লংকা, 27 মে' : হিন্দী বোলছবিত আৰক্ষী সাজত নায়কে ভিলেইনক ধৰি নানান অকথ্য নিৰ্যাতন চলোৱাৰ লগতে মাৰপিট কৰা আমি সকলোৱে দেখিছো | সেই হিন্দী বোলছৱিৰ দৰেই অনুৰূপ ঘটনা সংঘটিত হ'ল হোজাই জিলাৰ লংকাত | অপৰাধীক ধৰি থানালৈ নিয়াৰ পৰিবৰ্তে বাটতে গুণ্ডা লগাই মাৰপিট কৰালে আৰক্ষীয়ে |
ঘটনা সন্দৰ্ভত জানিব পৰা মতে, হোজাই জিলাৰ লংকাৰ উদালী আৰক্ষী চকীৰ আৰক্ষী বিষয়া দিলিপ দাসে ১৮ মে' তাৰিখে ৱামুনগাঁৱৰ চাহাৱ উদ্দিন নামৰ লোক জনক থানালৈ উঠাই আনি ১৯ তাৰিখে নগদ ধন ২৫০০ টকা লৈ এৰি দিয়ে| পিছত পুনৰ উদালী আৰক্ষী বিষয়া দিলিপ দাস সহ এটি আৰক্ষী দলে ২১তাৰিখে নিশা ১২ মান বজাত বামুনগাঁৱৰ নিজ গৃহৰ পৰা চাহাৱ উদ্দিনক উঠাই আনি আৰক্ষী থানা পোৱাৰ আগতেই চাহাৱ উদ্দিনৰ হাত বান্ধি গুণ্ডা লগোৱাই মাৰধৰ কৰে ৷ ২২ আৰু ২৩ মে' তাৰিখে চাহাৱ উদ্দিনৰ পৰিয়ালৰ থানালৈ অহাত চাহাৱ উদ্দিনক জেললৈ প্ৰেৰণ কৰা হ'ল বুলি পৰিয়ালক খেদি পঠিয়ায় আৰক্ষীয়ে | পাচদিনা অপৰাধী চাহাব উদ্দিনক মুকলি কৰি দিয়ে আৰক্ষীয়ে ৷ মুকলি লাভ কৰাৰ পাচতেই ঘটনা সন্দৰ্ভত আৰক্ষী বিষয়া দিলীপ দাসৰ বিৰুদ্ধে এজাহাৰ দাখিল কৰে ভুক্তভোগী অপৰাধীয়ে ৷
