નવી દિલ્હી : શ્વાનોના હુમલાના મામલાઓની વધતી સંખ્યાને ધ્યાનમાં રાખીને કેન્દ્ર સરકારે ભારતમાં 23 ખતરનાક શ્વાનોની જાતિ પર પ્રતિબંધ મૂકવાનો પ્રસ્તાવ જારી કર્યો છે. આ સંદર્ભમાં, કેન્દ્ર સરકારે રાજ્ય સરકારોને એક પત્ર લખીને ખતરનાક માનવામાં આવતી કેટલીક શ્વાનોની આયાત, વેચાણ અને સંવર્ધન પર પ્રતિબંધ મૂકવા જણાવ્યું છે. આ ખતરનાક જાતિઓમાં રોટવેઇલર્સ, માસ્ટિફ્સ અને પિટબુલ્સનો સમાવેશ થાય છે. આ શ્વાનોની મિશ્ર જાતિઓ અને સંકર જાતિઓ પણ પ્રતિબંધમાં શામેલ છે.
વધુ બ્રિડિંગ અટકાવાશે : કેન્દ્ર સરકારના પશુપાલન અને ડેરી વિભાગે 12 માર્ચના રોજ તમામ રાજ્યો અને કેન્દ્રશાસિત પ્રદેશોના મુખ્ય સચિવોને લખેલા પત્રમાં એમ પણ કહ્યું હતું કે આ શ્વાનોની જાતિઓ, જેઓ પહેલાથી જ પાલતુ તરીકે રાખવામાં આવી છે, તેમનું વધુ બ્રિડિંગ કરવામાં ઉછેરવામાં ન આવે, એવી વ્યવસ્થા થવી જોઈએ. રજૂઆતોને ધ્યાનમાં રાખીને કેન્દ્ર સરકારના પશુપાલન અને ડેરી વિભાગે પશુપાલન કમિશનરની અધ્યક્ષતામાં વિવિધ હિતધારક સંસ્થાઓના સભ્યો અને નિષ્ણાતો સાથે નિષ્ણાત સમિતિની રચના કરી હતી.
રાજ્ય સરકારોને વિનંતી કરી : પશુપાલન અને ડેરી વિભાગે તેના પત્રમાં રાજ્ય સરકારોને વિનંતી કરી છે કે તેઓ આ ખતરનાક શ્વાનોના વેચાણ અને સંવર્ધન માટે લાયસન્સ અથવા પરમિટ આપવાથી દૂર રહે. જે માલિકો પહેલાંથી જ આ જાતિઓ પાળતુ પ્રાણી તરીકે ધરાવે છે તેમને પ્રતિબંધિત પ્રજાતિનું વધુ સંવર્ધન અટકાવવા માટે તેમનું પ્રજનન અટકાવવા અથવા ખસીકરણ કરવા માટે પ્રોત્સાહિત કરવા જોઈએ.
સરકાર દ્વારા પ્રતિબંધિત 23 શ્વાનોની જાતિઓની સંપૂર્ણ સૂચિ
- પિટબુલ ટેરિયર
- ટોસા ઇનુ
- અમેરિકન સ્ટાફોર્ડશાયર ટેરિયર
- ફિલા બ્રાઝિલીરો
- ડોગો આર્જેન્ટિનો
- અમેરિકન બુલડોગ
- બોઅરબોએલ કંગાલ
- મધ્ય એશિયન ભરવાડ કૂતરો
- કોકેશિયન શેફર્ડ કૂતરો
- દક્ષિણ રશિયન શેફર્ડ કૂતરો
- ટોર્નજેક
- સરપ્લાનિનાક
- જાપાનીઝ ટોસા
- અકીતા
- માસ્ટિફ
- ટેરિયર્સ
- રોડેસિયન રિજબેક
- વુલ્ફ કૂતરો
- કેનારીયો
- અકબશ કૂતરો
- મોસ્કો ગાર્ડ કૂતરો
- કેન કોર્સો
- બેન્ડોગ
પેટ શોપ્સના નિયમોનું અમલીકરણ : પત્રમાં પ્રાણી કલ્યાણ જૂથો દ્વારા શ્વાનોની ચોક્કસ જાતિઓને પાળતુ પ્રાણી તરીકે રાખવા અંગેની ચિંતાઓને પણ પ્રકાશિત કરવામાં આવી છે. 23 ' ક્રૂર ' જાતિઓ પરની આ ભલામણ ઉપરાંત કેન્દ્ર સરકારે રાજ્ય સરકારોને પ્રિવેન્શન ઓફ ક્રુઅલ્ટી ટુ એનિમલ્સ ( ડોગ બ્રીડિંગ એન્ડ માર્કેટિંગ ) રૂલ્સ 2017-18 અને પ્રિવેન્શન ઓફ ક્રુઅલ્ટી ટુ એનિમલ્સ (પેટ શોપ્સ) 2017ના નિયમોના અમલીકરણની ખાતરી કરવા પણ જણાવ્યું હતું.
- Dog Attack: રખડતા શ્વાનોનો આતંક, નવસારીમાં આંગણે રમી રહેલા ચાર વર્ષના બાળક પર શ્વાનોએ હુમલો કરતાં મોત
- Dog Attack In Kodinar: શિકારી શ્વાન, ચાર માસની બાળકીને ફાડી ખાતા બાળકીનું મોત
