অসমত এনে বহু বনৌষধি আছে যি আমাৰ শৰীৰৰ বাবে অতি লাগতিয়াল ৷ কটা, চিঙা, পেটৰ অসুখলৈকে বিভিন্ন বনৌষধি অসমত উপলব্ধ ৷ অসমত আজিও বহুলোক আছে যিয়ে চিকিৎসকৰ ওচৰলৈ যোৱাৰ সলনি বনৌষধিৰেই নিজৰ চিকিৎসা কৰে ৷ তাৰেই মাজৰ এবিধ বনৌষধিৰ বিষয়ে আজি আমি ক’বলৈ ওলাইছো আৰু সেয়া হৈছে আপোনাৰ মোৰ সকলোৰে পৰিচিত মানিমুনি ৷
মানিমুনি এবিধ বনৌষধি উদ্ভিদ ৷ ইয়াৰ বৈজ্ঞানিক নাম চেনটেলা ত্ৰিছয়াটিকা ৷ এইবিধ উদ্ভিদ সাধাৰণতে বোকা মাটিত হোৱা এবিধ জলজ উদ্ভিদ ৷ ফুলনিৰ বাগিচা, জলাশয় বা পুখুৰীৰ পাৰ আদিত ইয়াক সহজে পোৱা যায় ৷ ইয়াৰ পাতবোৰ খাজ কটা, সৰু, মিহি ৷ আমি সকলোৱে জানো যে মানিমুনি শাক আমাৰ শৰীৰৰ বাবে কিমান দৰকাৰী ৷
বিশেষকৈ, পেটৰ যিকোনো বেমাৰৰ বাবে ই এবিধ মহৌষধ স্বৰূপ৷ যদি মানিমুনিৰ ৰস আনি নিয়মীয়াকৈ খাও তেন্তে পেটৰ সমস্যাত আমি কোনোদিনে ভুগিব নালাগে ৷ কেৱল পেটৰ অসুখতে নহয়, আলচাৰ, হাপানিৰ লগতে চৰ্ম ৰোগৰ বাবেও মানিমুনি শাক খুবেই এবিধ লাগতিয়াল বনৌষধি ৷ মানিমুনিয়ে মস্তিষ্কৰ কোষবোৰ গঠনত সহায় কৰে ৷
বিভিন্ন কাৰণত আমাৰ শৰীৰৰ মৃত কোষৰ বাবে ছালখন শুকান যাবলৈ ধৰে, মানিমুনিৰ ৰসে সেই মৰিবলৈ ধৰা কোষবোৰ পুনৰ গঠন কৰি ছালখনক সজীৱ কৰি ৰখাত সহায় কৰে ৷ মানিমুনিয়ে স্নায়ুতন্ত্ৰ সক্ৰিয় কৰি তোলাত সহায় কৰে ৷ এইবিধ বনৌষধিৰ সেৱন কৰিলে আমাৰ চুলি পকা, সৰা আদি বন্ধ হয় ৷
দেহত কোনো পুৰণি ক্ষতস্থান থাকিলে ইয়াৰ ৰস ব্যৱহাৰ কৰিলে নিৰাময় পোৱা যায় ৷ মানিমুনি ৰসে স্বাস্থ্য সতেজ কৰাৰ উপৰিও আমাৰ যৌৱন ধৰি ৰখাতো সহায় কৰে ৷ আমি পৰাপক্ষত মানিমুনি শাক খাই আমাৰ শৰীৰক সুস্থ-সতেজ কৰি ৰাখিব পাৰো ৷
লগতে পঢ়ক: Beetroot: এবাৰ এনেদৰে খাওক বিটৰ এই চালাড; হ্ৰাস হ’ব ওজন সুৰক্ষিত হ’ব হৃদযন্ত্ৰ
