तीसरी दां दिल्ली का मुख्यमंत्री बंणला अरविंद
दिल्ली में प्रचंड जीत का बाद आज 'आप' विधायक दल की बैठक बुलये गी. जैमा अरविंद केजरीवाल थै विधायक दैलौ नेता चुणें गी. बैठक में मनीष सिसोदिया न अरविंद केजरीवाल थै मुख्यमंत्री बणौंन प्रस्ताव रखी. जैका बाद अब 16 फरवरी कु अरविंद केजरीवाल तीसरी दां दिल्ली का मुख्यमंत्री पद की शपथ लेला.
एलपीजी सिलेंडर 144.5 रुप्या ह्वे मैंगु
अंतरराष्ट्रीय बाजार मां दामुं मां तेजी औंण से तेल कंपन्यून बुधवारौ घरेलू गैस का दाम 144.5 रुपए प्रति सिलेंडर बढ़ै यिन. अब 14.2 किलोग्राम वाला एलपीजी सिलेंडरै दाम 714 रु. प्रति सिलेंडर से बढीक 858.50 रुपए प्रति सिलेंडर ह्वे गी.
उत्तराखंड कैबिनेट मां 10 प्रस्तावुं पर लगी मुहर
मुख्यमंत्री त्रिवेंद्र सिंह रावतै अध्यक्षता मां आज दूसरी ई-कैबिनेट बैठक आयोजित करे गी. बैठक मा 13 प्रस्तावुं में से 10 पर कैबिनेटन अपणी मुहर लगै, जबकि तीन प्रस्तावुं पर अगली बैठक मां चर्चा ह्वे सकदी. यां का अलावा शासकीय प्रवक्ता मदन कौशिकन बथैं कि कैबिनेट मां शिक्षा विभाग से जुड्यां भी कई फैसला लिये गिन.
मुख्यमंत्रीन लिनी यूकाडा की बैठक
मंगलवारौं मुख्यमंत्री त्रिवेन्द्र सिंह रावतै अध्यक्षता मां उत्तराखण्ड नागरिक उड्डयन विकास प्राधिकरण (यूकाडै निदेशक मण्डलै पांचवी बैठक आयोजित करे गी. जैमां कई महत्वपूर्ण विषयों पर चर्चा करे गी. बैठक मां मुख्यमंत्रीन बोली कि प्रदेश मां हेली सेवाऊं का विस्तार पर ध्यान दैंणे जरुरत च. ऊंन बोली की हेलीपैड निर्माण से चारधाम यात्रा का साथ-साथ पर्यटन क्षेत्र मां निजी भागीदारी एवं निवेश थै बढ़ावा मिललूं.
योगी का पिताजी से सीएम न करी मुलाकात
बुधवारौ सीएम त्रिवेंद्र सिंह रावत न योगी आदित्यनाथा पिताजी आनंद सिंह बिष्ट दगणि मुलाकात करी ऊं कु हाल चाल जांणी.आनंद सिंह बिष्ट पिछली कई दिन बटी तबीयत खराब होंणा कारण जौलीग्रांट अस्पताल मां भर्ती छन ह्वेया. फिलहाल उंनी हालत मां सुधार होंणु च, जल्द ही उं थै अस्पताल बटी छुट्टी मिल सकदी.
कुंभ तैयारी तेज
प्रशासन कुंभ मेला थै सकुशल संपन्न करौंण नई तकनीक पर विचार कनु च. जै थे मंगलवारौ मेलाधिकारी दीपक रावत न सड़क कुं गड्ढों थै भन वली एक नई तकनीक एमएमए कु डेमो लिनी . दिल्ली बटी आंई एक निजी कंपनी न एमएमए का माध्यम से सड़कुं कै गड्ढ़ा भरा दिखैन.
फर्जी डिग्रीधारी मास्टरुं पर SIT जांच
स्कूलूं मां फर्जी प्रमाण पत्र पर काम कन वाला मासटरुं का बुरा दिन औंण वाला छन. फर्जी डिग्री मामला मां उत्तराखंडा साढ़े तीन हजार मास्टरुं पर SIT जांच की तलवार लटकंणी च. फर्जी प्रमाण पत्र पर काम कन वाला सभी मास्टरुं पर औंण वाला टैम मां जांच कु शिकंजा कस सकदू.
श्रीनगरैं गल्यूं मां दौड़लूं ई-रिक्शा
श्रीनगर गढ़वाल मां आज नगर पालिका और आरटीओ विभागन ई-रिक्शा और ऑटो की पैलु ट्रायल करै गी. ये दौरान रिक्शा मां नगर पालिका अध्यक्ष, एआरटीओ और एसडीएम भी बैठ्या नजर एनी. अगर नगर पालिका और आरटीओं कु यू प्रयोग सफल ह्वे त जल्द ही श्रीनगर मां ई-रिक्शा और ऑटो दौड़द नजर आला.
23 फरवरी तक बंण जाला किसान क्रेडिट कार्ड
पिथौरागढ़ जिला मां 22 हजार काश्तकारु थै प्रशासनै तरफां बटी किसान क्रेडिट कार्ड से लाभान्वित करै जालू. अभी तक प्रशासन न 30 हजार काश्तकारुं का किसान क्रेडिट कार्ड बणैं लिन. बाकी काश्तकारुं का कार्ड 23 फरवरी तक बणौं जाला. यां कु थैं गौं मां कैंप लगै थै कार्ड तैयार किये जांणा छन
