নলবাৰী, ১৩ আগষ্ট: নিৰ্বাচন আয়োগে শুকুৰবাৰে সমষ্টি পুনৰনিৰ্ধাৰণৰ চূড়ান্ত তালিকা প্ৰকাশ কৰাৰ পিচতেই আৰম্ভ হৈছে প্ৰতিবাদ । সমষ্টি পুনৰ নিৰ্ধাৰণৰ পূৰ্ণাংগ তালিকা প্ৰকাশৰ পিছতেই টিহু-মাখিবাহাত দেখা গ'ল আৱতৰীয়া দিপাৱলী ৷ ধৰ্মপুৰ সমষ্টিৰ পৰিৱৰ্তে টিহু সমষ্টি ঘোষণাৰ পিচতেই ফটকা ফুটাই আনন্দ উল্লাস কৰে ৰাইজে । শনিবাৰে পুৱাৰে পৰা নিশালৈকে সমষ্টিটোৰ ঠায়ে ঠায়ে দেখা গৈছে ফটকা ফুটাই আনন্দ উল্লাস কৰাৰ দৃশ্য় । পূৰ্ৱতে নলবাৰী জিলাৰ একাংশ গাঁও বৰমা বিধানসভা সমষ্টিত অন্তৰ্ভুক্ত হৈ আছিল সেইবোৰ গাঁও বৰ্তমানৰ চূড়ান্ত তালিকাত টিহু সমষ্টিত অন্তৰ্ভুক্ত কৰা হৈছে ।
নলবাৰী সমষ্টি আৰু বৰক্ষেত্ৰী সমষ্টিৰ কিছু কিছু গাঁও টিহু সমষ্টিত সংলগ্ন কৰাই নতুনকৈ গঠিত কৰা হৈছে টিহু বিধানসভা সমষ্টি । উল্লেখযোগ্য যে, পূৰ্ৱৰ ধৰ্মপুৰ সমষ্টিক বিলুপ্তি ঘটাই নতুনকৈ সৃষ্টি কৰা হ'ল টিহু বিধানসভা সমষ্টি । ধৰ্মপুৰ সমষ্টিত একপ্ৰকাৰ দীৰ্ঘদিনে ৰাজনৈতিক পদবী স্থায়ী কৰি লৈছিল জ্যেষ্ঠ নেতা মন্ত্ৰী চন্দ্ৰমোহোন পাটোৱাৰীয়ে ।
সম্প্ৰতি নতুন খচৰা আৰু চূড়ান্ত তালিকা প্ৰকাশ পোৱাত মন্ত্ৰী চন্দ্ৰমোহোন পাটোৱাৰীৰ গৃহ মৌজাকে ধৰি নিজৰ গাঁওখনো নলবাৰী বিধানসভা সমষ্টিত অন্তৰ্ভুক্তি কৰা হৈছে । ফলত মন্ত্ৰী চন্দ্ৰমোহোন পাটোৱাৰীৰ ৰাজনৈতিক ভৱিষ্যৎ পৰৱৰ্তী সময়ত কোন দিশে গতি কৰে সেয়া লক্ষণীয় হ'ব ।
