তেজপুৰ,৭ ফ্ৰেব্ৰুৱাৰী : ভাৰতত মুঠ ৪৯ খন টাইগাৰ ৰিজাৰ্ভ অৰ্থাৎ ব্যঘ্ৰ প্ৰকল্প আছে তাৰ ভিতৰত অসমত ৫ খন আৰু চুবুৰীয়া পাহাৰীয়া ৰাজ্য অৰুণাচল প্ৰদেশত ৩ খন ব্যঘ্ৰ প্ৰকল্প আছে ৷ ইতিমধ্যে সকলো প্ৰকল্পতে বন বিভাগে টাইগাৰ বিশেষজ্ঞৰ জৰিয়তে বাঘৰ বসতি চিনাক্ত কৰিবলৈ উপযুক্ত স্থানত কেমেৰা সংস্থাপনৰ ব্যৱস্থা কৰিছে ৷ গোপন কেমেৰা সংস্থাপনৰ কাম বিগত ডিচেম্বৰ মাহৰ পৰা বৰ্তমানলৈকে চলি আছে ৷ শেষৰটো কেমেৰা সংস্থাপন হোৱাৰ পাছতে এই খাতিয়ানৰ অন্ত পৰিব বুলি জানিব পৰা গৈছে ৷
লগতে পঢ়কঃ আলফা(স্বা)ক শান্তিৰ মেজলৈ আমন্ত্ৰণ হিমন্ত বিশ্ব শৰ্মাৰ
বিগত বৰ্ষত অৰুণাচল প্ৰদেশৰ ছিজুচাস্থিত পাকে টাইগাৰ ৰিজাৰ্ভত ৫ টা কৈ ঢেকিয়াপতিয়া বাঘ চিনাক্ত কৰা হৈছিল আনহাতে কাষতে লাগি থকা নামেৰী ৰাষ্টীয় উদ্যানৰ নামেৰী টাইগাৰ ৰিজাৰ্ভত ৮ টা বাঘ কেমেৰাত চিনাক্ত হৈছিল ৷
এই বছৰো ইয়াৰ সংখ্যা বৃদ্ধি পোৱাৰ সম্ভাৱনা বেছি যদিও সম্পূৰ্ণ পৰ্যবেক্ষন কৰাৰ পাছতহে ইয়াৰ সঠিক তথ্য পোহৰলৈ আহিব ৷ উল্লেখযোগ্য যে অৰুণাচল প্ৰদেশত অন্য এখন টাইগাৰ ৰিজাৰ্ভৰ প্ৰস্তুতি ইতিমধ্যে সম্পন্ন হৈ উঠিছে বুলি এক বিশেষ সূত্ৰৰ জৰিয়তে জানিব পৰা গৈছে ৷
