তেজপুৰ, ৬ ডিচেম্বৰ : সশস্ত্ৰ সীমা বল চমুকৈ এছ এছ বিৰ তদানীন্তন ডেপুটি কমাণ্ডেণ্ট শ্বহীদ বিজয় সিঙৰ 27 সংখ্যক মৃত্যু তিথি পালন ৷ শ্বহীদ সিঙৰ পৱিত্ৰ সোঁৱৰণত মঙলবাৰে তেজপুৰৰ সমীপৰ শালনীবাৰীস্থিত এছ এছ বিৰ প্ৰশিক্ষাৰ্থী প্ৰশিক্ষণ কেন্দ্ৰত বিশেষ কাৰ্যসূচী ৰূপায়ন কৰা হয় ৷ এই কথা জানিবলৈ দিছে এছ এছ বিৰ শালনীবাৰীস্থিত কাৰ্যালয়ৰ তৰফৰ পৰা ৷
তেওঁলোকে জনোৱা মতে, শ্বহীদ সেনা বিষয়াগৰাকীৰৰ এক প্ৰতিমূৰ্তি স্থাপন কৰা হৈছে প্ৰশিক্ষণ কেন্দ্ৰটোৰ চৌহদত ৷ সেয়ে মঙলবাৰে তেওঁৰ পুণ্য তিথি উপলক্ষে আয়োজন কৰা অনুষ্ঠানতে শ্বহীদ সিঙৰ প্ৰতিমূৰ্তি আনুষ্ঠানিকভাৱে উন্মোচন কৰা হয় ৷ শ্বহীদ সিঙৰ প্ৰতিমূৰ্তি উন্মোচন কৰে আৰ কে ভুমলা আৰু মহাপৰিদৰ্শক বিনোদ নায়কে ৷ ইয়াৰ পিচতে প্ৰতিমূৰ্তিত মাল্যাৰ্পণ আৰু পুষ্পাঞ্জলিৰে শ্বহীদ গৰাকীৰ প্ৰতি শ্ৰদ্ধা জ্ঞাপন কৰা হয় ৷
উল্লেখ্য যে, 1996 চনৰ 5 ডিচেম্বৰত প্ৰশিক্ষণ কেন্দ্ৰটোৰ সমীপৰ গৰৈমাৰীস্থিত ভাৰতীয় বায়ুসেনা ষ্টেচন ৰোডৰ সমীপত দুৰ্বৃত্তৰ আক্ৰমণত শ্বহীদ হৈছিল তদানীন্তন ডেপুটি কমাণ্ডেন্টগৰাকী । কৰ্তব্যৰ প্ৰতি নিষ্ঠা আৰু দেশৰ হকে নিজৰ জীৱন উৎসৰ্গা কৰাৰ বাবে 1997 চনত তেওঁক মৰণোত্তৰভাৱে ব্যতিক্ৰমী নিৰাপত্তা সেৱাৰ প্ৰমাণ পত্ৰৰে সন্মানিত কৰা হয় । আনহাতে, ডেপুটি কমাণ্ডেন্ট সিঙে 24 বছৰ ধৰি এছ এছ বিত কাৰ্যনিৰ্বাহ কৰি আছিল ৷
মঙলবাৰে প্ৰয়াত ডেপুটি কমাণ্ডেন্ট গৰাকীৰ 27 সংখ্যক শ্বহীদ দিৱস উপলক্ষে আয়োজিত বিশেষ সোঁৱৰণী কাৰ্যসূচীত উপস্থিত আছিল তেজপুৰস্থিত এছ এছ বিৰ সীমান্ত মুখ্য কাৰ্যালয়ৰ উপ-মহাপৰিদৰ্শক, শালনীবাৰী প্ৰশিক্ষাৰ্থী প্ৰশিক্ষণ কেন্দ্ৰ আৰু যুটীয়া চিকিৎসালয়ৰ উপ-মহাপৰিদৰ্শক, এছ এছ বিৰ বিভিন্ন শাখাৰ একাংশ বিষয়া-জোৱান ৷
লগতে পঢ়ক : ম্যানমাৰৰ জুণ্টা আৰ্মীৰ ভাইৰেল ভিডিঅ'ক লৈ সষ্টম মণিপুৰ আৰক্ষী
