, अबतक दावानल की घटनाओं से 27 हेक्टेयर से ज्यादा वन संपदा थै नुकसान पौंचि.
9. फर्जी कोरोना टेस्टिंग मामला मा आरोपियों थै नि मिली राहत: हरिद्वार कुंभ का दौरान फर्जी कोरोना टेस्टिंग मामला मा आरोपियों थै आज भी नि मिली नैनीताल हाईकोर्ट बटि राहत, न्यायमूर्ति आलोक कुमार वर्मा की एकलपीठ ना आरोपियों की जमानत याचिका करि निरस्त, सरकार थै 24 मार्च तक कोर्ट मा केस डायरी पेश कना कू दे आदेश.
10. उत्तराखंड मा दिखेणी च होली की रौनक: उत्तराखंड मा दिखेणी च होली की रौनक, रंग, अबीर गुलाल और पिचकारी से सजी छिन दुकनी, पिछला साल का मुकाबला होली का सामानों मा दिखेणी च 25 से 30 फिसदी की बढ़ोत्तरी, बावजूद यैका लोग जमकर कना छिन खरीदरी, 19 मार्च का दिन उत्तराखंड मा मनै और खेले जाली होली.
