Delhi Exit Poll: 'આમ આદમી'ની વાપસીના સંકેત, ભાજપનું સારૂ પ્રદર્શન, કોંગ્રેસ હતી ત્યાંની ત્યાંનું અનુમાન

દિલ્હી વિધાનસભા ચૂંટણીનું મતદાન પુરૂ થયા બાદ આવેલા અંદાજે બધા જ એક્ઝિટ પોલમાં આમ આદમી પાર્ટી (AAP)ને મોટી જીતનું અનુમાન લગાવવામાં આવી રહ્યું છે. દિલ્હી વિધાનસભા ચૂંટણીનું 11 ફેબ્રુઆરીના રોજ પરિણામ આવવાનું છે, ત્યારે મતદાન પૂર્ણ થયાં બાદ અનેક ન્યૂઝ એજન્સીઓએ એક્ઝિટ પોલને લઈ અનુમાન જાહેર કર્યાં છે. જેમાં દિલ્હીમાં ફરી એક વખત કેજરીવાલની સરકાર આવી શકે છે.

નવી દિલ્હી: દિલ્હી વિધાનસભા ચૂંટણી માટેનું મતદાન પૂર્ણ થયું છે અને 11 ફેબ્રુઆરીના રોજ મતગણતરી કરવામાં આવશે. આ પહેલા આવેલા એક્ઝિટ પોલના અનુમાનમાં આમ આદમી પાર્ટી ફરી સતા પર આવે તેવા સંકેતો જોવા મળી રહ્યા છે. ભાજપને સફળતા મળી નથી, જો કે, ભાજપ પાર્ટી હજુ પણ દાવો કરી રહી છે કે, દિલ્હીમાં પોતાની સરકાર બનશે.

મહત્વનું છે કે, દિલ્હીમાં વિધાનસભાની ચૂંટણી માટે કુલ 70 બેઠક માટે 672 ઉમેદવાર મેદાનમાં છે. અગાઉ વર્ષ 2015માં દિલ્હી વિધાનસભા ચૂંટણી યોજાઈ હતી. આમ આદમી પાર્ટીએ 70 પૈકી 67 બેઠક પર જીત મેળવી હતી. ભાજપને ફક્ત 3 બેઠક જ મળી હતી. જો કે, 15 વર્ષ દિલ્હીની સત્તા પર રહેલી કોંગ્રેસનું ખાતુ પણ ખુલ્યું નહોતું. આ વખતે પણ મુખ્ય સ્પર્ધા તો ભાજપ અને AAP વચ્ચે જ દેખાઈ છે. જોકે, કોંગ્રેસનો દાવો છે કે, દિલ્હીના પરિણામો સૌને માટે આશ્ચર્યજનક રહેશે. શાહીન બાગ સહિત રાજધાનીના ઘણા વિસ્તારોમાં દિવસભર પોલિંગ બૂથો પર વોટર્સની લાંબી લાઇનો જોવા મળી હતી. CAA વિરોધી પ્રદર્શનનું કેન્દ્ર બનેલું શાહીન બાગનું ઓખલા વિધાનસભા ક્ષેત્રમાં પાંચ પોલિંગ બૂથ હતાં.