নলবাৰী,13 মে' : নলবাৰীৰ এগৰাকী বিশেষ শিল্পী ৷ যাৰ তুলিকাই যাদু দেখুৱায় অসমীয়াৰ প্ৰাণৰ গামোচাত ৷ অসমীয়া গামোচাত চিত্ৰ অংকন কৰি গোটেই ভাৰতবৰ্ষতেই চিনাকী দিবলৈ সক্ষম হৈছে এইগৰাকী চিত্ৰ শিল্পী খছনুৰ আহমেদে ।
সাহিত্যিক পংকজ গোবিন্দ মেধিৰ দ্বাৰা অনুপ্ৰাণিত হৈ প্ৰথম পৰ্যায়ত এখন গামোচাত 100গৰাকী অসম সাহিত্য সভাৰ সভাপতিৰ প্ৰতিচ্ছবি অংকন কৰি বিশেষভাৱে চৰ্চিত হৈ পৰে ৷ তাৰ পিচত নিৰবিচ্ছিন্নভাৱে অসমৰ স্বাভিমান গামোচাত আঁকি গৈছে 2000ৰো অধিক ছবি ৷
ইয়াৰ ভিতৰত সংগীত শিল্পী জুবিন গাৰ্গৰ পৰা ভূপেন হাজৰিকালৈ , যতীন বৰাৰ পৰা মুখ্যমন্ত্ৰী সৰ্বানন্দ সোণোৱালৰ,ডঃ হিমন্ত বিশ্ব শৰ্মাৰ পৰা অসমৰ প্ৰাক্তন মুখ্যমন্ত্ৰী তৰুণ গগৈলৈকে সকলোৰে প্ৰতিচ্ছবি অংকন কৰিছে গামোচাত ।
উল্লেখ্য যে, দেশত চলি থকা লক্ ডাউনৰ সময়ত 60 বছৰৰ উৰ্ধ্বৰ চিত্ৰ শিল্পী খছনুৰ আহমেদে গামোচাত ছবি অংকন কৰাত ব্যস্ত হৈ পৰিছে ।
চৰকাৰী ভাবে কোনো সাহায্য অথবা শিল্পী পেঞ্চন লাভ কৰিবলৈ সমৰ্থ হোৱা নাই শিল্পীগৰাকী ৷ সেয়ে বৰ্তমানৰ চৰকাৰৰ ওপৰতো মনৰ ক্ষোভ উজাৰিছে চিত্ৰশিল্পী গৰাকীয়ে ৷
