নগাঁও, 3 জুন: লক ডাউনৰ বাবে স্তব্ধ হৈ পৰা নগাঁৱৰ এটা ছপাশালত পূৰ্ণগতিত চলিছে গ্ৰন্থ চপোৱাৰ কাম । অসমীয়া সাহিত্য জগতলৈ অনবদ্য অৱদান আগবঢ়োৱা সাহিত্যৰথী লক্ষ্মীনাথ বেজবৰুৱাৰ অন্যতম গ্ৰন্থ কামত কৃতিত্ব লভিবৰ সংকেত ৰচনা কৰা হৈছিল ১৯০৩ চনত ৷ গ্ৰন্থখনৰ জৰিয়তে বেজবৰুৱাই অসমীয়াক দিছিল কামত কৃতিত্ব লাভৰ বহুকেইটা সূত্ৰ । ১৯৬৮ চনত বেজবৰুৱাৰ ৰচনাৱলীত এই গ্ৰন্থখন অন্তৰ্ভুক্ত কৰিছিল অসমৰ সম্ভ্ৰান্ত প্ৰকাশন গোষ্ঠী সাহিত্য প্ৰকাশে । গ্ৰন্থখন পুনৰ মুদ্ৰণৰ কাম আৰম্ভ কৰিছে নগাঁৱৰ ক্ৰান্তিকাল প্ৰকাশন গোষ্ঠীয়ে ৷ প্ৰায় ৫০ হাজাৰ গ্ৰন্থ মুদ্ৰণ কৰি ছাত্ৰ-ছাত্ৰীৰ মাজত বিনামূলীয়াকৈ বিতৰণ কৰাৰ সিদ্ধান্ত লৈছে প্ৰকাশন গোষ্ঠীটোৱে ।
উল্লেখ্য যে, নগাঁৱৰ অন্যতম ছপাশাল অজন্তা প্ৰেছে এইবেলি ভৰি দিছে ৫০ বছৰত । প্ৰকাশন গোষ্ঠীটোৰ ভগ্নী প্ৰতিষ্ঠান ক্ৰান্তিকাল প্ৰকাশনৰ ২০ বছৰীয়া বৰ্ষপূৰ্তি উপলক্ষে অজন্তা প্ৰেছ তথা ক্ৰান্তিকাল প্ৰকাশনৰ স্বত্বাধিকাৰী কৈলাশ ৰাজখোৱাই ৰাজ্যৰ বিভিন্ন বিদ্যালয়ৰ ছাত্ৰ-ছাত্ৰীৰ মাজত বিনামূলীয়াকৈ বিতৰণ কৰিব গ্ৰন্থখন । অৱশ্যে এইক্ষেত্ৰত নগাঁৱৰ বিদ্যালসমূহক অগ্ৰাধিকাৰ দিয়াৰ কথা উল্লেখ কৰে ৰাজখোৱাই ।
লগতে চাওকঃ বানৰ কৱলত চলচলিৰ দুই শতাধিক কৃষকৰ কৃষিভূমি
