ওদালগুৰি, 30 মে’: ওদালগুৰিৰ জিলা উপায়ুক্তৰ কাৰ্যালয়ত দেওবাৰে উপস্থিত হয় অসম চৰকাৰৰ মুখ্য সচিব জিষ্ণু বৰুৱা । ক’ভিডৰ ভয়াৱহতাৰ পৰিপ্ৰেক্ষিতত জিলাখনৰ প্ৰস্তুতি আৰু বৰ্তমানৰ অৱস্থা সম্পৰ্কে বুজ ল’বলৈ আৰু জিলাখনৰ বান পৰিস্থিতি তথা প্ৰস্তুতিৰ বিষয়ে জানিবলৈ জ্যেষ্ঠ বিষয়াসকলৰ সৈতে আলোচনাত মিলিত হয় মুখ্য সচিবগৰাকী ।
মুখ্য সচিবগৰাকীয়ে ক’ভিড টীকাকৰণত গুৰুত্ব প্ৰদান কৰিবলৈ নিৰ্দেশ দিয়াৰ লগতে 108 সেৱাৰ বিষয়ে ব্যাপক প্ৰচাৰ কৰিবলৈ, ৰাজহুৱা স্থানত মানুহৰ সমাগম ৰোধ কৰিবলৈ, ক’ভিড পৰীক্ষা ব্যাপকৰূপে কৰিবলৈ নিৰ্দেশ প্ৰদান কৰে ৷ তদুপৰি কণ্টেইণমেন্ট জ’ন আৰু তলা বন্ধৰ নিয়ম কঠোৰভাৱে বলবৎ কৰিবলৈও নিৰ্দেশ দিয়ে ।
আনহাতে ৰাষ্ট্ৰীয় খাদ্য সুৰক্ষা আইন আৰু প্ৰধানমন্ত্ৰী গৰীব কল্যাণ যোজনাৰ অন্তৰ্গত চাউল চলিত মাহত গুদামৰ পৰা উলিয়াই হিতাধীকাৰীক বিতৰণ কৰা হ’ল নে নাই এই বিষয়েও বুজ লয় ৷
শিশু আৰু গৰ্ভৱতী মহিলাৰ স্বাস্থ্য আৰু পুষ্টিৰ ওপৰত গুৰুত্ব প্ৰদান কৰিবলৈ জিলা প্ৰশাসনক নিৰ্দেশ দিয়ে মুখ্য সচিব বৰুৱাই । চাহ বাগিচা আৰু ভিতৰুৱা গ্ৰামাঞ্চলত এই ক্ষেত্ৰত বিশেষ গুৰুত্ব প্ৰদানৰ বাবে নিৰ্দেশ দিয়ে । সভাৰ শেষত জিলা উপাযুক্তই মুখ্য সচিবগৰাকীক আৰু উপস্থিত সকলোলৈকে কৃতজ্ঞতা জ্ঞাপন কৰে ।
ইয়াৰ পাচতে মুখ্য সচিবগৰাকীয়ে জিলা উপায়ুক্ত আৰু আৰক্ষী অধীক্ষকৰ সৈতে ওদালগুৰি চিকিৎসালয় পৰিদৰ্শন কৰে, য’ত বর্তমান ক’ভিড চিকিৎসা সেৱা প্ৰদান কৰি থকা হৈছে । ইয়াৰোপৰি জিলা কাৰাগাৰ আৰু কয়দীসকলৰ বাবে প্ৰস্তুত কৰা ক’ভিড কেয়াৰ কেন্দ্ৰ পৰিদর্শন কৰে ।
লগতে পঢ়ক : ডিটেনশ্যন কেম্পৰ পৰা মুক্তি পালে মুনিন্দ্ৰ দাসে
