আমগুৰি, 19 ফেব্ৰুৱাৰী: ৰাজ্যৰ ভিন্ন প্ৰান্তৰ লগতে শুকুৰবাৰে অত্যাৱশ্যকীয় সামগ্ৰীৰ লগতে পেট্ৰ'লজাত সামগ্ৰীৰ মূল্যবৃদ্ধিৰ বিৰুদ্ধে শিৱসাগৰৰ নামতিত আছু কৰ্মী সকলে এক প্ৰতিবাদী কাৰ্যসূচী গ্ৰহণ কৰে ৷
আছু (সদৌ অসম ছাত্ৰ সন্থা) ৰ আহ্বানত নামতি আঞ্চলিক ছাত্ৰ সন্থাৰ উদ্যোগত আছু কৰ্মী সকলে এই প্ৰতিবাদত অংশ লোৱা পৰিলক্ষিত হয় ৷ মূলতঃ অত্যাৱশ্যকীয় সামগ্ৰীৰ লগতে পেট্ৰ'লজাত সামগ্ৰীৰ আকাশলংঘী মূল্যবৃদ্ধিৰ বিৰুদ্ধে নামতি আঞ্চলিক ছাত্ৰ সন্থাই এই প্ৰতিবাদ সাব্যস্ত কৰে ৷ মূল্যবৃদ্ধিৰ বিৰুদ্ধে সাব্যস্ত কৰা প্ৰতিবাদত আছু কৰ্মী সকলে তেওঁলোকৰ সন্মুখত প্ৰতিকী ৰূপত চিলিণ্ডাৰ আৰু পিঁয়াজ ইত্যাদি অত্যাৱশ্যকীয় খাদ্য সামগ্ৰী ৰাখি থোৱা দেখিবলৈ পোৱা গ'ল ৷
ৰাজ্য আৰু কেন্দ্ৰ উভয়তে শাসনাধিষ্ঠ চৰকাৰৰ বিৰুদ্ধে মূল্যবৃদ্ধি ৰোধ কৰাৰ ক্ষেত্ৰত ব্যৰ্থতাৰ অভিযোগ উত্থাপন কৰি প্ৰতিবাদকাৰী সকলে দুয়োখন চৰকাৰকে তীব্ৰ ভাষাৰে নিন্দা কৰে ৷ চৰকাৰক তেওঁলোকৰ বিফলতাৰ বাবে ধিক্কাৰ জনাই প্ৰতিবাদী আছু কৰ্মী সকলে এইবাৰ ৰাইজকো চৰকাৰক এশিকনি দিবৰ বাবে আহ্বান জনায় ৷ উল্লেখ্য যে, আছুৰ আহ্বানত শুকুৰবাৰে ৰাজ্যৰ ভিন্ন প্ৰান্তৰ আছু গোটসমূহে মূল্যবৃদ্ধিৰ বিৰুদ্ধে প্ৰতিবাদী কাৰ্যসূচী হাতত লৈ চৰকাৰৰ বিৰুদ্ধে সৰৱ হৈ পৰিছে ৷
লগতে পঢ়ক: মূল্যবৃদ্ধিকলৈ সদৌ অসম ছাত্ৰ সন্থাৰ প্ৰতিবাদ
