গ্ৰীষ্মকাল আহিলেই লগত লৈ আহে ছালৰ ইটো-সিটো সমস্যা ৷ গৰমৰ দিনকেইটাত বলি থকা বতাহত উৰি ফুৰে বিভিন্ন বেমাৰৰ বীজাণু ৷ এই গ্ৰীষ্ম ঋতুত বহুতো স্বাস্থ্য সম্পৰ্কীয়, বিশেষকৈ ছাল সম্পৰ্কীয় সমস্যাই সকলোকে আমনি কৰে । এই সমস্যাসমূহৰ মাজত আটাইতকৈ আমনিদায়ক হ’ল ঘামচি ৷ ঘামচিৰ সমস্যাই যিকোনো বয়সৰ ব্যক্তিকে আমনি কৰিব পাৰে ৷ অত্যাধিক সংবেদনশীল ছালৰ মানুহৰ বাবে ঘামচি হৈ পৰে মাৰাত্মক ৷ ঘামচিৰ ফলত হোৱা ঘাঁবোৰে ছালৰ বাবে অধিক সমস্যাৰ সৃষ্টি কৰে । কেইটামান সাৱধানতা অৱলম্বন কৰি আৰু কিছুমান ঘৰুৱা প্ৰতিকাৰৰ সহায়ত ঘামচিৰ পৰা পৰিত্ৰাণ পাব পাৰি (Home remedies for heat rashes) । কিন্তু তাৰ পূৰ্বে জানো আহক ঘামচি কেনে ধৰণৰ সমস্যা, ই কিয় হয় আৰু শৰীৰত ই কেনেধৰণে প্ৰভাৱ পেলায় ৷
মুম্বাইৰ ডাৰ্মা ক্লিনিকৰ চৰ্মৰোগ বিশেষজ্ঞ ডাঃ চাবা শ্বেখে কৈছে গ্ৰীষ্মকালত হোৱা ছালৰ সমস্যাবোৰৰ ভিতৰত আটাইতকৈ আমনিদায়ক হৈছে ঘামচিৰ সমস্যা ৷ সচৰাচৰ সকলোৰে ক্ষেত্ৰতে ঘামচিৰ সমস্যাই দেখা যায় । সাধাৰণতে পিঠি, ডিঙি আৰু বুকুত ঘামচি হয় ৷ দেহত প্ৰথমতে সৰু সৰু ৰঙা গুটি হয় । এই গুটিবোৰ যথেষ্ট খজুৱাই আৰু জ্বলা-পোৰা কৰে । দৰাচলতে গ্ৰীষ্মকালত মানুহ বেছিকৈ ঘামে ৷ কিন্তু প্ৰদূষণ, ধুলি-মাটি, মৃত ছালৰ কোষ বা যিকোনো বেক্টেৰিয়াৰ প্ৰভাৱৰ বাবে বহু সময়ত ঘাম গ্ৰন্থিবোৰৰ মুখ বন্ধ হৈ যায় । যাৰ ফলত ঘাম ছালৰ বাহিৰলৈ ওলাব নোৱাৰা হয় যি পিছলৈ সৰু সৰু ৰঙা গুটি হিচাপে ওলাবলৈ আৰম্ভ কৰে । ডাঃ চাবাই বৰ্ণনা কৰে যে যদিও ই এক গুৰুতৰ সমস্যা নহয় কিন্তু তথাপিও ঘামচিৰ ফলত হোৱা খজুৱতি আৰু জ্বলা-পোৰাই মানুহ এগৰাকীক যথেষ্ট আমনি দিয়ে ৷
ঘামচিৰ বাবে ঘৰুৱা প্ৰতিকাৰ:
ইন্দোৰৰ এগৰাকী প্ৰাকৃতিক আৰু হোমিঅ'পেথিক চিকিৎসক ডাঃ স্মিতা কাম্বলে আঙুলিয়াই দিছে যে ঘামচিৰ বাবে সাধাৰণতে অতি ব্যয়বহুল চিকিৎসাৰ কোনো প্ৰয়োজন নাই ৷ ঘৰুৱা প্ৰতিকাৰ আৰু অলপ সাৱধানতা অৱলম্বন কৰিলেই ঘামচিৰ পৰা পৰিত্ৰাণ পাব পাৰি । তেওঁ লগতে বৰ্ণনা কৰে যে নেচাৰোপেথিত বহুতো ব্যৱস্থা আছে যাক ঘামচিৰ সমস্যা হ্ৰাস কৰিবলৈ ব্যৱহাৰ কৰিব পাৰি (skin care tips) । তলত কেইটামান প্ৰাকৃতিক উপায় উল্লেখ কৰা হ’ল-
এলোভেৰা
ডাঃ স্মিতাই কৈছে যে এলোভেৰাৰ ব্যৱহাৰে ঘামচিৰ সমস্যাত যথেষ্ট লাভালাভ প্ৰদান কৰে । গ্ৰীষ্মকালত দৈনিক 15 ৰ পৰা 25 মিনিটৰ বাবে এলোভেৰা জেল ঘামচি হোৱা স্থানত সানি ধুই দিলে যথেষ্ট সকাহ পোৱা যায় ৷
মুলতানী মাটি
ডাঃ স্মিতাই ঘামচিৰ চিকিৎসাত মুলতানী মাটিক আদৰ্শ বুলি গণ্য কৰিছে । মুলতানী মাটিত ৰ’জ ৱাটাৰ মিহলাই ঘামচি হোৱা স্থানত প্ৰয়োগ কৰিলে ই খজুৱতি আৰু জ্বলা-পোৰাৰ পৰা সকাহ দিয়ে ।
কেঁচা আলুৰ ৰস
কেঁচা আলুৰ ৰসো ঘামচিৰ পৰা পৰিত্ৰাণ পোৱাৰ বাবে অতি উপকাৰী। আলুৰ ৰস প্ৰায় 10 ৰ পৰা 15 মিনিটৰ বাবে ঘামচি হোৱা জেগাত লগাই ৰাখিব লাগে আৰু তাৰ পিছত ঠাণ্ডা পানীৰে ধুই দিব লাগে । আলুৰ ৰসে ছালক আন বহুতো লাভালাভ প্ৰদান কৰে ।
মেহেন্দি
ডাঃ স্মিতাই কৈছে যে যদি ছালত ৰং লগাৰ আপত্তি নাথাকে তেন্তে ঘামচিত মেহেন্দি পেষ্টো ব্যৱহাৰ কৰিব পাৰে । দৰাচলতে, মেহেন্দিৰ প্ৰাকৃতিক বেক্টেৰিয়া-ৰোধী গুণাগুণ আছে ৷ লগতে এষ্ট্ৰোজেন আৰু অন্যান্য উপাদান আছে যি প্ৰাকৃতিকভাৱে ছালৰ শীতলতা বজাই ৰাখে ।
হালধী
মেহেন্দিৰ দৰে হালধীৰো এণ্টিবেক্টেৰিয়েল আৰু এণ্টিচেপ্টিক গুণাগুণ আছে । হালধীৰ পেষ্ট গা ধোৱাৰ আগতে 5 ৰ পৰা 10 মিনিটৰ বাবে ঘামচি হোৱা স্থানত প্ৰয়োগ কৰি যথেষ্ট সকাহ পাব পাৰি ।
তিয়হৰ ৰস
গ্ৰীষ্মকালত ঘামচিত তিয়ঁহৰ ৰসৰ সৈতে কেইটোপালমান নেমুৰ ৰস মিহলাই সানিলে সমস্যাটোৰ পৰা যথেষ্ট সকাহ পোৱা যায় ।
ডাঃ স্মিতাই আঙুলিয়াই দিছে যে আন কিছুমান কথাত গুৰুত্ব দিওঁ ঘামচিৰ সমস্যাৰ পৰা পৰিত্ৰাণ পাব পাৰি -
ঠাণ্ডা পানীৰে গা ধুলে ঘামচিৰ সমস্যাৰ পৰা অলপ সকাহ পোৱা যায় ।
ফেনৰ চলাই নতুবা আন উপায়েৰে ছালখন ঠাণ্ডা কৰি ৰাখিবলৈ চেষ্টা কৰক ।
পাতল, ঢিলা আৰু এনে কাপোৰ পিন্ধিব যিয়ে ঘাম শুহি লয় ৷ শৰীৰৰ প্ৰতিটো অংশ সতেজ বতাহৰ সংস্পৰ্শলৈ আহিব পৰা কাপোৰ পিন্ধিব লাগে ।
শৰীৰৰ যিবোৰ অংশলৈ সহজে বায়ু চলাচল কৰিব নোৱাৰে সেই অংশবোৰৰ বিশেষ যত্ন ল'ব ৷ লগতে এই অংশবোৰ ভালদৰে পৰিষ্কাৰ কৰিব আৰু শুকুৱাৰ পিছত এইবোৰত গোন্ধ নথকা, নিম্ন-সুগন্ধি বা ঔষধযুক্ত টেলকাম পাউডাৰ প্ৰয়োগ কৰিব ।
এলাৰ্জীৰ বিষয়ে জানি লওঁক:
ডাঃ স্মিতাই শেষত উল্লেখ কৰিছে যে যদিও এই ঘৰুৱা প্ৰতিকাৰবোৰ অতি কাৰ্যকৰী কিন্তু সেইবোৰ গ্ৰহণ কৰাৰ আগতে এলাৰ্জীৰ বিষয়ে পৰীক্ষা কৰাটো অতি জৰুৰী । তাৰোপৰি ঘামচিৰ সমস্যাটোৱে অত্যাধিক আমনি কৰা যেন অনুভৱ হ’লে কোনো চৰ্মৰোগ বিশেষজ্ঞৰ পৰামৰ্শ লোৱাটো অতি গুৰুত্বপূৰ্ণ ।
লগতে পঢ়ক: Healthy benefits of curry leaves: স্বাস্থ্যৰ বাবে উপকাৰী গুণেৰে পৰিপূৰ্ণ নৰসিংহ পাত
