তিনিচুকীয়া, ৪ অক্টোবৰ : বদৌচা কাপ আমন্ত্ৰণমূলক আন্তঃৰাষ্ট্ৰীয় ফুটবল প্ৰতিযোগিতাৰ বিজয়ীৰ সন্মান লাভ গকুলম কেৰালা এফ. চি দলৰ ৷ বদৌচা স্পৰ্টছ ক্লাৱৰ উদ্যোগত তথা অসম ফুটবল সন্থা আৰু ভাৰতীয় ফুটবল ফেডাৰেচনৰ তত্বাৱধানত আয়োজিত একাদশ বাৰ্ষিক প্ৰতিযোগিতাত জয়লাভ গকুলম কেৰালা এফ. চিৰ ৷ শনিবাৰে তিনিচুকীয়া জিলা ক্ৰীড়া সন্থাৰ কচুজান খেলপথাৰত অনুষ্ঠিত প্ৰতিযোগিতাৰ তীব্ৰ প্ৰতিদ্বন্দিতামূলক ফাইনেলত গকুলম কেৰালা দলে মিনাৰ্ভা পাঞ্জাৱ এফ চি দলক ছাডেন ডেথত পৰাজিত কৰি বিজয়ী হয় । নিৰ্দ্ধাৰিত সময়ত ২-২ গ'লত সমাপ্ত হোৱাত ট্ৰাইবেকাৰৰ সহায় লোৱা হয় যদিও দুয়োটা দলে ৩ টাকৈ শ্বট্ কাৰ্যকৰী কৰাত ফলাফলৰ নিৰ্দ্ধাৰণৰ বাবে ৰেফাৰীয়ে ছাডেন ডেথৰ সহায় লয় । ফলত কেৰালা দলে সামগ্ৰিকভাৱে ৬-৫ গ'লত জয়লাভ কৰে । আই লীগৰ দুয়োটা দলে ফাইনেলত অংশগ্ৰহণেৰে ফুটবলপ্ৰেমী পাঁচ সহস্ৰাধিক দৰ্শকক এখন উপভোগ্য ফাইনেল উপহাৰ দিয়ে । প্ৰথমাৰ্দ্ধৰ ৩ মিনিটত মিনাৰ্ভা পাঞ্জাৱৰ (BARBOZA)বাৰ্বজাই গ'ল দি দলক অগ্ৰগতি প্ৰদান কৰে । আনহাতে গকুলম কেৰালা দলৰ (ZOLA) জ'লাই প্ৰথমাৰ্দ্ধৰ ১৬ মিনিটত এটি সুন্দৰ গ'লেৰে সমতা স্থাপন কৰে ।
আনহাতে, প্ৰতিযোগিতাত বিজয়ী গকুলম কেৰালা দলক দুই লাখ প্ৰাইজমানি আৰু ট্ৰফী, বিজিত দল মিনাৰ্ভা পাঞ্জাৱ দলক এক লাখ প্ৰাইজমানি সহ ট্ৰফী প্ৰদান কৰা হয় । তৃতীয় স্থান লাভ কৰা ছাগলবণ্ড ইউনাইটেড এফ চি আৰু চতুৰ্থ স্থান লাভ কৰা শ্বিলঙৰ ৰিণটিহ্ দলক ক্ৰমে পঞ্চাশ আৰু পঁচিশ হাজাৰ টকা ট্ৰফীসহ প্ৰদান কৰা হয় । প্ৰতিযোগিতাৰ ফেয়াৰ প্লে' পুৰস্কাৰ লাভ কৰা মনিপুৰৰ নিছা দলক ট্ৰফীসহ নগদ বিশ হেজাৰ টকা প্ৰদান কৰা হয় । প্ৰতিযোগিতাৰ ফেয়াৰ প্লে' পুৰস্কাৰ লাভ কৰা মনিপুৰৰ নিছা দলক ট্ৰফীসহ নগদ বিশ হেজাৰ টকা প্ৰদান কৰা হয় । প্ৰতিযোগিতাৰ শ্ৰেষ্ঠ খেলুৱৈ আৰু সৰ্বোচ্চ গ'লদাতা ছাগলবণ্ডৰ প্ৰীতম নিংথৌজামক ট্ৰফীসহ দহ হাজাৰ টকা, শ্ৰেষ্ঠ গ'লকীপাৰ গকুলাম কেৰেলাৰ সত্যজিত বৰদলৈক ট্ৰফীসহ পাঁচ হাজাৰ টকা আৰু মেন-অব-দ্য ফাইনেল মিনাৰ্ভা পাঞ্জাৱৰ সুৰঞ্জিত সিঙক ট্ৰফীসহ চাৰি হাজাৰ টকা প্ৰদান কৰা হয় ।
