ওদালগুৰি,30অক্টোবৰ: হাতী মানুহৰ সংঘাতে ভয়াৱহ ৰূপ ধাৰণ কৰা ওদালগুৰি জিলাত পুনৰ ৰহস্যজনকভাৱে মৃত্যুক সাৱটি ল'লে এটা বন্যহস্তীয়ে । বুধবাৰে পুৱা ওদালগুৰি জিলাৰ ভাৰত- ভূটান সীমান্তৰ ৩ নং ভূটীয়াচাঙত বন্যহস্তীটোৰ মৃতদেহ প্ৰত্যক্ষ কৰে স্থানীয় লোকে । জানিব পৰা মতে মঙলবাৰে নিশা ৭০-৮০ টা হাতীৰ বৃহৎ জাক এটাই গাঁও খনত প্ৰৱেশ কৰি খেতি পথাৰৰ তহিলং কৰিছিল । ৰাইজে বুধবাৰে পুৱা উক্ত খেতিপথাৰৰ কাষতে থকা পথত হাতীটোৰ মৃতদেহ প্ৰত্যক্ষ কৰে । পাচত এই সন্দৰ্ভত স্থানীয় ৰাইজে বন বিভাগৰ লোকক খবৰ দিয়াত বন বিভাগ ঘটনাস্থলীত উপস্থিত হৈ হাতীটোৰ মৰোণোত্তৰ পৰীক্ষাৰ ব্যৱস্থা কৰে ।
হাতীটোৰ মৃত্যৰ প্ৰকৃত কাৰণ এতিয়ালৈ জানিব পৰা হোৱা নাই যদিও খেতি পথাৰৰ চাৰিওপিনে কোনো লোকে তাঁৰেৰে বিদ্যুৎ সংযোগ কৰাৰ ফলত সেই তাঁৰত লাগি হাতীটোৰ মৃত্যু হোৱা বুলি সন্দেহ কৰা হৈছে । আনহাতে কোনো লোকে মৃত হাতীটোৰ শুৰৰ আগৰ কিছু অংশ আৰু নেগুৰৰ চুলি কাটি নিয়াকলৈ প্ৰতিক্ৰিয়া সৃষ্টি হৈছে প্ৰকৃতিপ্ৰেমীৰ মাজত । উল্লেখ্য যে, চলিত বৰ্ষতে ওদালগুৰি জিলাত ৬ টা বনৰীয়া হাতীৰ মৃত্যু হোৱাৰ লগতে হাতীৰ আক্ৰমণত মৃত্যু হৈছে ১৮জনকৈ লোকৰ ।
লগতে পঢ়ক - কাৰ্বি-আংলঙৰ খেৰণি আৰু গোৱালপাৰাৰ মাটিয়াত বনৰীয়া হাতীৰ তাণ্ডৱ
