अपणुं उत्तराखंडः दिनभरै खास खबर, एक नजर मा

अपणीं बोली और अपणीं भाषा मां देश भर की बड़ी और खास खबरुं पर एक नजर.

मां प्रधानमंत्री नरेन्द्र मोदी न करी डिफेंस एक्सपो कु उद्घाटन
लखनऊ मां प्रधानमंत्री नरेन्द्र मोदी न करी डिफेंस एक्सपो कु उद्घाटन . हथियारुं का ये मेला मां देश का कई बड़ा रक्षा उत्पाद आला नजर, करीब 40 देशु का रक्षा मंत्री ये कार्यक्रम मां भाग लेंणा छन. ये कार्यक्रम मां रक्षा का सामान बणौंन वली लगभग एक हजार कंपनी अपणी उत्पादु की प्रदर्शनी लगौणां छन.

निर्भया केस मां दिल्ली हाईकोर्ट न दुष्कर्मियूं थै अलग-अलग-अलग फांसी देंण से मना करैली. यां से पैली दिल्ली की पटियाला हाउस कोर्टन निर्भया का दोष्यूं का डेथ वारंट पर अमल कन से रोक लगै छै. जैका बाद केंद्र सरकार न दिल्ली हाई कोर्ट में याचिका दायर करी छै, जैमा आज दिल्ली हाई कोर्टन फैसला सुणै. सॉलीसीटर जनरल तुषार मेहता न कोर्ट मां बोली दोषी अपणी फांसी थै टालनौ जांणबूझी कानूनी मशीनरी दगणी खेल छन कना.

जम्मू कश्मीर मां सीआरपीएफ और आतंक्यूं का बीच मुठभेड़ मां द्यूं आतंकी ढेर ह्वै गिन. जबकि एक आंतकी थै घायल हालत मां पकडैं गी. ईं मुठभेड़ मां एक सीआरपीएफौं एक जवान शहीद ह्वे गी. शहीद हुआ जवान जीडी रमेश रंजन बिहारौ आरा कु रौंण वालु छौ.

नैनीताल-उधम सिंह नगर सांसद अजय भट्टन एक बार फिर लोकसभा मां ऋषिकेश-कर्णप्रयाग रेल लाइनौं मुद्दा उठै. ज्यां मां उंन केंद्र सरकारौं बजट खतम होंण पर अतिरिक्त बजट देणें मांग करी. .अजय भट्टन सदन मां बथै कि ऋषिकेश कर्णप्रयाग रेल लाइन 126 किलोमीटर लंबी च, जै मां 16 सुरंग, 16 पुल बणये जांण . जै थे 16 हजार 216 करोड़ों बजट पास ह्वे छौ, जु बढ़ी 22 हजार 42 करोड़ ह्वे गी.

ऋषिकेश का पूर्णानंद गंगा घाट मां हवलदार रमेश बहुगुणा थै आज नम आंखों विदाई दिये गी. पूर्णानंद गंगा घाट पर उंका बड़ै भैजी दिनेश बहुगुणन शहीद रमेश थै मुखाग्नि दिनी. ये दौरान गंगा घाट पर अंतिम विदाई देंण वालौं कु हुजूम कट्टा ह्वै. सेना की सशस्त्र टुकड़ी न सलामी दे कै शहीद थै पुष्प अर्पित करीन, ये दौरान विधानसभा अध्यक्ष प्रेमचंद अग्रवाल ने भी पूर्णानंद गंगा घाट पर मौजूद रैन.

उत्तराखंड मां औंण वला महीनों मां राज्य सरकार तीन बड़ा इवेंट करौंण जाणी च, यूं इवेंट प्रदेश मां साहसिक पर्यटन, योग और वैलनेस का नया आयामु थै स्थापित कनौं कये जांणा छन, मुख्य सचिव उत्पल कुमार सिंहन बथै कि रामनगर मां एडवेंचर समिट रामनगर आयोजित किये जालू, जैमा अंतरराष्ट्रीय स्तरै कंपन्यूं दगणिकई देशूं का राजदूतों थै आमंत्रण भेजे गी.

हरिद्वार मां होंण वाला 2021 महाकुंभ की तैयारियुं थै लेके शासन-प्रशासन और संत लगातार बैठक छन कन्ना. महाकुंभैं धीमी तैयारियों थै लेकी अखिल भारतीय अखाड़ा परिषदन 8 फरवरी कु एक अहम बैठक बुलैईं च. या बैठक कनखला निर्मल अखाड़ा मां आयोजित कयै जाली. ईं बैठक मां सभी 13 अखाड़ुं का प्रमुख संत भाग लेला.

खटीमा का सितारगंज कोतवाली क्षेत्र का सिसौना गौं मां ड्यूटी जांद एक युवक थै तेज रफ्तार ट्रकन कुचलेली. जैसे वे की मौका पर ही मौत ह्वै गी. घटना का बाद युवका परिजनों और ग्रामीणुं शव थै सड़क पर रखी जाम लगै. उंन ट्रक चालकै गिरफ्तारी मांग करी. ग्रामीणुं बोली जब तक गिरफ्तारी नी ह्ववे तब तक उंन जाम लगै कै रखंण.

पौड़ी मां लगातार अवैध शराबै बिक्री पर रोक लगौंणौ आबकारी विभागन मंगलवार देर रात छापेमारी अभियान चलै. जैं मां एक ट्रक से 63 पेटी अवैध अंग्रेजी शराब बरामद करे गी. जै की कीमत बजार मां 3.48 लाख रुप्या बथैंय जांणी च. बथैय जांणू त कि यूं दारुं देवप्रयाग बटी पौड़ी लये जांणी छैं.

श्रीनगर मां बीएसएनएल का अनुबंधित कर्मचारी अनिश्चितकाल हड़ताल पर चली गेन. यूं कर्मचारीयूं थै पिछले 10 महीना बटी तनख्वाह नी दिये गी, जै का कारण यू गुस्सा मां छन, ये दौरान कर्मचारियूंन बोली की वेतन न मिन से उं का समंणी भुखमरी नौबत ए गी. बतौं द्या कि बीएसएनएल लगातार घाटा मां जाणूं च, जैका कारण विभागा कई स्थाई कर्मचारी स्वैच्छिक सेवानिवृत्ति लेंणा छन, अब अनुबंधित कर्मचारयूं की हड़तालन बीएसएनएलै परेशानी बढ़ सकदी.

पर्यटन विभाग का बाद अब नेहरू पर्वतारोहण संस्थान भी दयारा बुग्याल मां स्नो स्कीइंग की सम्भावनाउं थै खोजणूं च. जै का कारण दयारा बुग्याल मां नेहरू पर्वतारोहण संस्थान न 15 दिनों स्नो स्कीइंग प्रशिक्षण शिविर आयोजित करी. ये शिविर मा 30 युवक- युवतियों न भाग लिनी. यख सभी प्रतिभागियूंन स्नो स्कीइंग की बारीक्यूं थै जांणी.