પાણી માટે નહીં વીજળી માટે નર્મદા પર થઈ રહ્યું છે રાજકારણઃ નીતિન પટેલ

ગાંધીનગરઃ મધ્યપ્રદેશના કેબિનેટ પ્રધાન હનીસિંગે નર્મદાના પાણી છોડવાના મુદ્દે ગુજરાતને નિવેદન કર્યું હતું. ત્યારે એકવાર ફરી ગુજરાતમાં નર્મદાના પાણીને લઈને રાજકારણ ગરમાયું છે.

આ અંગે રાજ્યના નાયબ મુખ્યપ્રધાન નીતિન પટેલે જણાવ્યું કે, આ રાજકારણ પીવાના પાણીના મુદ્દે નહી, પરંતુ વીજળી માટે થઈ રહ્યું છે.

ગુજરાત, મહારાષ્ટ્ર, રાજસ્થાન અને મધ્યપ્રદેશ દ્વારા સુપ્રીમ કોર્ટમાં પાણી અંગેની અરજી કરવામાં આવી હતી. જેમાં સુપ્રીમ કોર્ટે તમામ રાજ્યોના ભાગમાં પાણી કેટલું આવશે તે પ્રમાણેનો ચુકાદો આપ્યો હતો. જ્યારે ગુજરાત રાજ્યને સુપ્રીમ કોર્ટના ચુકાદા પ્રમાણે જ પાણીનો જથ્થો પ્રાપ્ત થાય છે, પરંતુ જે રીતે નર્મદા મુદ્દે રાજકીય નિવેદન થઈ રહ્યા છે, તેની પાછળ મહત્ત્વનું કારણ અત્યારે મધ્યપ્રદેશને વીજળી મળી નથી રહી તે છે. સાથે જ તેઓને ખાનગી કંપની પાસેથી વીજળી ખરીદવાનો સમય આવ્યો છે, તેના માટે આ પ્રકારના રાજકીય નિવેદનો થઈ રહ્યાં છે.

નાયબ મુખ્યપ્રધાન નીતિન પટેલે જણાવ્યું કે, મધ્યપ્રદેશમાંથી પસાર થતી નર્મદા નદી પર બે ડેમ બાંધવામાં આવ્યા છે. જેમાં ઈન્દિરા સાગર ડેમ તથા બીજા અન્ય બે ડેમ બાંધવામાં આવ્યા છે. આ બંને ડેમ સંપૂર્ણપણે પૂરા ભરાઈ જાય ત્યારબાદ નર્મદામાં પાણી છોડવામાં આવે છે. સાથે જ આ પાણી ગુજરાતના સરદાર સરોવર ડેમમાં પણ આવે છે. જ્યારે સરદાર સરોવર ડેમ અને ઈન્દિરા સાગર ડેમ વચ્ચેનું અંતર 200 કિમી આસપાસનું છે.